ରାଉରକେଲା ଅଫିସ, ୭।୩: ରାଉରକେଲା ସେକ୍ଟର-୭ ସ୍ଥିତ ଦୁର୍ଗାପୂଜା ପଡିଆରେ ଆସନ୍ତା ୯ତାରିଖରୁ ଆରମ୍ଭ ହେବାକୁ ଯାଉଛି ଭାଇଚାରାର ମହାନ ପର୍ବ ଦୋଳ ମେଳଣ। ଚଳିତବର୍ଷ ଏହା ନବମ ବର୍ଷରେ ପଦାର୍ପଣ କରିଛି। ଦେଶୀ ରଙ୍ଗରେ ଏହି ପର୍ବକୁ ଧୁମ୍ଧାମ୍ରେ ପାଳନ କରାଯିବ ବୋଲି ରାଉରକେଲା କେନ୍ଦ୍ରୀୟ ଦୋଳ ମେଳଣ ସମିତି ଅଧ୍ୟକ୍ଷ ହରିହର ରାଉତରାୟ ସୋମବାର ଏକ ଖବରଦାତା ସମ୍ମିଳନୀରେ ପ୍ରକାଶ କରିଛନ୍ତି। ରଙ୍ଗର ପର୍ବ ହୋଲି ଉପଲକ୍ଷେ ଆୟୋଜିତ ହେବାକୁ ଥିବା ୯ମ ଦୋଳ ମେଳଣ ପର୍ବରେ ଜିଲାର ବିଭିନ୍ନ ପ୍ରାନ୍ତରୁ ୪୦ଟି ରାଧାକୃଷ୍ଣଙ୍କ ସୁସଜ୍ଜିତ ଦୋଳ ବିମାନ ମୁଖ୍ୟ ଆକର୍ଷଣ ସାଜିବ। ବିଶେଷ କରି ସାଂସ୍କୃତିକ କାର୍ଯ୍ୟକ୍ରମରେ ଭଜନ ସନ୍ଧ୍ୟା ଆୟୋଜିତ ହେବ। ପ୍ରତ୍ୟେହ ରାତି ୯ଟାରେ ସାମୂହିକ ଆଳତୀ ହେବ। ଶ୍ରଦ୍ଧାଳୁ ଭକ୍ତଙ୍କର ପାଇଁ ଅନ୍ନକୋଟ ବ୍ୟବସ୍ଥା ରହିଥିବା ସୂଚନା ଦିଆଯାଇଥିଲା।
୨୦୧୫ରେ ବିଷ୍ଣୁ ଚରଣ ବିଶ୍ୱାଳ, ସୁଶାନ୍ତ ପଧାନ, ଈଶ୍ୱର ଭଞ୍ଜ ଓ ଅମୂଲ୍ୟ ବିଶୋଇଙ୍କୁ ନେଇ ପ୍ରଥମ କରି ଆରମ୍ଭ ହୋଇଥିଲା ଦୋଳ ମେଳଣ। ଧାର୍ମିକ, ସାଂସ୍କୃତିକ ଓ ପାରମ୍ପରିକ ସମ୍ପର୍କକୁ ଏକତା ସୂତ୍ରରେ ବାନ୍ଧିବା ଉଦ୍ଦେଶ୍ୟରେ ସମିତି ପକ୍ଷରୁ ପ୍ରତିବର୍ଷ ଦୋଳ ପର୍ବ ପାଳନ କରାଯାଉଛି। ମାତ୍ର ଦୁଇବର୍ଷ ଧରି କରୋନା କାରଣରୁ ପର୍ବ ପାଳନ ବନ୍ଦ ରହିଥିଲା। ଚଳିତବର୍ଷ ମେଳଣରେ ଲାଠିକଟା, ବନ୍ଧମୁଣ୍ଡା, ବିଶ୍ରା ଆଦି ଅଞ୍ଚଳରୁ ୩୫ରୁ ୪୦ ଦୋଳ ବିମାନ ଏକାଠି ହେବେ ବୋଲି କେନ୍ଦ୍ରୀୟ ଦୋଳ ମେଳଣ ସମିତି ସଭାପତି ଶଙ୍କର ଜେନା, ସାଧାରଣ ସମ୍ପାଦକ ପ୍ରଶାନ୍ତ କୁମାର ସାମଳ, ପ୍ରମୋଦ କୁମାର ପଧାନ, ପ୍ରଦୀପ ପଟ୍ଟନାୟକ, ପ୍ରସନ୍ନ କୁମାର ତ୍ରିପାଠୀ, କପିଳେଶ୍ୱର ମିଶ୍ର, ଜୟନ୍ତୀ ବିଶ୍ୱାଳ, ସୁମିତ୍ରା ସ୍ବାଇଁ, ରେଖା କୋଠାରୀ, ପ୍ରିୟବ୍ରତ ଭଞ୍ଜ, ସୁଶାନ୍ତ ପଧାନ ପ୍ରମୁଖ ପ୍ରକାଶ କରିଛନ୍ତି।
