ଦିନକୁ ୨୦ ଲକ୍ଷ ଶ୍ରମଦିବସ ସୃଷ୍ଟି ହେବ
10:37 amMay 27, 2020 / 43

ଭୁବନେଶ୍ୱର,୨୭ା୫(ବ୍ୟୁରୋ): ମହାତ୍ମା ଗାନ୍ଧୀ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନାରେ ବର୍ତ୍ତମାନ ଦିନକୁ ୧୦ ଲକ୍ଷ ଶ୍ର୍ରମଦିବସ ସୃଷ୍ଟି ହୋଇଥିବା ବେଳେ ଏହାକୁ ୨୦ ଲକ୍ଷକୁ ବୃଦ୍ଧି କରିବାକୁ ଲକ୍ଷ୍ୟ ରଖାଯାଇଛି। ମୁଖ୍ୟ ଶାସନ ସଚିବ ଅସିତ କୁମାର ତ୍ରିପାଠୀ ସମୀକ୍ଷା ବୈଠକରେ ଏହି ସୂଚନା ଦେଇଛନ୍ତି। ସେ କହିଛନ୍ତି ଯେ, ବିଭିନ୍ନ ଜୋନ୍‌ ନିର୍ଣ୍ଣୟ କ୍ଷେତ୍ରରେ ପଞ୍ଚାୟତଗୁଡ଼ିକୁ ୟୁନିଟ୍‌ କରିବାରେ ଓଡ଼ିଶା ଦେଶର ଏକମାତ୍ର ରାଜ୍ୟ। ଏହା ଲକ୍‌ଡାଉନ, କ୍ୱାରାଣ୍ଟାଇନ ନିୟମ ପାଳନ କରିବାରେ ଯଥେଷ୍ଟ ସହାୟକ ହୋଇଛି। ଓଡ଼ିଶାରେ କ୍ୱାରାଣ୍ଟାଇନ ପାଇଁ ଯେତିକି ସୁବିଧା ଅଛି ତା’ର ମାତ୍ର ୩୦ ପ୍ରତିଶତ ବ୍ୟବହୃତ ହୋଇଛି। ତେଣୁ ଅଧିକ ପ୍ରବାସୀଙ୍କ ପାଇଁ କୌଣସି ସମସ୍ୟା ନାହିଁ ବୋଲି ସେ ସ୍ପଷ୍ଟ କରିଛନ୍ତି । ବର୍ତ୍ତମାନ ସୁଦ୍ଧା ୮୦ ହଜାର ପ୍ରବାସୀ ହୋମ କ୍ୱାରାଣ୍ଟାଇନକୁ ଯାଇସାରିଛନ୍ତି। ରାଜ୍ୟକୁ ଯେଉଁମାନେ ମାତ୍ର ୭୨ ଘଣ୍ଟା ପାଇଁ ଆସୁଛନ୍ତି ସେମାନଙ୍କୁ କୌଣସି କ୍ୱାରାଣ୍ଟାଇନ୍‌ରେ ରଖାଯିବ ନାହିଁ ବୋଲି ରାଜ୍ୟ ସରକାର ନିଷ୍ପତ୍ତି ନେଇଛନ୍ତି।
ବର୍ତ୍ତମାନ ୧୭ ଜିଲାରେ ୩.୮୫ ଲକ୍ଷ ମେଟ୍ରିକ ଟନ୍‌ ଧାନ ସଂଗ୍ରହ କରାଯାଇଛି। ଯାହା କି ଗତବର୍ଷ ଠାରୁ ୪୦ ପ୍ରତିଶତ ଅଧିକ। ଚାଷୀମାନଙ୍କ ଆକାଉଣ୍ଟକୁ ୫୨୧ କୋଟି ଟଙ୍କା ପ୍ରଦାନ କରାଯାଇଥିବା ମୁଖ୍ୟ ଶାସନ ସଚିବ ସୂଚନା ଦେଇଛନ୍ତି। କୋଭିଡ୍‌-୧୯ରେ ଓଡ଼ିଶାର ସୁସ୍ଥତା ହାର ୪୨.୭୮ ପ୍ରତିଶତ ରହିଛି। ଯାହା କି ଜାତୀୟ ହାରଠାରୁ ଭଲ ରହିଛି। ମୃତ୍ୟୁ ହାର ୦.୪୨ ପ୍ରତିଶତ। ରାଜ୍ୟର ବର୍ତ୍ତମାନ ୧୪ଟି ପରୀକ୍ଷାଗାରରେ ଟେଷ୍ଟିଂ କରାଯାଉଛି। ଟେଷ୍ଟିଂ କ୍ଷମତା ଦିନକୁ ୫୫୦୦କୁ ବୃଦ୍ଧି ପାଇଛି ବୋଲି ବୈଠକରେ ସୂଚନା ଦିଆଯାଇଛି। ସେହିପରି ୧୦୯ଟି ସ୍ବତନ୍ତ୍ର ଟ୍ରେନ୍‌ରେ ୧,୫୩,୭୩୮ ପ୍ରବାସୀ ରାଜ୍ୟରେ ପହଞ୍ଚିଛନ୍ତି।