ରାଜକୋଟ,୧୭।୧- ଭାରତୀୟ ଓପନର ରୋହିତ ଶର୍ମା ଶୁକ୍ରବାର ଦ୍ରୁତତମ ଓପନର ଭାବେ ୭ ହଜାର ରନ୍ ପୂରଣ କରିଛନ୍ତି। ହାସିମ ଆମଲା, ସଚିନ ତେନ୍ଦୁଲକରଙ୍କ ଭଳି କିମ୍ବଦନ୍ତୀ ଓପନରଙ୍କୁ ପଛରେ ପକାଇ ରୋହିତ ଏହି ସଫଳତା ପାଇଛନ୍ତି। ଅଷ୍ଟ୍ରେଲିଆ ବିପକ୍ଷ ଦ୍ୱିତୀୟ ଦିନିକିଆରେ ୪୨ ରନ୍ର ଇନିଂସ ଖେଳିବା ଅବସରରେ ସେ ଏହି ରେକର୍ଡ ଅଧିକାରୀ ହୋଇଛନ୍ତି। ରୋହିତ ୧୩୭ ଇନିଂସରେ ଏହି ମାଇଲଷ୍ଟୋନ ସ୍ପର୍ଶ କରିଛନ୍ତି। ତାଲିକାର ଦ୍ୱିତୀୟ ସ୍ଥାନରେ ରହିଛନ୍ତି ଆମଲା। ଦକ୍ଷିଣ ଆଫ୍ରିକାର ପୂର୍ବତନ ଓପନର ୧୪୭ ଇନିଂସରେ ୭ ହଜାର ରନ୍ ପୂରଣ କରିଥିଲେ। ସେହିଭଳି ସଚିନଙ୍କୁ ୧୬୦ ଇନିଂସ ଲାଗିଥିଲା। ତେବେ ରୋହିତ ଦେଶର ଚତୁର୍ଥ ଓପନର ଭାବେ ଦିନିକିଆ କ୍ରିକେଟରେ ୭ ହଜାର ରନ୍ ପୂରଣ କରିଛନ୍ତି। ଏଥିରେ ତେନ୍ଦୁଲକର, ସୌରଭ ଗାଙ୍ଗୁଲି ଓ ବୀରେନ୍ଦ୍ର ସେହ୍ବାଗ ରହିଛନ୍ତି। ରୋହିତ ମାତ୍ର ୪ ରନ୍ର ବ୍ୟବଧାନରେ ଆଉ ଏକ ମାଇଲଷ୍ଟୋନରେ ପହଞ୍ଚି ପାରି ନାହାନ୍ତି। ତାଙ୍କୁ ଦିନିକିଆ କ୍ରିକେଟରେ ୯ ହଜାର ରନ୍ ପୂରଣ କରିବା ଲାଗି ୪ ରନ୍ ଦରକାର। ସୂଚନାଯୋଗ୍ୟ, ରୋହିତ ଜଣେ ମଧ୍ୟକ୍ରମର ବ୍ୟାଟ୍ସମ୍ୟାନ ଭାବେ କ୍ୟାରିୟରର ଆରମ୍ଭ କରିଥିଲେ। ୨୦୧୩ ଚାମ୍ପିୟନ୍ସ ଟ୍ରଫିରେ ଭାରତୀୟ ଅଧିନାୟକ ମହେନ୍ଦ୍ର ସିଂ ଧୋନୀ ରୋହିତଙ୍କୁ ଓପନିଂ କରିବାକୁ ପଠାଇଥିଲେ।
