ସୋନପୁର,୧୭।୫(ନି.ପ୍ର.)- ସୁବର୍ଣ୍ଣପୁର ଜିଲା ମୁଖ୍ୟ ଚିକିତ୍ସାଳୟ ପରିସରରେ ଜାତୀୟ ଡେଙ୍ଗୁ ଦିବସ ପାଳିତ ହୋଇଯାଇଛି। ଜିଲା ମୁଖ୍ୟ ଚିକିତ୍ସା ଓ ଜନସ୍ବାସ୍ଥ୍ୟ ଅଧିକାରୀ ଡାକ୍ତର ସରୋଜ କୁମାର ନାୟକଙ୍କ ଅଧ୍ୟକ୍ଷତାରେ ଅନୁଷ୍ଠିତ ସଚେତନତା ସଭାରେ ଜିଲାପାଳ ମଧୁସୂଦନ ମିଶ୍ର ମୁଖ୍ୟ ଅତିଥିଭାବେ ଯୋଗଦେଇ ସାମୂହିକ ଉଦ୍ୟମ ଦ୍ୱାରା ଜିଲାରେ ଡେଙ୍ଗୁକୁ ପ୍ରତିରୋଧ କରାଯାଇପାରିବ। ତେଣୁ ଗାଁ ଓ ସହରର ପରିବେଶକୁ ସଫା ରଖିବାକୁ ଜିଲାପାଳ ମିଶ୍ର କହିଥିଲେ। ଜିଲା ମ୍ୟାଲେରିଆ ଅଧିକାରୀ ଡାକ୍ତର ନବ କିଶୋର ବେହେରା ଜିଲାର ସ୍ଥିତି ଉପରେ ଆଲୋଚନା କରିଥିଲେ। ଡାକ୍ତର ବେହେରା କହିଥିଲେ, ୨୦୧୨ରୁ ୨୦୧୯ ମଧ୍ୟରେ ଜିଲାରେ ଜଣେ ବି ଡେଙ୍ଗୁ ରୋଗୀ ଚିହ୍ନଟ ହୋଇଛନ୍ତି। ବାହାର ଜିଲା ଓ ରାଜ୍ୟରେ କାମ କରୁଥିବା ଲୋକ ଜ୍ୱରରେ ଆକ୍ରାନ୍ତ ହୋଇ ଆସିଥିଲେ। ଉତ୍ତମ ଚିକିତ୍ସା ଯୋଗୁଁ ସମସ୍ତେ ଏହି ମାରାତ୍ମକ ରୋଗରୁ ସୁସ୍ଥ ହୋଇଛନ୍ତି। ଗତ ସାଢେ ୭ବର୍ଷରେ ଜିଲାରେ ଡେଙ୍ଗୁଜନିତ ମୃତ୍ୟୁ ଶୂନ୍ୟ ରହିଛି ବୋଲି ମ୍ୟାଲେରିଆ ଅଧିକାରୀ କହିଥିଲେ। ସିଡିଏମପିଏଚଓ ଡାକ୍ତର ନାୟକ ଏଡିସ୍ ମଶା କିଭଳି ବ୍ୟାପେ, ତାର ନାରାକରଣ ଓ ଚିକିତ୍ସା ସୁବିଧା ସମ୍ପର୍କରେ ବୁଝାଇଥିଲେ। ବର୍ଷାଋତୁରେ ସାଧାରଣତଃ ସନ୍ତସନ୍ତିଆ ପରିବେଶରେ ଡେଙ୍ଗୁ ବ୍ୟାପି ଥାଏ। ସଫା ଓ ସ୍ଥିର ଜଳରେ ଡେଙ୍ଗୁ ମଶା ଅଣ୍ଡା ଦିଏ ବୋଲି ଜଣାଇଥିଲେ। ପୂର୍ବରୁ ଭେଷଜ ବିଶେଷଜ୍ଞ ଡାକ୍ତର ଜିତାରାମ ବିଦ୍ ଡେଙ୍ଗୁ ରୋଗର କାରଣ, ନିରାକରଣ ଓ ପ୍ରକାର ଭେଦ ବିଷୟରେ ଆଲୋଚନା କରିଥିଲେ। ଡିଏମଓ ଏମଏସ ଡାକ୍ତର ପ୍ରଦୀପ କୁମାର ଗୁରୁ, ଅତିରିକ୍ତ ଜିଲା ଜନସ୍ବାସ୍ଥ୍ୟ ଅଧିକାରୀ(ପରିବାର କଲ୍ୟାଣ) ଡାକ୍ତର ଦୈତ୍ୟ ନାରାୟଣ ପାଢୀ ପ୍ରମୁଖ ମଞ୍ଚାସୀନ ଥିଲେ। ଡାକ୍ତର ପଦ୍ମାହଂସ ଦୋରା, ଡାକ୍ତର ରମେଶ ଚନ୍ଦ୍ର ସ୍ବାଇଁ, ଡାକ୍ତର ଜୟପ୍ରକାଶ ପ୍ରଧାନ, ଚକ୍ଷୁ ବିଶେଷଜ୍ଞ ଡାକ୍ତର ସଞ୍ଜିବ କୁମାର କର, ଏନଏଚଏମ ଡିପିଏମ ମୌସୁମୀ ମିଶ୍ର, ପ୍ରୋଗ୍ରାମ ଅଫିସର ଅନିତା ଗୁରୁ ପ୍ରମୁଖ ଜୁନ୍ରୁ ନଭେମ୍ବର ମାସ ପର୍ଯ୍ୟନ୍ତ ସତେତନତାମୂଳକ କାର୍ଯ୍ୟକ୍ରମ ଗ୍ରହଣ ଉପରେ ଗୁରୁତ୍ୱ ଦେଇଥିଲେ। ଏପରିକି ଏହି କାର୍ଯ୍ୟକ୍ରମର ସଫଳତା ପାଇଁ ସ୍ବାସ୍ଥ୍ୟ ବିଭାଗ ସମେତ ବିଭିନ୍ନ ଲାଇନ ଡିପାର୍ଟମେଣ୍ଟ ଯଥା ପଞ୍ଚାୟତିରାଜ ଲୋକ ପ୍ରତିନିଧି, ଅଙ୍ଗନୱାଡି କର୍ମୀ, ଆଶକର୍ମୀ, ଗ୍ରାମାଞ୍ଚଳର ସ୍ବାସ୍ଥ୍ୟକର୍ମୀ, ସ୍ବୟଂ ସହାୟକ ଗୋଷ୍ଠୀ ଓ ସ୍ବେଚ୍ଛାସେବୀ ସଂଗଠନଙ୍କୁ ସାମିଲ କରିବା ନେଇ ଆଲୋଚନା ହୋଇଥିଲା। ମହିଳା ସ୍ବାସ୍ଥ୍ୟକର୍ମୀ ତାଲିମ କେନ୍ଦ୍ରର ଛାତ୍ରୀମାନେ ଉପସ୍ଥିତ ଥିଲେ। ସଭା ପରେ ଏକ ଦସ୍ତଖତ କାର୍ଯ୍ୟକ୍ରମ ଆୟୋଜିତ ହୋଇଥିଲା।
