ବରଗଡ଼ ଅଫିସ୍, ୨।୪: ଲକ୍ ଡାଉନ୍ ଦାଦନ ଶ୍ରମିକଙ୍କ ସମସ୍ୟାକୁ ବହୁଗୁଣିତ କରି ପକାଇଛି। ଏଭଳିସ୍ଥଳେ ସେମାନେ ନା ଘରକୁ ଫେରି ପାରୁଛନ୍ତି କିମ୍ବା ସାମାଜିକ ଦୂରତା ରଖି ଘର ମଧ୍ୟରେ ରହି ପାରୁଛନ୍ତି। ତେଲେଙ୍ଗାନାରେ ନିଜ ପିଲାଛୁଆଙ୍କ ସହିତ ବନ୍ଧା ପଡ଼ିଥିବା ୪୪ଶ୍ରମିକ ଇଟାଭାଟି ମାଲିକଙ୍କ ତାଗିଦ୍ ଯୋଗୁ ଅର୍ଦ୍ଧାହାରରେ ରହି ଖରାତାତିରେ ଇଟା ଗଢ଼ି ନିର୍ଯାତିତ ଜୀବନ କାଟୁଥିବା ସୂଚନା ମିଳିଛି । ତେଲେଙ୍ଗାନାର କିସାରା ମଣ୍ଡଳ ବୋମ୍ମାଲା ରମାରମ ଥାନା କେଶବପୁର ଗ୍ରାମ ହନୁମାନ ମନ୍ଦିର ପାଖରେ ରହିଥିବା ଏକ ଇଟାଭାଟିକୁ ବରଗଡ଼ ଜିଲା ପାଇକମାଲ ଥାନା ଭେଙ୍ଗରାଜପୁର, ସାଲେପାଲି, ଝେଙ୍ଗନାଡିହି ଗ୍ରାମର ୭ଜଣ ଏବଂ ନୂଆପଡ଼ା ଜିଲା ବୋଡ଼େନ, କୋଟଗାଁ, ପାତଲଗଙ୍ଗା, ଦର୍ଲିପଡ଼ା ଆଦି ଗ୍ରାମର ଶ୍ରମିକମାନେ ଜଣେ ମଧ୍ୟସ୍ଥଙ୍କ ପ୍ରଲୋଭନରେ ପଡ଼ି ନିଜ ପିଲାଛୁଆ ଧରି ଦୀର୍ଘଦିନ ପୂର୍ବରୁ ଦାଦନ ଖଟିବାକୁ ଯାଇଛନ୍ତି । ଲକ୍ ଡାଉନ୍ କଟକଣା ଲାଗୁ ପରେ ସେଠାରେ ଦୋକାନ, ବଜାର ବନ୍ଦ ହୋଇ ପଡ଼ିଛି । ସେହିପରି ଇଟାଭାଟି ମାଲିକ ୪କିଗ୍ରା ଲେଖାଏଁ ଚାଉଳ ଦେଉଥିଲେ ସୁଦ୍ଧା ତାହା ସମୁଦ୍ରକୁ ଶଙ୍ଖେ ଭଳି ହୋଇଛି । ଫଳରେ ସେମାନଙ୍କୁ ବର୍ତ୍ତମାନ ଅଧିକାଂଶ ସମୟରେ ଭୋକିଲା କିମ୍ବା ଅର୍ଦ୍ଧାହାରରେ ରହିବାକୁ ପଡ଼ୁଛି । ଅପରପକ୍ଷେ ଏଭଳି ସ୍ଥିତିରେ ସମ୍ପୃକ୍ତ ଶ୍ରମିକମାନଙ୍କୁ ଇଟାଗଢ଼ା କାମରୁ ନିସ୍ତାର ମିଳିନାହିଁ। ଇଟାଭାଟି ମାଲିକ ସେମାନଙ୍କୁ ଇଟାଗଢ଼ା କାମରେ ଖଟାଉଛନ୍ତି । ଏ ସମ୍ପର୍କରେ ସୂଚନା ପାଇବା ପରେ ବରଗଡ଼ର ଜଣେ ସାମାଜିକ କର୍ମୀ ରଞ୍ଜିତା ପ୍ରିୟଦର୍ଶିନୀ ଆଇଜି ଅମିତାଭ ଠାକୁରଙ୍କ ସମେତ ବରଗଡ଼, ନୂଆପଡ଼ା ଜିଲାପାଳଙ୍କୁ ସେ ନେଇ ଦୃଷ୍ଟି ଆକର୍ଷଣ କରିଥିଲେ। ଏହାସତ୍ତ୍ବେ ସମ୍ପୃକ୍ତ ଶ୍ରମିକମାନଙ୍କ ପାଖକୁ ରନ୍ଧାଖାଦ୍ୟ ଭଳି କୌଣସି ସରକାରୀ ସହାୟତା ପହଞ୍ଚି ପାରିନାହିଁ। ଫଳରେ ଗୁରୁବାର ସେ ଏ ଦିଗରେ ବିହିତ ପଦକ୍ଷେପ ନେବା ସହିତ ତେଲେଙ୍ଗାନାରେ ଭୋକିଲା ରହିଥିବା ଓଡ଼ିଆ ଶ୍ରମିକଙ୍କ ପେଟକୁ ଆହାର ମୁଠାଏ ଯୋଗାଇ ଦେବା ପାଇଁ ସେ ରାଜ୍ୟ ଶ୍ରମମନ୍ତ୍ରୀ ସୁଶାନ୍ତ ସିଂଙ୍କୁ ଜଣାଇଛନ୍ତି ବୋଲି ରଞ୍ଜିତା ପ୍ରକାଶ କରିଛନ୍ତି ।
