ବ୍ରହ୍ମପୁର ଅଫିସ୍,୮ା୧୧-ଗଞ୍ଜାମ ଜିଲା ବରିଷ୍ଠ ନାଗରିକ ସୁରକ୍ଷା ମଞ୍ଚର ଏକ ବୈଠକ ସ୍ଥାନୀୟ ପାତାଳେଶ୍ୱର ଜଗନ୍ନାଥ ମନ୍ଦିର ପ୍ରାଙ୍ଗଣରେ ଅନୁଷ୍ଠିତ ହେ।ଇଥିଲା। ଏହି ଅବସରରେ ବରିଷ୍ଠ ନାଗରିକମାନଙ୍କ ବିଭିନ୍ନ ସମସ୍ୟା ସମ୍ପର୍କରେ ଆଲୋଚନା କରାଯାଇଥିଲା। ଅନୁଷ୍ଠାନ ସଭାପତି ପ୍ରଫେସର ଡ.ରବିନାରାୟଣ ମିଶ୍ର ଏଥିରେ ଅଧ୍ୟକ୍ଷତା କରିଥିଲେ । ସଭା ଅବସରରେ କାର୍ଯ୍ୟକାରୀ ସଭାପତି ରାଧାଚରଣ ନାୟକ, ଆଇନ ପରାମର୍ଶଦାତା ଆଇନଜୀବୀ ଜିତେନ୍ଦ୍ର କୁମାର ପଟ୍ଟନାୟକ, ଉପସଭାପତି ଗୋପାଳକୃଷ୍ଣ ପାଢ଼ୀ, ସାଧାରଣ ସମ୍ପାଦକ ଦୀନବନ୍ଧୁ ଶ୍ରୀପଲ୍ଲବ, କୋଷାଧ୍ୟକ୍ଷ ନରସିଂହ ପାଣିଗ୍ରାହୀଙ୍କ ସମେତ ହାଡ଼ିବନ୍ଧୁ ମାଳି, ବିଜୟ କୁମାର ସାହୁ, ସ୍ବର୍ଣ୍ଣପ୍ରଭା ମିଶ୍ର, ପ୍ରମୋଦିନୀ ପଣ୍ଡା, ଡ.ସୂଚନା ପାଢ଼ୀ, ପ୍ରମିଳା ମହଲା, ଲକ୍ଷ୍ମୀପ୍ରିୟା ମାଳି, ଭିକାରୀଚରଣ ମହାପାତ୍ର, ଲଡୁକେଶ ମିଶ୍ର, ସୁବାସ ଚନ୍ଦ୍ର ସୁବୁଦ୍ଧି, ତ୍ରିନାଥ ପଣ୍ଡା ପ୍ରମୁଖଙ୍କ ସମେତ ବହୁ ସଭ୍ୟାସଭ୍ୟ ଯୋଗ ଦେଇଥିଲେ । ଏଥି ସହ ପଲାସା ଭୁବନେଶ୍ୱର ଡିଏମ୍ୟୁ ଟ୍ରେନକୁ ପୁରୀ ପର୍ଯ୍ୟନ୍ତ ସମ୍ପ୍ରସାରଣ କରିବା, ଇଚ୍ଛାପୁର କଟକ ମେମୋ ଟ୍ରେନ ବ୍ରହ୍ମପୁରରୁ ଚଳାଚଳ କରିବା, ବର୍ତ୍ତମାନ ବିଶାଖାପାଟଣାରୁ ଆଲ୍ଲାହାବାଦ୍ ସାମୟିକ ଭାବେ ଚଳାଚଳ କରୁଥିବା ଟ୍ରେନକୁ ନିତିଦିନିଆ କିମ୍ବା ସପ୍ତାହକୁ ତିନିଦିନ ଚଳାଚଳ କରିବା, ପୂର୍ବରୁ ପ୍ରସ୍ତାବିତ ବ୍ରହ୍ମପୁରରୁ ସମ୍ବଲପୁର ଭାୟା ଭଞ୍ଜନଗର-ଫୁଲବାଣୀ ରେଢାଖୋଲ ରେଳପଥ ନିର୍ମାଣ କରିବା, ବ୍ରହ୍ମପୁର ନିକଟରେ ରେଳଡବା ଧୁଆ, ସଫା ଓ ସଜଡା ସହ ଟ୍ରେନରେ ପାଣି ଭରିବା ବ୍ୟବସ୍ଥିତ କେନ୍ଦ୍ର ସ୍ଥାପନ କରିବା ଦାବିଗୁଡ଼ିକ ସମ୍ପର୍କରେ ଆଲୋଚନା ହୋଇଥିଲା । ପରେ ପଦାଧିକାରୀମାନେ ଏ ସମ୍ପର୍କିତ ଏକ ଦାବିପତ୍ର ବ୍ରହ୍ମପୁର ରେଳ ପ୍ରବନ୍ଧକ ଚଣ୍ଡୀ ତ୍ରିଦେବ ପ୍ରସନ୍ନ କୁମାର ଦାସଙ୍କ ଜରିଆରେ ଖୋର୍ଦ୍ଧାରୋଡ଼ ରେଳବାଇ ଡିଭିଜନାଲ ପ୍ରବନ୍ଧକଙ୍କୁ ପ୍ରଦାନ କରିଥିଲେ । ଷ୍ଟେଶନ ପ୍ରବନ୍ଧକ ଦାସ ସ୍ମାରକପତ୍ର ଗ୍ରହଣ କରି ବିଭାଗୀୟ କର୍ତ୍ତୃପକ୍ଷଙ୍କ ଦୃଷ୍ଟି ଆକର୍ଷଣ କରିବେ ବୋଲି ପ୍ରତିଶ୍ରୁତି ପ୍ରଦାନ କରିଥିଲେ। ସ୍ମାରକପତ୍ରର ନକଲ ଭୁବନେଶ୍ୱର ରେଳବାଇ ମହାପ୍ରବନ୍ଧକଙ୍କ ସମେତ ରେଳମନ୍ତ୍ରୀ, ଭାରତ ସରକାର ନୂଆଦିଲ୍ଲୀ, ମୁଖ୍ୟମନ୍ତ୍ରୀ, ବାଚସ୍ପତି, ବ୍ରହ୍ମପୁର ଏମ୍ପିଙ୍କୁ ଏହାର ସମାଧାନ ପାଇଁ ପଠାଯାଇଥିଲା ।
