ନୂଆଦିଲ୍ଲୀ,୨୬।୭(ପି.ଟି.):ସୂଚନା ଅଧିକାର ଆଇନ (ସଂଶୋଧନ) ବିଲ୍ ପାର୍ଲାମେଣ୍ଟର ଅନୁମୋଦନ ଲାଭ କରିଛି। ୨୨ ତାରିଖରେ ବିଲ୍ ଲୋକ ସଭାରେ ଗୃହୀତ ହୋଇଥିବାବେଳେ ଗୁରୁବାର ରାଜ୍ୟ ସଭାରେ ପାରିତ ହୋଇଯାଇଛି। ଅଧିକ ଯାଞ୍ଚ ପାଇଁ ବିଲ୍କୁ ଗୃହ କମିଟିକୁ ପଠାଇବାକୁ ବିରୋଧୀ ଦଳ ଆଣିଥିବା ପ୍ରସ୍ତାବ କାଟ୍ ଖାଇଯାଇଥିଲା। ପ୍ରସ୍ତାବ ବିରୋଧରେ ୧୧୭ ଭୋଟ ପଡ଼ିଥିବାବେଳେ ସପକ୍ଷରେ ୭୫ ଭୋଟ ଯାଇଥିଲା। ଗୁରୁବାର ଘଟଣାରୁ ରାଜ୍ୟ ସଭାରେ ବିରୋଧୀ ଦଳର କ୍ଷମତା ହ୍ରାସ ପାଇଥିବା ସ୍ପଷ୍ଟ ହୋଇଯାଇଛି। ଯାହା ଫଳରେ ସଂଖ୍ୟାଗରିଷ୍ଠତା ନ ଥାଇ ସରକାର ବିଭିନ୍ନ ବିଲ୍କୁ ଗୃହୀତ କରାଇ ନେଉଛନ୍ତି।
ସଂଶୋଧିତ ବିଲ୍ ଅନୁଯାୟୀ ସୂଚନା କମିଶନରମାନଙ୍କ କାର୍ଯ୍ୟକାଳ, ବେତନ ଓ ଅନ୍ୟାନ୍ୟ ସର୍ତ୍ତାବଳୀ ସରକାର ଧାର୍ଯ୍ୟ କରିବେ। ବର୍ତ୍ତମାନର ଆଇନରେ ସୂଚନା କମିଶନରଙ୍କ କାର୍ଯ୍ୟକାଳ ୫ ବର୍ଷ ରହିଥିବାବେଳେ ସଂଶୋଧିତ ବିଲ୍ରେ ଏହାକୁ ୩ ବର୍ଷ ହ୍ରାସ କରାଯିବା ପ୍ରସ୍ତାବ ରହିଛି। ବିଲ୍କୁ କଂଗ୍ରେସ, ବାମଦଳ ଏବଂ ତୃଣମୂଳ କଂଗ୍ରେସ ପକ୍ଷରୁ ବିରୋଧ କରାଯାଇଥିଲା।
ପ୍ରଧାନମନ୍ତ୍ରୀ ନରେନ୍ଦ୍ର ମୋଦିଙ୍କ ବିମୁଦ୍ରୀକରଣର ପର୍ଦ୍ଦାଫାଶ୍ ଏବଂ ଶିକ୍ଷାଗତ ଯୋଗ୍ୟତା ଜଣାପଡିଯିବା ପରେ ପ୍ରତିଶୋଧ ନେବା ପାଇଁ ସରକାର ଆର୍ଟିଆଇ ଆଇନରେ ସଂଶୋଧନ ଆଣୁଛନ୍ତି ବୋଲି କଂଗ୍ରେସ ନେତା ଜୟରାମ ରମେଶ ଅଭିଯୋଗ କରିଛନ୍ତି। ଏହା ବ୍ୟତୀତ ଜାଲ୍ ରାଶନ୍ କାର୍ଡର ପ୍ରକୃତ ସଂଖ୍ୟା ଧରାପଡିଯିବା ଏବଂ ବିଦେଶରୁ ଅଣାଯାଇଥିବା କଳାଧନ ପରିମାଣର ଖୁଲାସା ଓ ଖିଲାପୀଙ୍କ ତାଲିକା ଦାଖଲ ପାଇଁ କେନ୍ଦ୍ରୀୟ ସୂଚନା କମିଶନର (ସିଆଇସି) ନିର୍ଦ୍ଦେଶ ଦେବା ପରେ ସରକାର ପ୍ରତିଶୋଧପରାୟଣ ହୋଇପଡିଛନ୍ତି। ସିଆଇସିକୁ କ୍ଷମତାହୀନ କରିଦେବା ବିଲ୍ର ପ୍ରକୃତ ଉଦ୍ଦେଶ୍ୟ ବୋଲି ରମେଶ ରାଜ୍ୟ ସଭାରେ କହିଥିଲେ।
ବିଲ୍ ଉପରେ ଆଲୋଚନା ଚାଲିଥିବାବେଳେ ଭାଜପା ଅଣ ଏନ୍ଡିଏ ଦଳ ଯଥା ଓ୍ବାଇଏସ୍ଆର କଂଗ୍ରେସ, ଟିଆର୍ଏସ୍, ବିଜେଡିର ସମର୍ଥନ ହାସଲ କରିବାରେ ସକ୍ଷମ ହୋଇଥିଲା। ବିଲ୍କୁ ନେଇ ବିଜେଡିର କେତେକ ଭିନ୍ନମତ ରହିଛି, ସରକାରଙ୍କ ପାଖରୁ ଦୃଢ଼ ପ୍ରତିଶ୍ରୁତି ପାଇବା ପରେ ଦଳ ଏହା ସମର୍ଥନକୁ ନେଇ ବିଚାର କରିବ ବୋଲି ବିଜେଡି ଏମ୍ପି ସସ୍ମିତ ପାତ୍ର ସ୍ପଷ୍ଟ କରିଦେଇଥିଲେ। ସଂଶୋଧନ ବିଲ୍ରେ କୌଣସି ଭୁଲ୍ ନାହିଁ। ଓ୍ବାଇଏସ୍ଆର୍ କଂଗ୍ରେସ ଏହାକୁ ସମର୍ଥନ ଦେବ ବୋଲି ଏହାର ସଦସ୍ୟ ଭି. ବିଜୟସାଇ ରେଡ୍ଡୀ କହିଥିଲେ। ସେହିପରି ଟିଆର୍ଏସ୍ର କେ. କେଶବ ରାଓ ବିଲ୍କୁ ସମର୍ଥନ ଜଣାଇଥିଲେ।
