ନୂଆଦିଲ୍ଲୀ,୨୬।୭:ତତ୍କାଳ ତିନି ତଲାକ୍କୁ ବେଆଇନ ଏବଂ ଦଣ୍ଡନୀୟ ଅପରାଧରେ ପରିଣତ କରିବା ଲାଗି ସରକାର ଆଣିଥିବା ବିଲ୍ ଗୁରୁବାର ଲୋକ ସଭାରେ ଗୃହୀତ ହୋଇଯାଇଛି। ବିଲ୍ ସପକ୍ଷରେ ୩୦୩ ଭୋଟ ପଡିଥିବାବେଳେ ବିପକ୍ଷରେ ୮୨ ଏମ୍ପି ଭୋଟ ଦେଇଥିଲେ। ବିରୋଧୀମାନେ ଆଣିଥିବା ଏକାଧିକ ସଂଶୋଧନ ପ୍ରସ୍ତାବ କାଟ୍ ଖାଇଯାଇଥିଲା। ତିନି ତଲାକ୍ ଦେଉଥିବା ସ୍ବାମୀଙ୍କୁ ୩ ବର୍ଷ ପର୍ଯ୍ୟନ୍ତ ଜେଲ୍ଦଣ୍ଡ ଦେବାର ବ୍ୟବସ୍ଥା ବିଲ୍ରେ ରହିଛି। ଉକ୍ତ ପ୍ରସ୍ତାବ ସପକ୍ଷରେ ୩୦୨ ଭୋଟ ମିଳିଥିବାବେଳେ ବିରୋଧରେ ୭୮ ଭୋଟ ଯାଇଥିଲା। ବିଲ୍କୁ ବିରୋଧ କରି ଜେଡିୟୁ, ଟିଏମ୍ସି ଏବଂ କଂଗ୍ରେସ ଏମ୍ପିମାନେ କକ୍ଷତ୍ୟାଗ କରିଥିଲେ। ମୁସଲମାନ ମହିଳା (ବିବାହ ଅଧିକାର ସୁରକ୍ଷା)ବିଲ୍, ୨୦୧୯ ବା ତିନି ତଲାକ ବିଲ୍ ଏବେ ରାଜ୍ୟ ସଭାର ଅନୁମୋଦନ ପାଇଁ ପଠାଯିବ।
ଏବେ ଅଧ୍ୟାଦେଶ ମାଧ୍ୟମରେ ତିନି ତଲାକକୁ ନିଷିଦ୍ଧ କରାଯାଇଛି। ଆଇନ ମନ୍ତ୍ରୀ ରବିଶଙ୍କର ପ୍ରସାଦ ବିଲ୍ ଉପରେ ଆଲୋଚନା ଆରମ୍ଭ କରି ଏଭଳି ଆଇନ ଜରୁରୀ ବୋଲି କହିଥିଲେ। ସୁପ୍ରିମକୋର୍ଟ ତିନି ତଲାକକୁ ବେଆଇନ କହିବା ସହିତ ଏଥିପାଇଁ ଆଇନ ଆଣିବା ଲାଗି ନିର୍ଦ୍ଦେଶ ଦେଇଥିଲେ। ୨୦୧୭ ଜାନୁୟାରୀରୁ ଇତିମଧ୍ୟରେ ୫୭୪ଟି ତିନି ତଲାକ ଘଟଣା ଘଟିଲାଣି। ଲିଙ୍ଗଗତ ସମାନତା ଏବଂ ନ୍ୟାୟ ପାଇଁ ଆଇନର ଆବଶ୍ୟକତା ରହିଛି, ଏହାକୁ ସଙ୍କୀର୍ଣ୍ଣ ଧର୍ମୀୟ ଦୃଷ୍ଟିକୋଣରେ ଦେଖାଯିବା ଉଚିତ ନୁହେଁ ବୋଲି ରବିଶଙ୍କର କହିଥିଲେ। ଆଇନର ସମ୍ଭାବ୍ୟ ଅପବ୍ୟବହାରକୁ ରୋକିବା ଲାଗି ବିଚାର ପୂର୍ବରୁ ଅଭିଯୁକ୍ତଙ୍କୁ ଜାମିନ ପ୍ରଦାନର ବ୍ୟବସ୍ଥା ନୂଆ ବିଲ୍ରେ ରହିଛି। ସ୍ତ୍ରୀଙ୍କ ଅଭିଯୋଗ ଶୁଣିବା ପରେ ମାଜିଷ୍ଟ୍ରେଟ ଜାମିନ ପ୍ରଦାନ କରିପାରିବେ।
ଦେଶର ମୁସଲମାନ ସମ୍ପ୍ରଦାୟକୁ ଟାର୍ଗେଟରେ ରଖି ସରକାର ବିଲ୍ ଆଣିଥିବା ଅଭିଯୋଗ କରି କଂଗ୍ରେସ ଏହାର ସମୀକ୍ଷା ପାଇଁ ଷ୍ଟାଣ୍ଡିଂ କମିଟିକୁ ପଠାଇବା ନିମନ୍ତେ ଦାବି କରିଥିଲା। ଏନ୍ଡିଏର ଅନ୍ୟତମ ସହଯୋଗୀ ଦଳ ଜେଡିୟୁ ବିଲ୍କୁ ବିରୋଧ କରି କକ୍ଷତ୍ୟାଗ କରିଥିଲା। ଏଭଳି ଆଇନ ସମାଜରେ ଅବିଶ୍ୱାସ ସୃଷ୍ଟି କରିବ। ତେଣୁ ତାଙ୍କ ଦଳ ତିନି ତଲାକ୍ ବିଲ୍କୁ ସମର୍ଥନ ଦେବ ନାହିଁ ବୋଲି ଜେଡିୟୁ ଏମ୍ପି ରାଜୀବ ରଞ୍ଜନ ସିଂ କହିଥିଲେ।
