ନୂଆଦିଲ୍ଲୀ,୪।୬(ପି.ଟି.): ବ୍ୟାଡ୍ମିଣ୍ଟନ ତାରକା ଅଶ୍ୱିନୀ ପୋନାପ୍ପା ଓ ଲକ୍ଷ୍ୟ ସେନ୍ଙ୍କ ସମେତ ୨୦ଜଣ ଅନ୍ୟ ଭାରତୀୟ ଖେଳାଳି ଟ୍ରେନିଂକୁ ପ୍ରତ୍ୟାବର୍ତ୍ତନ କରିଛନ୍ତି। ବେଙ୍ଗାଲୁରୁ ସ୍ଥିତ ପ୍ରକାଶ ପାଦୁକନ୍ ବ୍ୟାଡ୍ମିଣ୍ଟନ ଏକାଡେମୀ (ପିପିବିଏ)ରେ ଏହି ଖେଳାଳିମାନେ ଅଭ୍ୟାସ ଆରମ୍ଭ କରିଛନ୍ତି। କୋଭିଡ-୧୯ ମହମାରୀ ମଧ୍ୟରେ ବ୍ୟାଡ୍ମିଣ୍ଟନ ପୁଣି ଆରମ୍ଭ ହେବାର ପ୍ରକ୍ରିୟାର ଆରମ୍ଭ ହେବା ପରେ ଖେଳାଳିମାନେ ଟ୍ରେନିଂକୁ ଫେରିଛନ୍ତି।
କରୋନା ଭାଇରସ ସଂକ୍ରମଣ ଯୋଗୁ ଦେଶବ୍ୟାବୀ ଜାରି କରାଯାଇଥିବା ଲକ୍ଡାଉନ୍ କାରଣରୁ ଖେଳାଳିମାନେ ଦୀର୍ଘ ୨ ମାସ ଧରି ଘରେ ବନ୍ଦୀ ଭଳି ରହିଥିଲେ। ତେବେ ଗତମାସ ସ୍ପୋଟର୍ସ ଅଥରିଟି ଅଫ୍ ଇଣ୍ଡିଆ (ସାଇ) ଟ୍ରେନିଂ ଆରମ୍ଭ ନେଇ ନିର୍ଦ୍ଦେଶନାମା ଜାରି କରିଥିଲା। ଫଳରେ ଖେଳାଳିମାନେ ପିପିବିଏରେ ଅଭ୍ୟାସ ଆରମ୍ଭ କରିଛନ୍ତି। କେତେଜଣ ଜାତୀୟସ୍ତରର ଖେଳାଳି ଗତ ଦୁଇ ସପ୍ତାହ ହେବ ଏଠାରେ ଅଭ୍ୟାସ କରି ଆସୁଛନ୍ତି ବୋଲି ପିପିବିଏର ହେଡ୍ କୋଚ୍ ତଥା ନିର୍ଦ୍ଦେଶକ ବିମଲ କୁମାର କହିଛନ୍ତି। ଏକାଡେମୀରେ ୧୬ଟି କୋର୍ଟ ରହିଛି। ଏଥିରେ ୨୦ଜଣ ଭାରତୀୟ ଖେଳାଳି ଅଭ୍ୟାସ କରୁଛନ୍ତି । ୬୫ ଜଣ ଟ୍ରେନି ଖେଳାଳି ସହର ବାହାରେ ରହୁଛନ୍ତି। ସେମାନେ ଏବେ ଟ୍ରେନିଂ ଆରମ୍ଭ କରିବାକୁ ଚାହୁଁଛନ୍ତି। ଏବେ ଟ୍ରେନିଂ ଇଚ୍ଛଧୀନ ବୋଲି ସେ କହିଛନ୍ତି।
ଏବେ ଟ୍ରେନିଂ ଜାରି ରଖିଥିବା ଖେଳାଳିମାନଙ୍କ ମଧ୍ୟରେ ରହିଛନ୍ତି ୩ଥର ରାଜ୍ୟଗୋଷ୍ଠୀ ପଦକ ବିଜୟିନୀ ଅଶ୍ୱିନୀ, ବିଶ୍ୱର ପୂର୍ବତନ ୧୩ ନମ୍ବର ଖେଳାଳି ଅଜୟ ଜୟରାମ ଓ ଲକ୍ଷ୍ୟ ସେନ। ଲକ୍ଷ୍ୟ ଗତ ବର୍ଷ ୫ଟି ଟାଇଟଲ ହାସଲ କରି ସମସ୍ତଙ୍କ ଦୃଷ୍ଟି ଆକର୍ଷଣ କରିଥିଲେ। ସେହିପରି ମିଥୁନ ମଞ୍ଜୁନାଥ, ବିଏମ୍ ରାହୁଲ ଭରଦ୍ୱାଜ ଓ ମାଇସନାମ ମେଇରାବା ମଧ୍ୟ ଟ୍ରେନିଂ ଜାରି ରଖିଛନ୍ତି। ଦୀର୍ଘ ଦୁଇମାସ ଧରି ଖେଳରୁ ଦୂରେଇ ରହିଥିବାରୁ ଫିଟ୍ନେସ୍ ଓ ଫର୍ମ ତଥା ଶାର୍ପନେସ ଫେରିପାରିବା ପାଇଁ ଖେଳାଳିମାନଙ୍କୁ ଅତିକମ୍ରେ ଦେଢମାସ ସମୟ ଆବଶ୍ୟକ ହେବ। ଏବେ କୌଣସି ଟୁର୍ନାମେଣ୍ଟ ଖେଳାଯିବାର ସମ୍ଭାବନା ନାହିଁ। ତେବେ ସେପ୍ଟେମ୍ବରେ ଖେଳିବା ଲକ୍ଷ୍ୟରେ ଅଭ୍ୟାସ ଆରମ୍ଭ ହୋଇଛି ବୋଲି ପୂର୍ବତନ ଭାରତୀୟ କୋଚ୍ ବିମଲ କହିଛନ୍ତି।
