ପାରଳାଖେମୁଣ୍ଡି/ମୋହନା, ୧୭ା୧୦ (ସ୍ବ.ପ୍ର./ଡି.ଏନ୍.ଏ.): ବେଆଇନ ମଦ କାରବାର ବିରୋଧରେ ଖବର ସଂଗ୍ରହ କରିବା ବେଳେ ମରଣାନ୍ତକ ଆକ୍ରମଣର ଶିକାର ହୋଇଛନ୍ତି ଗଜପତି ଜିଲା ଚନ୍ଦ୍ରଗିରିର ‘ଧରିତ୍ରୀ’ ଖବରଦାତା ଶ୍ରୀହରି ପ୍ରଧାନ। ଦୁର୍ବୃତ୍ତଙ୍କ ସଂଘବଦ୍ଧ ଆକ୍ରମଣରେ ଶ୍ରୀହରିଙ୍କ ଛାତି ଓ ମୁଣ୍ଡରେ ଗଭୀର ଆଘାତ ଲାଗିବା ସହ ଦୁଇଗୋଡ଼ ଭାଙ୍ଗିଯାଇଛି। ଗୁରୁତର ଅବସ୍ଥାରେ ତାଙ୍କୁ ପ୍ରଥମେ ଚନ୍ଦ୍ରଗିରି ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ର ଓ ସେଠାରୁ ବ୍ରହ୍ମପୁର ଏମ୍କେସିଜି ମେଡିକାଲ କଲେଜ ହସ୍ପିଟାଲକୁ ସ୍ଥାନାନ୍ତର କରାଯାଇଛି। ଏହି ଘଟଣାରେ ୪ ଅଭିଯୁକ୍ତ ଗିରଫ ହୋଇଛନ୍ତି। ସୂଚନା ଅନୁଯାୟୀ, ଗଜପତି ଜିଲା ମୋହନା ଥାନା ଅନ୍ତର୍ଗତ ଚନ୍ଦ୍ରଗିରି ଆର୍ଆଇ କାର୍ଯ୍ୟାଳୟ ଏବଂ ସ୍କୁଲ ସମ୍ମୁଖରେ କୋରା ମହାଙ୍କୁଡ଼ ମଦ ବ୍ୟବସାୟ ଚଳାଇଥିଲେ। ଏ ସମ୍ପର୍କରେ ଦୀର୍ଘଦିନ ଧରି ଅଞ୍ଚଳରେ ଅସନ୍ତୋଷ ପ୍ରକାଶ ପାଉଥିଲା। ଗଣମାଧ୍ୟମ ନିକଟରେ ମଧ୍ୟ ଅଭିଯୋଗ ହୋଇଥିଲା। ଶ୍ରୀହରି ମଙ୍ଗଳବାର ସକାଳେ ଏ ସମ୍ପର୍କରେ ଖବର ସଂଗ୍ରହ ପାଇଁ ବନ୍ଧୁ ବିଶ୍ୱନାଥ ଭୂୟାଁଙ୍କ ସହ ଉକ୍ତ ଗ୍ରାମକୁ ଯାଇଥିଲେ। ସେଠାରେ ମଦ କାରବାର ସମ୍ପର୍କରେ ଭିଡିଓ ଏବଂ ବିଭିନ୍ନ ସୂତ୍ରରୁ ତଥ୍ୟ ସଂଗ୍ରହ କରିବାବେଳେ ଗ୍ରାମର ଜିତେନ୍ଦ୍ର ମହାଙ୍କୁଡ଼ ଏବଂ ପ୍ରଶାନ୍ତ ପ୍ରଧାନ ତାଙ୍କୁ ଗାଳିଗୁଲଜ କରିବା ସହ ଧମକ ଦେଇଥିଲେ। ସେଦିନ ଶ୍ରୀହରି ଜଣେ ବନ୍ଧୁଙ୍କ ଘରକୁ ଯାଇ ରାତି ପ୍ରାୟ ୧୧ଟା ସମୟରେ ଘରକୁ ଫେରିବା ବେଳେ ମଦ ବ୍ୟବସାୟୀ କୋରା, ପୁଅ ଅରୁଣ ଏବଂ ବରୁଣଙ୍କ ସମେତ ଜିତେନ୍ଦ୍ର ଓ ପ୍ରଶାନ୍ତ ତାଙ୍କୁ ଅଟକାଇ ମରଣାନ୍ତକ ଆକ୍ରମଣ କରିଥିଲେ। ଏ ସମ୍ପର୍କରେ ଥାନାରେ ଏତଲା ହୋଇଥିବାବେଳେ ପୋଲିସ କେସ୍ ନଂ ୧୮୪/୧୯ରେ ଏକ ମାମଲା ରୁଜୁକରି ଘଟଣାର ତଦନ୍ତ କରିଥିଲା। ଏଥିରେ ୪ ଅଭିଯୁକ୍ତ କୋରା, ଅରୁଣ, ବରୁଣ, ଜିତେନ୍ଦ୍ର ଓ ପ୍ରଶାନ୍ତଙ୍କୁ ଗିରଫ କରି କୋର୍ଟ ଚାଲାଣ କରାଯାଇଥିବା ବୁଧବାର ଖବରଦାତା ସମ୍ମିଳନୀରେ ଆଇଆଇସି ସଜିତ୍ କୁମାର ନାୟକ ସୂଚନା ଦେଇଛନ୍ତି। ଖବରଦାତାଙ୍କୁ ଏଭଳି ଆକ୍ରମଣର ତୀବ୍ର ନିନ୍ଦା କରାଯାଇଛି ା
