ଜୋହାନ୍ସବର୍ଗ,୨୮।୧- ଦକ୍ଷିଣ ଆଫ୍ରିକା ବିପକ୍ଷ ଚତୁର୍ଥ ତଥା ଅନ୍ତିମ ଟେଷ୍ଟକୁ ଇଂଲଣ୍ଡ ୧୯୧ ରନ୍ରେ ଜିତି ସିରିଜ୍କୁ ୩-୧ ବ୍ୟବଧାନରେ ହାତେଇ ନେଇଛି। ଅନ୍ତିମ ଟେଷ୍ଟରେ ଧିମା ବୋଲିଂ ହାର ପାଇଁ ଦକ୍ଷିଣ ଆଫ୍ରିକାକୁ ୬ ଟେଷ୍ଟ ଚାମ୍ପିୟନଶିପ ପଏଣ୍ଟ ହରାଇବାକୁ ପଡ଼ିଛି। ଫାଫ ଡୁପ୍ଲେସିଙ୍କ ନେତୃତ୍ୱାଧୀନ ଘରୋଇ ଦଳ ଉପରେ ଏହି ଦଣ୍ଡାଦେଶ ଲଗାଇଛନ୍ତି ଆଇସିସି ମ୍ୟାଚ୍ ରେଫରି ଆଣ୍ଡି ପିକ୍ରଫ୍ଟ। ଧାର୍ଯ୍ୟ ସମୟରେ ଦଳ ୩ ଓଭର କମ୍ ବୋଲିଂ କରିଥିଲା ବୋଲି ଆଇସିସି ପକ୍ଷରୁ ଏକ ବିବୃତିରେ କୁହାଯାଇଛି। ଟେଷ୍ଟ ଚାମ୍ପିୟନଶିପ ନିୟମ ଅନୁସାରେ ବଳକା ପଡ଼ିଥିବା ଓଭର ପିଛା ୨ ପଏଣ୍ଟ ଲେଖାଏ କାଟ କରାଯାଇଛି। ଏଥିସହିତ ଦଳର ଖେଳାଳିଙ୍କ ମ୍ୟାଚ୍ ଫି’ର ୨୦ ପ୍ରତିଶତ କାଟ କରାଯାଇଛି। ଅଧିନାୟକ ଡୁପ୍ଲେସି ଦଣ୍ଡାଦେଶ ସ୍ବୀକାର କରିନେଇଥିବାରୁ କୌଣସି ଶୁଣାଣିର ଆବଶ୍ୟକତା ନାହିଁ।
