ରାଞ୍ଚି,୪।୧୧ (ପି.ଟି.)- ପାର୍ଥିବ ପଟେଲଙ୍କ ନେତୃତ୍ୱାଧୀନ ଭାରତ ବି’ ଏଥର ଦେଓଧର ଟ୍ରଫି ହାସଲ କରିଛି। କେଦାର ଯାଦବଙ୍କ ୮୬ ରନର ଅର୍ଦ୍ଧଶତକୀୟ ଇନିଂସ ଓ ପରେ ସ୍ପିନର ଶାହବାଜ ନଦୀମଙ୍କ ୪ ଉଇକେଟ ସଫଳତା ସହାୟତାରେ ଭାରତ ବି’ ୫୧ ରନରେ ଭାରତ ସି’କୁ ପରାସ୍ତ କରି ଚାମ୍ପିୟନ ହୋଇଛି। ସ୍ଥାନୀୟ ଝାଡଖଣ୍ଡ ଷ୍ଟେଟ କ୍ରିକେଟ ଆସୋସିଏଶନ (ଜେଏସ୍ସିଏ) ଅନ୍ତର୍ଜାତୀୟ ଷ୍ଟାଡିୟମ କମ୍ପ୍ଲେକ୍ସରେ ସୋମବାର ଖେଳାଯାଇଥିବା ଟୁର୍ନାମେଣ୍ଟର ଫାଇନାଲ ମ୍ୟାଚ୍ରେ ଟସ୍ ଜିତି ଭାରତ ବି’ ପ୍ରଥମେ ବ୍ୟାଟିଂ କରିବାକୁ ନିଷ୍ପତ୍ତି ନେଇଥିଲା। ଭାରତ ବି’ ନିର୍ଦ୍ଧାରିତ ୫୦ ଓଭରରେ ୭ ଉଇକେଟ ହରାଇ ୨୮୩ ରନ ସଂଗ୍ରହ କରିଥିଲା। ଜବାବରେ ତାରକା ଖଚିତ ଭାରତ ସି’ ଦଳ ନିୟମିତ ବ୍ୟବଧାନରେ ଉଇକେଟ ହରାଇ ବିଜୟ ଲକ୍ଷ୍ୟଠାରୁ ଦୂରରେ ରହିଯାଇଥିଲା। ଫଳରେ ଦଳ ୫୦ ଓଭରରେ ୯ ଉଇକେଟ ହରାଇ ୨୩୨ ରନରେ ସୀମିତ ରହି ପରାସ୍ତ ହେବା ସହ ରନର୍ସଅପ୍ରେ ସନ୍ତୁଷ୍ଟ ହୋଇଛି।
୨୮୪ରନର ଚ୍ୟାଲେଞ୍ଜିଂ ଟାର୍ଗେଟର ପିଛା କରି ଭାରତ ସି’ ଅଧିନାୟକ ଶୁବମନ ଗିଲ୍ଙ୍କୁ ହରାଇ ପ୍ରାରମ୍ଭିକ ଝଟ୍କା ଖାଇଥିଲା। ମାତ୍ର ୧ ରନ କରି ଶୁବମନ ମହମ୍ମଦ ସିରାଜଙ୍କ ବଲ୍ରେ ଯଶସ୍ବୀ ଜୟସୁଆଲଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଦ୍ୱିତୀୟ ଉଇକେଟରେ ଓପନର ମୟଙ୍କ ଅଗ୍ରଓ୍ବାଲ ଓ ପ୍ରିୟମ ଗର୍ଗ ୫୪ ରନ କରି ସ୍ଥିତି ସମ୍ଭାଳିଥିଲେ। ମୟଙ୍କ ୨୮ ରନକରି ନଦୀମଙ୍କ ବଲ୍ରେ କ୍ରିଷ୍ଣାପ୍ପା ଗୋଥାମଙ୍କୁ କ୍ୟାଚ୍ ଦେଇ ଆଉଟ ହୋଇଥିଲେ। ଏହାପରେ ପ୍ରିୟମ ଗର୍ଗ ୭୭ଟି ବଲ ଖେଳି ୮ ଚୌକା ଓ ୧ ଛକା ସହ ୭୪ ରନକରି ସିରାଜଙ୍କ ଦ୍ୱାରା କ୍ଲିନ୍ ବୋଲ୍ଡ ହୋଇଥିଲେ। ସେହିପରି ଅକ୍ଷର ପଟେଲ ୩୮, ମୟଙ୍କ ମାର୍କଣ୍ଡେ ୨୭ ରନ କରି ଆଉଟ ହୋଇଥିବା ବେଳେ ଜଲଜ ସାକସେନା ୩୭ ରନ କରି ଶେଷ ପର୍ଯ୍ୟନ୍ତ ଅପରାଜିତ ରହିଥିଲେ। ବାକି ବ୍ୟାଟ୍ସମ୍ୟାନ ଦୁଇଅଙ୍କ ଛୁଇଁ ପାରି ନ ଥିଲେ। ବିରାଟ ସିଂ ୬, ସୂର୍ଯ୍ୟକୁମାର ଯାଦବ ୩, ଦୀନେଶ କାର୍ତ୍ତିକ ୩, ଦିଓ୍ବେଶ ପଠାନିଆ ୬ ରନକରି ଆଉଟ ହୋଇଥିବା ବେଳେ ଇଶାନ ପୋରେଲ ୫ ରନ କରି ଅପରାଜିତ ରହିଥିଲେ। ବୋଲିଂରେ ଭାରତ ବି’ ତରଫରୁ ନଦୀମ ସର୍ବାଧିକ ୪, ସିରାଜ ୨, ରୁଷ କାଲାରିଆ ଗୋଟିଏ ଉଇକେଟ ଅକ୍ତିଆର କରିଥିଲେ।
ପ୍ରଥମେ ବ୍ୟାଟିଂ କରିଥିବା ଭାରତ ବି’ ତରଫରୁ କେଦାର ଯାଦବ ସର୍ବାଧିକ ୮୬ ରନ (୯୪ ବଲ, ୪ ଚୌକା, ୪ ଛକା) ସଂଗ୍ରହ କରିଥିଲେ। ସେହିପରି ଜୟସୁଆଲ ୭୯ଟି ବଲର ସମ୍ମୁଖୀନ ହୋଇ ୫ ଚୌକା ଓ ୧ ଛକା ସହ ୫୪ ରନର ଅର୍ଦ୍ଧଶତକୀୟ ପାଳି ଖେଳିଥିଲେ। ଅଲରାଉଣ୍ଡର ବିଜୟ ଶଙ୍କର ୩୩ ବଲରୁ ୪ ଚୌକା ଓ ୨ ଛକା ସହ ୪୫, ନିତିଶ ରାଣା ୨୦, ପାର୍ଥିବ ୧୪, ବାବା ଅପରାଜିତ ୧୩ ରନ କରି ଆଉଟ ହୋଇଥିବା ବେଳେ ଗୋଥାମ ୩୫ ରନ କରି ଅପରାଜିତ ରହିଥିଲେ। ବୋଲିଂରେ ଭାରତ ସି’ ତରଫରୁ ଇଶାନ ପୋରେଲ ସର୍ବାଧିକ ୫, ସାକସେନା ଓ ଅକ୍ଷର ପଟେଲ ଗୋଟିଏ ଲେଖାଏ ଉଇକେଟ ଅକ୍ତିଆର କରିଥିଲେ।
ସଂକ୍ଷିପ୍ତ ସ୍କୋର:
ଭାରତ ବି’ ୫୦ ଓଭରରେ ୨୮୩/୭
(କେଦାର- ୮୬, ଜୟସୁଆଲ- ୫୪, ଶଙ୍କର- ୪୫, ଗୋଥାମ-୩୫*, ରାଣା- ୨୦, ପୋରେଲ- ୫/୪୩)।
ଭାରତ ସି’ ୫୦ ଓଭରରେ ୨୩୨/୯
(ଗର୍ଗ- ୭୪, ଅକ୍ଷର- ୩୮, ସାକସେନା- ୩୭*, ଅଗ୍ରଓ୍ବାଲ- ୨୮, ମାର୍କଣ୍ଡେ- ୨୭, ନଦୀମ- ୪/୩୨, ସିରାଜ- ୨/୪୩)।
