କାଠମାଣ୍ଡୁ,୪।୧୨(ପି.ଟି.)- ଚଳିତ ଦକ୍ଷିଣ ଏସିଆ ଗେମ୍ସର ଦ୍ୱିତୀୟ ଦିନରେ ଦେଶକୁ ଗର୍ବିତ କରିଛନ୍ତି ଓଡ଼ିଆ ଶୁଟର ଶ୍ରୀୟଙ୍କା ଷଡ଼ଙ୍ଗୀ। ସେ ୧୦ ମିଟର ରାଇଫଲ ଇଭେଣ୍ଟରେ ରୌପ୍ୟ ପଦକ ଜିତିଛନ୍ତି। ତାଙ୍କ ପଦକ ସମେତ ଭାରତ ମଙ୍ଗଳବାର ୨୭ ପଦକ ଜିତିଛି। ଆଥ୍ଲେଟିକ୍ସର ପ୍ରଥମ ଦିନ ଭାରତକୁ ୧୦ ପଦକ (୪ ସ୍ବର୍ଣ୍ଣ, ୪ ରୌପ୍ୟ ଓ ୨ ବ୍ରୋଞ୍ଜ) ଓ ଶୁଟିଂରେ ୯ ପଦକ (୪ ସ୍ବର୍ଣ୍ଣ, ୪ ରୌପ୍ୟ ଓ ଗୋଟିଏ ବ୍ରୋଞ୍ଜ) ମିଳିଛି। ଉଭୟ ଭଲିବଲ ପୁରୁଷ ଓ ମହିଳା ଦଳଗତ ଇଭେଣ୍ଟରେ ସ୍ବର୍ଣ୍ଣ ଓ ଟାଏକୋଣ୍ଡୋ ଖେଳାଳିମାନେ ଏକ ସ୍ବର୍ଣ୍ଣ ସହ ୩ ବ୍ରୋଞ୍ଜ ଆଣି ଦେଇଛନ୍ତି। ପୁରୁଷ ଓ ମହିଳା ଦଳଗତ ଟେବୁଲ ଟେନିସରେ ମଧ୍ୟ ଶୀର୍ଷ ସ୍ଥାନ ଅଧିକାର କରିଛନ୍ତି। ଭାରତ ଏବେ ମୋଟ ୪୩ ପଦକ (୧୮ ସ୍ବର୍ଣ୍ଣ, ୧୬ ରୌପ୍ୟ ଓ ୯ ବ୍ରୋଞ୍ଜ) ସହ ଦ୍ୱିତୀୟ ସ୍ଥାନରେ ରହିଛି। ସର୍ବାଧିକ ୪୪ ପଦକ ରଖିଥିବା ଆୟୋଜକ ନେପାଳ ଶୀର୍ଷରେ ରହିଛି।
ଭାରତୀୟ ଶୁଟରମାନେ ମହିଳା ୧୦ ମି. ଏୟାର ରାଇଫଲ ଇଭେଣ୍ଟରେ ପଦକ ପୋଛି ନେଇଛନ୍ତି। ମେହୁଲି ଘୋଷ ସ୍ବର୍ଣ୍ଣ ପଦକ ସହ ବିଶ୍ୱ ରେକର୍ଡଠାରୁ ଭଲ ପ୍ରଦର୍ଶନ କରିଛନ୍ତି। କିନ୍ତୁ ତାଙ୍କ ପ୍ରଦର୍ଶନକୁ ବିଶ୍ୱ ରେକର୍ଡ ବୁକ୍କୁ ନିଆଯିବ ନାହିଁ। କାରଣ ଦକ୍ଷିଣ ଏସିଆନ ଗେମ୍ସର ଫଳାଫଳକୁ ଅନ୍ତର୍ଜାତୀୟ ପରିଚାଳନା ସଂସ୍ଥା (ଆଇଏସ୍ଏସ୍ଏଫ୍) ରେକର୍ଡ ଭାବେ ଗ୍ରହଣ କରେ ନାହିଁ। ୧୯ ବର୍ଷୀୟା ମେହୁଲି ସର୍ବାଧିକ ୨୫୩.୩ ସ୍କୋର ସହ ସ୍ବର୍ଣ୍ଣ ପଦକ ଜିତିଥିଲେ। ସେ ଏବେକାର ବିଶ୍ୱ ରେକର୍ଡଠାରୁ ୦.୪ ଅଧିକ ସ୍କୋର କରିଛନ୍ତି। ବର୍ତ୍ତମାନ ଅନ୍ୟ ଭାରତୀୟ ଶୁଟର ଅପୂର୍ବୀ ଚଣ୍ଡେଲା(୨୫୨.୯)ଙ୍କ ନାମରେ ବିଶ୍ୱ ରେକର୍ଡ ରହିଛି। ଶ୍ରୀୟଙ୍କା ଷଢ଼ଙ୍ଗି (୨୫୦.୮) ରୌପ୍ୟ ଓ ଶ୍ରେୟା ଅଗ୍ରଓ୍ବାଲ (୨୨୭.୨) ବ୍ରୋଞ୍ଜ ପଦକ ଜିତିଛନ୍ତି। ୧୦ ମି. ଏୟାର ରାଇଫଲ ଦଳଗତ ଇଭେଣ୍ଟରେ ମଧ୍ୟ ଭାରତ ଶୀର୍ଷ ସଫଳତା ପାଇଛି। ଆଥ୍ଲେଟିକ୍ସ ପ୍ରଥମ ଦିନ ଅର୍ଚ୍ଚନା ସୁସିନ୍ଦ୍ରାନ (ମହିଳା ୧୦୦ ମି.), ଏମ୍. ଜାଶନା (ମହିଳା ହାଇ ଜମ୍ପ) ସରଭେଶ ଅନିଲ କୁଶାରେ (ପୁରୁଷ ହାଇ ଜମ୍ପ), ଅଜୟ କୁମାର ସରୋଜ (ପୁରୁଷ ୧୫୦୦ ମି.), ଯୋଗେଶ ସିଂ (୨୫ ମି. ସେଣ୍ଟର ଫାୟର ପିସ୍ତଲ) ଓ ଚେଇନ ସିଂ (୫୦ ମି. ୩ପି) ସ୍ବର୍ଣ୍ଣ ପଦକ ହାସଲ କରିଛନ୍ତି। ଭଲିବଲରେ ପାକିସ୍ତାନକୁ ୩-୧ (୨୦-୨୫, ୨୫-୧୫, ୨୫-୧୭ ଓ ୨୯-୨୭) ସେଟରେ ଭାରତୀୟ ପୁରୁଷ ଦଳ ଚାମ୍ପିୟନ ହୋଇଛି। ଟେବୁଲ ଟେନିସରେ ଭାରତ ପୁରୁଷ ବିଭାଗରେ ନେପାଳ ଓ ମହିଳା ବିଭାଗରେ ଶ୍ରୀଲଙ୍କାକୁ ହରାଇ ସ୍ବର୍ଣ୍ଣ ପଦକ ଜିତିଛି।
