ବାରିପଦା ଅଫିସ,୧୩ା୧୧- ବାରିପଦା ପୌର ପରିଷଦରେ ନିର୍ବାଚିତ ବୋର୍ଡର କାର୍ଯ୍ୟକାଳ ଗତ ଫେବୃୟାରୀରୁ ସରିଯାଇଥିବା ବେଳେ ବର୍ତ୍ତମାନ ଏହା ଜିଲା ପ୍ରଶାସନ ଦ୍ୱାରା ପରିଚାଳିତ ହେଉଛି। ତେବେ ଅଧିକାରୀମାନେ ଠିକ୍ ଭାବେ ପୌର ପରିଷଦକୁ ପରିଚାଳନା କରିପାରୁ ନ ଥିବା ବେଳେ ଅଭିଯୋଗ ଶୁଣିବାକୁ ମଧ୍ୟ କେହି ନାହାନ୍ତି। ମଙ୍ଗଳବାର ଏଭଳି ଅଭିଯୋଗ କରିବା ସହିତ ଦରମା ଦାବିରେ ସଫେଇ କର୍ମଚାରୀମାନେ କାର୍ଯ୍ୟବନ୍ଦ ଆନ୍ଦୋଳନ କରିଛନ୍ତି। ସଫେଇ କାର୍ଯ୍ୟ ଦାୟିତ୍ୱରେ ଥିବା ପୌର ପରିଷଦର କର୍ମଚାରୀଙ୍କୁ ଆନ୍ଦୋଳନକାରୀମାନେ ଦୀର୍ଘ ସମୟ ଧରି ଅଟକ ରଖିଥିଲେ। ଅପରାହ୍ନ ୩ ଟା ସୁଦ୍ଧା କୌଣସି ସମାଧାନ ନ ହେବାରୁ ଆନ୍ଦୋଳନ ଜାରି ରହିବ ଏବଂ ଦରମା ପାଇବା ପରେ ହିଁ ସଫେଇ କାର୍ଯ୍ୟ ଆରମ୍ଭ କରିବେ ବୋଲି କର୍ମଚାରୀମାନେ କହିଛନ୍ତି।
ସୂଚନା ଅନୁଯାୟୀ, ବାରିପଦା ସହରର ସଫେଇ ଦାୟିତ୍ୱ ଏକ ଘରୋଇ ସଂସ୍ଥାକୁ ପୌର କର୍ତ୍ତୃପକ୍ଷ ପ୍ରଦାନ କରିଛନ୍ତି। ଉକ୍ତ ସଂସ୍ଥା ମାସର ପ୍ରଥମ ସପ୍ତାହରେ ସଫେଇ କର୍ମଚାରୀଙ୍କ ଦରମା ପ୍ରଦାନ କରିବା କଥା । ହେଲେ ସଂସ୍ଥା ଦୀର୍ଘ ଦିନ ହେବ ଦରମା ପ୍ରଦାନ କରିନାହିଁ। ଏହାର ପ୍ରତିବାଦରେ ସମସ୍ତ ସଫେଇ କର୍ମଚାରୀ ସଫେଇ କାର୍ଯ୍ୟ ବନ୍ଦ କରି ପୌର ପରିଷଦ ଆଗରେ ଧାରଣାରେ ବସିଥିଲେ। ମଙ୍ଗଳବାର ଛୁଟି ଥିବା ବେଳେ ଏଠାରେ କୌଣସି ବରିଷ୍ଠ ଅଧିକାରୀ ଉପସ୍ଥିତ ନ ଥିଲେ। ଫଳରେ ଏହି କର୍ମଚାରୀମାନେ ପୌର ପରିଷଦର ବରିଷ୍ଠ ଅଧିକାରୀମାନଙ୍କୁ ଫୋନ ଯୋଗେ ଯୋଗାଯୋଗ କରିଥିଲେ। କେହି ଫୋନ ନ ଧରିବାରୁ ପରିସ୍ଥିତି ଜଟିଳ ହୋଇଥିଲା। ପରେ ପୋଲିସ ଆସି ସଫେଇ କର୍ମଚାରୀଙ୍କୁ ବୁଝାସୁଝା କରିଥିଲେ ମଧ୍ୟ ସେମାନେ ସେମାନେ ଜିଦରେ ଅଟଳ ରହିଥିଲେ।
ଅନ୍ୟପକ୍ଷେ ସଫେଇ ସଂସ୍ଥା, ପୌର ପରିଷଦ ସହିତ କରିଥିବା ଚୁକ୍ତି ପୂରଣ କରି ନ ଥିବାରୁ ସଫେଇ କାର୍ଯ୍ୟର ବିଲ୍ ହୋଇ ପାରିନାହିଁ। ଫଳରେ ସଫେଇ କର୍ମଚାରୀମାନେ ଦରମା ପାଇ ପାରି ନ ଥିବା ଜଣାପଡିଛି। ସଫେଇ ପାଇଁ ଆବଶ୍ୟକ କର୍ମଚାରୀ ହିସାବରେ କମ୍ ସଂଖ୍ୟକ କର୍ମଚାରୀଙ୍କୁ ନେଇ ଏହି କାର୍ଯ୍ୟ କରାଯାଉଛି। ଏନେଇ ସଫେଇ କାର୍ଯ୍ୟ ଠିକ ଭାବେ ହୋଇ ପାରୁନାହିଁ। ସଫେଇ କର୍ମଚାରୀଙ୍କ ପାଇଁ ବାୟୋମ୍ୟାଟ୍ରିକ୍ସ ଉପସ୍ଥାନ ବ୍ୟବସ୍ଥା ରହିବା କଥା। ମାତ୍ର ସଂସ୍ଥା ଏଥିପ୍ରତି ଗୁରୁତ୍ୱ ଦେଉନାହିଁ। ଚୁକ୍ତି ମୁତାବକ ସଫେଇ କର୍ମଚାରୀମାନେ ସମସ୍ତ ୱାର୍ଡର ଘରକୁ ଘର ଯାଇ ଟ୍ରଲି ଦ୍ୱାରା ୨ ଓଳି ଅଳିଆ ସଂଗ୍ରହ କରିବେ। ଏହା ମଧ୍ୟ ହେଉନାହିଁ। ସେହିପରି ସଫେଇ କାର୍ଯ୍ୟରେ ୧୬ ଟି ଏଲସିଭି ଗାଡି, ୪ ଟି ଟ୍ରାକ୍ଟର ଓ ୫୧ଟି ଠେଲା ଗାଡି ରହିବା ଜରୁରୀ। ମାତ୍ର ସଂସ୍ଥା ନିକଟରେ ଆବଶ୍ୟକ ସଂଖ୍ୟକ ଗାଡି ନ ଥିବାରୁ ସଫେଇ କାର୍ଯ୍ୟରେ ବାଧା ଉପୁଜୁଛି। ସପ୍ତାହର ୭ ଦିନ ଦୁଇ ଓଳି ସଫେଇ କାର୍ଯ୍ୟ କରିବାକୁ ଚୁକ୍ତି ହୋଇଥିବା କେବଳ ରବିବାର ଦିନ ହିଁ କିଛି ସ୍ଥାନରେ ଦୁଇ ଓଳି ସଫେଇ କାର୍ଯ୍ୟ କରାଯାଉଛି। ସେହିପରି ସଂସ୍ଥା ପକ୍ଷରୁ ସଫେଇ କର୍ମଚାରୀମାନଙ୍କୁ ଆନୁସଙ୍ଗିକ ସୁରକ୍ଷା ସାମଗ୍ରୀ ପ୍ରଦାନ କରାଯାଇ ନ ଥିବାରୁ ସେମାନେ ଅସୁରକ୍ଷିତ ଭାବେ କାର୍ଯ୍ୟ କରୁଛନ୍ତି। ଏହି ଭଳି ବିଭିନ୍ନ ଚୁକ୍ତି ଖିଲାପ କରିଥିବାରୁ ପୌର କର୍ତ୍ତୃପକ୍ଷ ଉକ୍ତ ସଂସ୍ଥାର ବିଲ କରୁ ନାହାନ୍ତି। ଏନେଇ ଜିଲାପାଳ ତୁରନ୍ତ ଦୃଷ୍ଟି ଦେଇ ଚୁକ୍ତି ଖିଲାପ କରିଥିବା ସଂସ୍ଥା ବିରୋଧ କାର୍ଯ୍ୟାନୁଷ୍ଠାନ ନେବା ସହିତ ସଫେଇ କର୍ମଚାରୀମାନଙ୍କୁ ଦରମା ପ୍ରଦାନ କରିବା ପାଇଁ ସେମାନେ ଦାବି କରିଛନ୍ତି ।
