ଢେଙ୍କାନାଳ ଅଫିସ, ୭।୮-ରାଜ୍ୟ ସରକାରଙ୍କ ଜାଗା ମିଶନ ପାଇଲଟ୍ ପ୍ରୋଜେକ୍ଟରେ ସାମିଲ ହୋଇଛି ଢେଙ୍କାନାଳ ପୌରାଞ୍ଚଳ। ଏହାପରେ ସହରର ରୂପରେଖ ସାଙ୍ଗକୁ ଢାଞ୍ଚାଗତ ପରିବର୍ତ୍ତନ ଲାଗି ପ୍ରୟାସ ଆରମ୍ଭ ହୋଇଛି। ଏହି ଯୋଜନାରେ ଡ୍ରେନେଜ୍ ବ୍ୟବସ୍ଥା, ରାସ୍ତା ନିର୍ମାଣ, ବସ୍ତି ବାସିନ୍ଦାଙ୍କ ଥଇଥାନକୁ ଅଗ୍ରାଧିକାର ଦିଆଯିବ। ଏଥିଲାଗି ବିଶେଷଜ୍ଞଙ୍କ ପରାମର୍ଶ ଲୋଡ଼ିଛନ୍ତି ରାଜ୍ୟ ସରକାର। ଏହିକ୍ରମରେ ଗୃହ ଓ ନଗର ଉନ୍ନୟନ ବିଭାଗ ସଚିବଙ୍କ ପରାମର୍ଶକ୍ରମେ ବିଶ୍ୱର ଖ୍ୟାତନାମା ଆର୍କିଟେକ୍ଟ ସଂସ୍ଥା ନର୍ମାନ ଫଷ୍ଟର ଫାଉଣ୍ଡେଶନ ପକ୍ଷରୁ ସ୍ପେନ୍ ଏବଂ ଇଂଲଣ୍ଡର ୩ଜଣିଆ ଆର୍କିଟେକ୍ଟ ଦଳ ଦୁଇଦିନିଆ ଗସ୍ତରେ ଆସି ସ୍ଥିତି ସମୀକ୍ଷା କରିଛନ୍ତି।
ଉକ୍ତ ପ୍ରତିନିଧି ଦଳରେ ରୋସିଓ କୋନେସା ସାଞ୍ଚେଜ୍, ଚାର୍ଲସ ଡେଭିଡ୍ ପାମର, ଅଭିଜିତ୍ ଚାନ୍ଦେଲ ରହିଥିଲେ। ଅଧିକାରୀମାନେ ପୌରାଞ୍ଚଳର ବିବାଦୀୟ ସ୍ଥାନରେ ଗଢ଼ି ଉଠିଥିବା ବସ୍ତି ଅଞ୍ଚଳ ପରିଦର୍ଶନ କରିଛନ୍ତି। ସମ୍ପୃକ୍ତ ବସ୍ତିବାସିନ୍ଦାଙ୍କୁ ସରକାରୀ ଜମିରେ ଥଇଥାନ କରାଯିବାକୁ ଲକ୍ଷ୍ୟ ରଖାଯାଇଛି। ସେମାନଙ୍କୁ ହାତପାହାନ୍ତାରେ ଯେପରି ମୌଳିକ ସୁବିଧାସୁଯୋଗ ମିଳିପାରିବ ତାକୁ ପ୍ରାଧାନ୍ୟ ଦିଆଯାଉଛି।
