ନୂଆଦିଲ୍ଲୀ,୨୭।୪(ପି.ଟି): ଭାରତୀୟ ଦ୍ରୁତ ବୋଲର ଯଶପ୍ରୀତ ବୁମ୍ରା ଏବେ ବିଶ୍ୱରେ ଅନ୍ୟତମ ଶ୍ରେଷ୍ଠ ବୋଲର ଭାବେ ନିଜର ସ୍ବତନ୍ତ୍ର ପରିୟ ସୃଷ୍ଟି କରିଛନ୍ତି। ତେବେ ନିଜର ବିଚିତ୍ର ବୋଲିଂ ଆକ୍ସନ ପାଇଁ ସେ ସବୁବେଳେ ଚର୍ଚ୍ଚାରେ ରହିଥାନ୍ତି। ତାଙ୍କର ଏହି ଅସାଧାରଣ ବୋଲିଂ ଆକ୍ସନ ପାଇଁ ଲୋକେ ତାଙ୍କୁ ଭାରତ ତରଫରୁ ଖେଳିପାରିବେ ନାହିଁ ବୋଲି କହୁଥିଲେ ବୋଲି ସେ କହିଛନ୍ତି। ପୂର୍ବତନ ଅଲରାଉଣ୍ଡର ଯୁବରାଜ ସିଂଙ୍କ ସହ ଇନ୍ଷ୍ଟାଗ୍ରାମରେ ଲାଇଭ୍ ସେସନରେ ଅଂଶଗ୍ରହଣ କରି ବୁମ୍ରା ଏହା କହିଛନ୍ତି।
ନିଜର ବିଚିତ୍ର ତଥା ଆଇ ଆର୍ମ ବୋଲିଂ ଆକ୍ସନ ନେଇ ଯୁବରାଜ ତାଙ୍କୁ ପ୍ରଶ୍ନ ପଚାରିଥିଲେ। ଦୀର୍ଘ ଦିନ ଧରି ଦେଶ ପାଇଁ ଖେଳିପାରିବି ନାହିଁ ବୋଲି କେତେକ କହୁଥିଲେ। ଦେଶ ପାଇଁ ଖେଳିବାର ମୁଁ ଅନ୍ତିମ ବ୍ୟକ୍ତି ହେବି ବୋଲି କେତେକ ବିଚାର କରୁଥିବା କଥା ସେ ଯୁବିଙ୍କୁ ଉତ୍ତର ଦେଇ କହିଛନ୍ତି। ଗୋଟିଏ କିମ୍ବା ଦୁଇଟି ରଣଜୀ ଟ୍ରଫି ମ୍ୟାଚ୍ ଖେଳିବି ବୋଲି ସେମାନେ କହୁଥିଲେ। କାରଣ ଏହି ଆକ୍ସନ ଦେହ ପାଇଁ ପିଡାଦାୟକ ହେବ ବୋଲି କେତେକ ଭାବୁଥିଲେ। ତେବେ ଏହି ଆକ୍ସନକୁ ବଜାୟ ରଖି ଧିରେ ଧିରେ ଉନ୍ନତି କରିଥିଲି ୨୬ ବର୍ଷୀୟ ବୁମ୍ରା କହିଛନ୍ତି। ଇଣ୍ଡିଆନ ପ୍ରିମିୟର ଲିଗ୍ (ଆଇପିଏଲ୍)ରେ ଦମ୍ଦାର ପ୍ରଦର୍ଶନ କରିବା ପରେ ସେ ୨୦୧୬ରେ ଭାରତ ପାଇଁ ପଦାର୍ପଣ କରିଥିଲେ।
ସ୍ବତନ୍ତ୍ର ଭାବେ କୌଣସି ପ୍ରଶିକ୍ଷଣ ନେଇ ନ ଥିଲି। ଟିଭି ଦେଖି ଯାହା ଶିଖିଥିଲି। ଜଣେ ଟେନିସ ବଲ ବୋଲରଙ୍କ ଆକ୍ସନକୁ ନକଲ କରିବାକୁ ପ୍ରୟାସ କରିଥିଲି। ତେବେ ଏହି ପ୍ରକାର ଆକ୍ସନ କେବେ ଆରମ୍ଭ ହେଲା ତାହା ଜାଣି ନ ଥିଲି। ୧୯ ବର୍ଷରୁ କମ୍ ପର୍ଯ୍ୟନ୍ତ ମୋର ଭିନ୍ନ ଆକ୍ସନ ଥିଲା। ତେବେ ଏଥିରେ ପରିବର୍ତ୍ତନ ଆସିଥିଲା। କିନ୍ତୁ ଯେତେବେଳେ ଏହି ଅସାଧାରଣ ଆକ୍ସନରେ ବୋଲିଂ କରିବା ଆରମ୍ଭ କରିଥିଲି, ଏହାର ପରିବର୍ତ୍ତନ ପାଇଁ କେହି ମୋତେ କହି ନ ଥିଲେ ବୋଲି ବୁମ୍ରା କହିଛନ୍ତି। ବୁମରା ଏପର୍ଯ୍ୟନ୍ତ ୬୪ ଦିନିକିଆ, ୫୦ ଟି୨୦ ଓ ୧୪ଟି ଟେଷ୍ଟ ଖେଳିଛନ୍ତି। ୨୦୧୮ ଜାନୁୟାରୀରେ ସେ ଟେଷ୍ଟ ପଦାର୍ପଣ କରିଥିଲେ। ଏବେ ସେ ଟେଷ୍ଟରେ ମଧ୍ୟ ନିୟମିତ ସଦସ୍ୟ ବନିଯାଇଛନ୍ତି। ଟେଷ୍ଟ ଫର୍ମାଟ ସବୁଠାରୁ ଶ୍ରେଷ୍ଠ। ବୁମ୍ରା ଦିନେ ବିଶ୍ୱର ଏକ ନମ୍ବର ବୋଲର ହେବେ ବୋଲି ଯୁବରାଜ ପୂର୍ବାନୁମାନ କରି ଏଭଳି କଥା ତାଙ୍କୁ କହିଥିଲେ। ବୁମ୍ରା ୨୦୧୭ରେ ଟି୨୦ ର଼୍ୟାଙ୍କିଙ୍ଗ୍ର ବୋଲିଂ ତାଲିକାରେ ୧ ନମ୍ବର ସ୍ଥାନ ହାସଲ କରିଥିଲେ।
