ବାଲେଶ୍ୱର ଅଫିସ, ୧୭।୧୨ (ମାନସ ବିଶ୍ୱାଳ)-ସହର ତଳି ଅଞ୍ଚଳରେ ଥିବା ସରକାରୀ ଜାଗାରେ ଦୀର୍ଘଦିନ ଧରି ବସବାସ କରିଆସୁଥିବା ବସ୍ତିବାସିନ୍ଦାଙ୍କ ପାଇଁ ରାଜ୍ୟ ସରକାର ଜାଗା ଯୋଜନାରେ ୩୫୦ ସ୍କୋୟାର ଫୁଟ୍ ଜମି ଓ ପ୍ରଧାନମନ୍ତ୍ରୀ ଆବାସ ଯୋଜନାରେ ପକ୍କା ଘର ଯୋଗାଇ ଦେବା ପାଇଁ ବ୍ୟବସ୍ଥା କରିଛନ୍ତି। ବାଲେଶ୍ୱର ସହର ସହଦେବଖୁଣ୍ଟା ଅଞ୍ଚଳର ଗୋଶାଳପଦା ଓ ଚାନ୍ଦବାଲି ପଡ଼ିଆରେ ବସବାସ କରୁଥିବା ୩ଶହରୁ ଊର୍ଦ୍ଧ୍ୱ ବସ୍ତିବାସିନ୍ଦାଙ୍କ ମଧ୍ୟରୁ ୧୫ଜଣ ଜମି ସାର୍ଟିଫିକେଟ୍ ପାଇ ମଧ୍ୟ ସ୍ଥାନୀୟ ପ୍ରଶାସନର ଭୁଲ୍ ଯୋଗୁ ହନ୍ତସନ୍ତ ହେଉଛନ୍ତି। ସୋମବାର ସେମାନେ ନିଜ ନିଜର କାଗଜପତ୍ର ଧରି ସ୍ଥାନୀୟ କାଉନ୍ସିଲର ଦେବାଶିଷ ସିଂଙ୍କ ନେତୃତ୍ୱରେ ଅତିରିକ୍ତ ଜିଲାପାଳ ସମ୍ବିତ କୁମାର ନାୟକଙ୍କୁ ଭେଟି ସାର୍ଟିଫିକେଟ୍କୁ ଠିକ୍ କରିବା ସହ ସରକାରୀ ଯୋଜନାରେ ଘର ଯୋଗାଇ ଦେବା ପାଇଁ ଆବେଦନ କରିଛନ୍ତି।
ସହଦେବଖୁଣ୍ଟା ମୌଜା ଖାତା ନଂ.୫୧୧ରେ ଗୋଶାଳପଦା ଗ୍ରାମର ବିଶ୍ୱନାଥ ହେମ୍ବ୍ରମ୍ ଖସଡ଼ା ନଂ. ୩୯୫ରୁ ୧୪୯.୨୮ ସ୍କୋୟାରଫୁଟ୍ ଜାଗା ପାଇଥିବା ବେଳେ ରଙ୍ଗଲତା ପାତ୍ର ୧୬୫.୫୭ ସ୍କୋୟାରଫୁଟ୍, ସବିତା ପାତ୍ର ୧୫୪.୧୨ ସ୍କୋୟାରଫୁଟ୍, ସୁର ହେମ୍ବ୍ରମ୍ ୧୯୩.୮୭ ସ୍କୋୟାରଫୁଟ୍, ରାଧା ମାରାଣ୍ଡି ୨୧୯.୮୮ ସ୍କୋୟାରଫୁଟ୍ ଜାଗା ପାଇଛନ୍ତି। ଏହିପରି ଅନେକ ବସ୍ତିବାସିନ୍ଦା ଏହିପରି କମ୍ ଜାଗା ପାଇଥିବାରୁ ସେମାନେ ସରକାରୀ ଯୋଜନାରୁ ବଞ୍ଚତ୍ତ ହେଉଥିବା ଅଭିଯୋଗ ହୋଇଛି। ପ୍ରଧାନମନ୍ତ୍ରୀ ଆବାସ ପାଇଁ ଅତି କମ୍ରେ ୩୫୦ ସ୍କୋୟାରଫୁଟ୍ ଜାଗା ଆବଶ୍ୟକ ଥିବାବେଳେ ଉକ୍ତ ବ୍ୟକ୍ତିମାନଙ୍କୁ ମିଳିଥିବା ଜାଗାରେ ଏହା ସମ୍ଭବ ହେଉନାହଁି। ଅନ୍ୟପକ୍ଷରେ ମିଳିଥିବା ଜାଗା ପ୍ରମାଣପତ୍ରରେ ‘ଜାତି’ ଉପସ୍ଥାପନା ହୋଇ ନ ଥିବାରୁ ସେମାନଙ୍କର ପିଲାମାନଙ୍କ ପାଠ ପଢ଼ିବା ପାଇଁ ଆବଶ୍ୟକ ଜାତିଗତ ଓ ଆୟ ପ୍ରମାଣପତ୍ର ମିଳିବା ସମ୍ଭବ ହେଉନାହଁି ବୋଲି ଅଭିଯୋଗ ହୋଇଛି। ସରକାରୀ ଯୋଜନାରେ ଏହି ଲୋକମାନେ ଅନ୍ତର୍ଭୁକ୍ତ ହୋଇଥିବାବେଳେ ସେମାନଙ୍କ ପାଇଁ ସାର୍ଟିଫିକେଟ କେବଳ କାଗଜ ଖଣ୍ଡେ ହୋଇଯାଇଥିବା ପ୍ରକାଶ କରିଛନ୍ତି। ଏହାକୁ ଗୁରୁତର ଭାବେ ବିଚାର କରାଯାଇ ପୁନଃ ଜମି ସାର୍ଟିଫିକେଟ୍ ପ୍ରଦାନ କରାଗଲେ ସେମାନେ ଉପକୃତ ହେବେ ବୋଲି କହିଛନ୍ତି।
ଏ ସମ୍ପର୍କରେ ପୂର୍ବତନ ନଗରପାଳ ଆଲୋକ କୁମାର ସାହୁ କହିଛନ୍ତି, ଉକ୍ତ ଯୋଜନା କାର୍ଯ୍ୟକାରୀ ପୂର୍ବରୁ ବସ୍ତିରେ ରହୁଥିବା ଲୋକମାନଙ୍କର ବାସସ୍ଥଳୀ ଡ୍ରୋନ୍ କ୍ୟାମେରା ଦ୍ୱାରା ସର୍ଭେ କରାଯାଇଥିଲା। ସେମାନେ ଯେଉଁ ଘରେ ରହୁଥିଲେ ସେହି ଅନୁଯାୟୀ ସମସ୍ତଙ୍କୁ ପ୍ରାୟ ୧ ଡିସିମିଲ କିମ୍ବା ୩୫୦ ସ୍କୋୟାର ଫୁଟ୍ରୁ ଊର୍ଦ୍ଧ୍ୱ ଜମି ପ୍ରଦାନ କରାଯାଇଛି। ଯେଉଁଥିରେ କି ସେମାନେ ଏକ ପ୍ରଧାନମନ୍ତ୍ରୀ ଆବାସ ଯୋଜନାରେ ଘର କରାଯାଇପାରିବେ। ସେଥିପାଇଁ ରାଜ୍ୟ ଓ କେନ୍ଦ୍ର ସରକାରଙ୍କ ପକ୍ଷରୁ ୨ଲକ୍ଷ ଟଙ୍କା ଅନୁଦାନ ସହ ଠିକ୍ ସମୟରେ କାର୍ଯ୍ୟ ଶେଷ କଲେ ୨୦ହଜାର ଟଙ୍କା ବୋନସ୍ ଦେବାର ବ୍ୟବସ୍ଥା ରହିଛି। ଯଦି କୌଣସି ଅଞ୍ଚଳରେ ବ୍ୟକ୍ତିମାନଙ୍କର ଏପରି ଭାବରେ କମ୍ ଜାଗା ଦିଆଯାଇଛି ତାହାକୁ ସଂଶୋଧନ ପାଇଁ ଆବେଦନ କରିବା ଉଚିତ।
ଅତିରିକ୍ତ ଜିଲାପାଳ ସମ୍ବିତ କୁମାର ନାୟକ କହନ୍ତି, ନିୟମ ଅନୁସାରେ ପ୍ରତ୍ୟେକ ବସ୍ତି ବାସିନ୍ଦାଙ୍କୁ ନିର୍ଦ୍ଧାରିତ ଜମି ଯୋଗାଇ ଦିଆଯିବ। ଯଦି କୌଣସି କାରଣରୁ ଅସୁବିଧା ହୋଇଛି ଯଥାଶୀଘ୍ର ଏହାକୁ ସଂଶୋଧନ କରାଯିବା ପାଇଁ ପ୍ରଶାସନ ପକ୍ଷରୁ ଉଚିତ ପଦକ୍ଷେପ ଗ୍ରହଣ କରାଯିବ।
