ସଜନାଗଡ଼, ୧୨।୧୦(ଡି.ଏନ.ଏ.)-ନୀଳଗିରି ବ୍ଲକ ବରହମ୍ପୁର ସ୍ବାସ୍ଥ୍ୟକେନ୍ଦ୍ରରେ ଶୁକ୍ରବାର ପୂର୍ବାହ୍ନରେ କୌଣସି ଡାକ୍ତର ନ ଥିବାରୁ ରୋଗୀମାନଙ୍କ ମଧ୍ୟରେ ଘୋର ଅସନ୍ତୋଷ ଦେଖାଦେଇଥିଲା। ଏହାର ପ୍ରତିବାଦ କରି ଶତାଧିକ ଲୋକ ଡାକ୍ତରଖାନା ସମ୍ମୁଖରେ ଧାରଣାରେ ବସିଥିଲେ। ବାଲେଶ୍ୱର ଜିଲା ମୁଖ୍ୟ ଚିକିତ୍ସାଧିକାରୀ ଡା. ବାନାର୍ଜୀ ପ୍ରସାଦ ଛୋଟରାୟଙ୍କ ନିର୍ଦ୍ଦେଶରେ ବରହମପୁର ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ମେଡିକାଲ ଅଫିସର କାଳୀଚରଣ ପାଲ, ଡା. ସରୋଜ ଜେନା ଅପରାହ୍ନ ସାଢେ ଗୋଟାଏ ବେଳେ ଡାକ୍ତରଖାନାରେ ପହଞ୍ଚି କାର୍ଯ୍ୟ ଆରମ୍ଭ କରିଥିଲେ।
ଡାକ୍ତରଖାନାର ଭେଷଜ ବିଶେଷଜ୍ଞ ନିଯୁକ୍ତି, ସ୍ଥାୟୀ ମେଡିକାଲ ଅଫିସର ରହଣି, ମାଗଣାରେ ପରୀକ୍ଷା, ଔଷଧ ବଣ୍ଟନ, ପରିସରକୁ ପରିଷ୍କାର ପରିଚ୍ଛନ୍ନ, ରୋଗୀମାନଙ୍କୁ ବେଡସିଟ୍ ଯୋଗାଣ ଆଦି ଦାବି ନେଇ ଗ୍ରାମବାସୀ ଧାରଣାରେ ବସିଥିଲେ। ଜିଲା ମୁଖ୍ୟ ଚିକିତ୍ସାଧିକାରୀ ଡା. ବାନାର୍ଜୀ ଅପରାହ୍ନ ସାଢେ ୪ଟାରେ ପହଞ୍ଚତ୍ ଆନ୍ଦୋଳନକାରୀଙ୍କ ଆଲୋଚନା କରି ସମସ୍ତ ଦାବି ପୂରଣ ପାଇଁ ପ୍ରତିଶ୍ରୁତି ଦେବା ପରେ ଧାରଣା ପ୍ରତ୍ୟାହୃତ ହୋଇଥିଲା। ଏହାପରେ ଜିଲା ମୁଖ୍ୟ ଚିକିତ୍ସାଧିକାରୀ ଡା. ବାନାର୍ଜୀ ଡାକ୍ତରଖାନାର ସମସ୍ତ ନଥିପତ୍ର ଯାଞ୍ଚ କରିବା ସହ ହସ୍ପିଟାଲ ବୁଲି ଦେଖିଥିଲେ। ଯେପରି ଭବିଷ୍ୟତରେ ଏପରି ପରିସ୍ଥିତି ନ ଉପୁଜେ ସେଥିପାଇଁ ଡାକ୍ତର ଓ କର୍ମଚାରୀମାନଙ୍କୁ ଚେତାବନୀ ଦେଇଥିଲେ। ଧାରଣାରେ ବରହମ୍ପୁର ସରପଞ୍ଚ ଚନ୍ଦ୍ରମୋହନ ସିଂ, ଭବାନୀ ସେଠୀ, ମାମିନା ବେହେରା, ଭଗବାନ ସାହୁ, ଶଙ୍କର ପଶା, ଜିତେନ୍ଦ୍ର ଦାସ, କାହ୍ନୁଚରଣ ଦାସ, ଫ୍ରାନ୍ସିସ ବେକନ ସ, ଅଶୋକ ସେଠୀ, ଜୟନ୍ତ ପଟ୍ଟନାୟକ, ଜିତେନ୍ଦ୍ର ସେଠୀ, ସନାତନ ବେହେରା, କବିତା ବେହେରା, କାର୍ତ୍ତିକ ସାହୁ, ରମେଶ ବେହେରା, ଜଗାଦାସ ସମେତ ଶତାଧିକ ଗ୍ରାମବାସୀ ଉପସ୍ଥିତ ଥିଲେ।
