ଢେଙ୍କାନାଳ ଅଫିସ, ୨୮।୯
ଜଳସମ୍ପଦ ଏବଂ ସୂଚନା ଓ ଲୋକସମ୍ପର୍କ ମନ୍ତ୍ରୀ ରଘୁନନ୍ଦନ ଦାସ ଶୁକ୍ରବାର ଢେଙ୍କାନାଳ ଗସ୍ତରେ ଆସି ସ୍ଥାନୀୟ ସର୍କିଟ ହାଉସ୍ରେ ବିଭାଗୀୟ କାର୍ଯ୍ୟର ସମୀକ୍ଷା କରିଛନ୍ତି। ଜିଲାରେ ଅଧିକ ଚାଷ ଜମିକୁ ଜଳସେଚନ କରିବାକୁ ମନ୍ତ୍ରୀ ବିଭାଗୀୟ ଯନ୍ତ୍ରୀମାନଙ୍କୁ ନିର୍ଦ୍ଦେଶ ଦେଇଛନ୍ତି।
ରେଙ୍ଗାଳି ବାମ କେନାଲ ଦ୍ୱାରା ୧୦,୩୫୬ ହେକ୍ଟର ଜମିକୁ ପାଣି ଯୋଗାଇବାକୁ ଲକ୍ଷ୍ୟ ଧାର୍ଯ୍ୟ ହୋଇଥିଲା। ଅଦ୍ୟାବଧି ୨୪୦୫ ହେକ୍ଟର ଜମିରେ ପାଣି ପହଞ୍ଚତ୍ଛି। ସେହିପରି ରେଙ୍ଗାଳି ଦକ୍ଷିଣ କେନାଲ ପ୍ରଣାଳୀ ଦ୍ୱାରା ୩୩,୧୧୫ ହେକ୍ଟର ଜମିରେ ଜଳସେଚନ ଲକ୍ଷ୍ୟଧାର୍ଯ୍ୟ କରାଯାଇଥିବାବେଳେ ଅଗଷ୍ଟ ୩୧ ସୁଦ୍ଧା ୧୫,୨୦୯ ହେକ୍ଟର ଜମିରେ ଜଳସେଚନର ସୁବିଧା ହୋଇପାରିଛି। ରେଙ୍ଗାଳି ଦକ୍ଷିଣ କେନାଲ ସମଲ ବ୍ୟାରେଜରୁ ୯୫କିମି ଯାଏ ପାଣି ଯୋଗାଉଛି। ଏହି କେନାଲ ଦ୍ୱାରା ଅନୁଗୋଳ, ଢେଙ୍କାନାଳ, କଟକ ଏବଂ ଯାଜପୁର ଜିଲାର ଚାଷୀ ଉପକୃତ ହେବେ। ୨୦୧୩ ଯାଏ ଖର୍ଚ୍ଚ ଅଟକଳ ୧୯୬୨.୩୩ କୋଟି ଟଙ୍କା ରହିଥିବା ସୂଚନା ଦିଆଯାଇଛି।
ପାଣି ପଞ୍ଚାୟତ ବୈଠକକୁ ଯନ୍ତ୍ରୀ ଆସୁ ନ ଥିବାରୁ ବିଧାୟକ ସୁଧୀର କୁମାର ସାମଲ କ୍ଷୋଭବ୍ୟକ୍ତ କରିଥିଲେ। ପରଜଙ୍ଗରେ ଥିବା ଜଳସମ୍ପଦ ବିଭାଗ ବଙ୍ଗଳାର ପୁନରୁଦ୍ଧାର କରିବା ପାଇଁ ବିଧାୟକ ଡା. ନୃସିଂହ ଚରଣ ସାହୁ ମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ। ଜଳ ସମ୍ପଦ ବିଭାଗ କାର୍ଯ୍ୟକ୍ରମକୁ ତ୍ୱରାନ୍ବିତ କରିବାକୁ ଏମ୍ପି ମହେଶ ସାହୁ କହିଥିଲେ। ଜିଲାପାଳ ଭୂମେଶ ଚନ୍ଦ୍ର ବେହେରା ଆଲୋଚନାରେ ଭାଗନେଇ କହିଲେ, କାମାକ୍ଷାନଗର ବ୍ଲକର ୭୬% ଜମି ଜଳସେଚିତ। ଏହା ଜିଲାର ୧ନମ୍ବର ସ୍ଥାନ ହାସଲ କରିଛି। ଜମି ଅଧିଗ୍ରହଣ ସମୟରେ ୫-ଟି କାର୍ଯ୍ୟଧାରା ଉପରେ ଧ୍ୟାନ ଦିଆଯାଉଥିବା ସେ ସୂଚନା ଦେଇଥିଲେ। ଜଳସେଚନ ବିଭାଗର ଯନ୍ତ୍ରୀମାନେ ଦଳଗତ ଅଭିମୁଖ୍ୟ ନେଇ କାର୍ଯ୍ୟ କରିବାକୁ ମନ୍ତ୍ରୀ ନିର୍ଦ୍ଦେଶ ଦେଇଛନ୍ତି। ସେହିପରି ସୂଚନା ଓ ଲୋକସମ୍ପର୍କ ବିଭାଗ ଇ-ଲାଇବ୍ରେରି ପ୍ରକଳ୍ପକୁ ଚଳିତ ଆର୍ଥିକ ବର୍ଷରେ କାର୍ଯ୍ୟକାରୀ କରାଇବାକୁ ସେ ଜିଲା ସୂଚନା ଓ ଲୋକସମ୍ପର୍କ ଅଧିକାରୀ ହେମନ୍ତ କୁମାର ନାୟକଙ୍କୁ ପରାମର୍ଶ ଦେଇଥିଲେ। ମନ୍ତ୍ରୀଙ୍କ ବ୍ୟକ୍ତିଗତ ସଚିବ ସୁକାନ୍ତ ପ୍ରଧାନ, ସ୍ବତନ୍ତ୍ର ଭୂଅର୍ଜନ ଅଧିକାରୀ ବରେନ୍ଦ୍ରନାଥ ଧଳ, ଜଳସମ୍ପଦ ବିଭାଗ ମୁଖ୍ୟଯନ୍ତ୍ରୀ, ଅଧିକ୍ଷଣ ଯନ୍ତ୍ରୀ ଏବଂ ନିର୍ବାହୀ ଯନ୍ତ୍ରୀମାନେ ଉପସ୍ଥିତ ରହି ବିଭିନ୍ନ ତଥ୍ୟ ଉପସ୍ଥାପନ କରିଥିଲେ।
