ଭୁବନେଶ୍ୱର, ୩।।୯ (ବ୍ୟୁରୋ): ଡାଲିଜାତୀୟ ଫସଲ ଉତ୍ପାଦନ ବୃଦ୍ଧି ପାଇଁ ଓଡ଼ିଶାରେ ଏକ ମେଗା ତୈଳବୀଜ ବିହନ ହବ୍ ସ୍ଥାପନ କରିବାକୁ ରାଜ୍ୟ ସରକାର କେନ୍ଦ୍ର ନିକଟରେ ଦାବି କରିଆସୁଥିଲେ। ତେବେ ଏଥିପାଇଁ ଆବଶ୍ୟକ ଜମି ମିଳୁ ନ ଥିବାରୁ ତାହା ଏବେ ଅନିଶ୍ଚିତତା ଭିତରକୁ ଚାଲିଯାଇଛି। ଏଥିପାଇଁ ରାଜ୍ୟ ସରକାର ବହୁ ପୂର୍ବରୁ ଭାରତୀୟ କୃଷି ଗବେଷଣା ପରିଷଦ(ଆଇସିଏଆର)କୁ ଅନୁରୋଧ କରିଥିଲେ। ଏହି ହବ୍ ସ୍ଥାପନ କରିବାକୁ ଭାରତୀୟ ତୈଳବୀଜ ଗବେଷଣା ପ୍ରତିଷ୍ଠାନ (ଆଇଆଇପିଆର) ରାଜି ହୋଇଥିଲା। ପ୍ରଥମେ ଓଡ଼ିଶା କୃଷି ଓ ବୈଷୟିକ ବିଶ୍ୱବିଦ୍ୟାଳୟ (ଓୟୁଏଟି) ପରିସରରେ ଏହି ହବ୍ କରିବାକୁ ନିଷ୍ପତ୍ତି ହୋଇଥିଲା। ତେବେ ଏଥିପାଇଁ ଜମି ନ ମିଳିବାରୁ ବିହନ ହବ୍ ଦୀର୍ଘ ବର୍ଷ ହେବ କାର୍ଯ୍ୟକାରୀ ହୋଇ ପାରୁ ନାହିଁ। ରାଜ୍ୟ ସରକାରୀ ଅଧିକାରୀଙ୍କ ଉଦାସୀନତା ଯୋଗୁ ଏହା ଆଗେଇ ପାରୁ ନାହିଁ। ରାଜ୍ୟର ୭ଟି ଜିଲାରେ ଓୟୁଏଟିର ବିହନ ହବ୍ ରହିଛି। ଏହି ହବ୍ଗୁଡିକ ଚାଷୀଙ୍କ ପାଇଁ ବିଶେଷ ଉପଯୋଗୀ ହୋଇ ପାରୁ ନାହିଁ। ଆଇଆଇପିଆର ଉନ୍ନତ ଜ୍ଞାନକୌଶଳରେ ଏହି ହବ୍ ସ୍ଥାପନ କରିବାକୁ ଯାଉଥିବାରୁ ରାଜ୍ୟର କୃଷକଙ୍କ ପାଇଁ ଏହା ଯଥେଷ୍ଟ ସହାୟକ ହେବ ବୋଲି କୁହାଯାଉଛି । ଆଇସିଏଆର ଏହି ହବ୍ ସ୍ଥାପନ କରିବାକୁ ଜୋରଦାର ଉଦ୍ୟମ କରୁଥିବା ବେଳେ ଜମି ଯୋଗାଇବା ବାଧକ ସୃଷ୍ଟି କରିଛି। ତୈଳବୀଜ ବିହନ ହବ୍ ପାଇଁ କେନ୍ଦ୍ର ସରକାର ୬ କୋଟି ଟଙ୍କା ପ୍ରଦାନ କରି ସାରିଛନ୍ତି। ଏଥିପାଇଁ ୧୦ ଏକର ଜମିର ଆବଶ୍ୟକତା ରହିଛି। ରାଜ୍ୟ ସରକାର ଜମି ଯୋଗାଇ ଦେବାକୁ ରାଜି ହୋଇଥିଲେ। ଗତ ଫେବୃୟାରୀରେ ଏ ନେଇ କେନ୍ଦ୍ର ଓ ରାଜ୍ୟ ସରକାରଙ୍କ ମଧ୍ୟରେ ବୁଝାମଣା ହୋଇଥିଲା। ରାଜ୍ୟ ସରକାର ଯେଉଁ ଜମି ଯୋଗାଇ ଦେଇଥିଲେ ତାହା ଜଙ୍ଗଲ କିସମ ହୋଇଥିବାରୁ ବିହନ ହବ୍ ସ୍ଥାପନ କରିବା ନେଇ ବିଳମ୍ବ ହେଉଛି। ଏଥିପାଇଁ ପରିବେଶ ଅନୁମତି ନେବାକୁ ପଡୁଥିବାରୁ ଏହି ପ୍ରକଳ୍ପ ନିର୍ମାଣରେ ବିଳମ୍ବ ହେଉଛି। ଅନ୍ୟ ପକ୍ଷରେ ପ୍ରକଳ୍ପ ଖର୍ଚ୍ଚ ମଧ୍ୟ ବଢି ଚାଲିଛି। ଜମି ଅଡୁଆ ନ ତୁଟିବା ଯାଏ ଏହି ପ୍ରକଳ୍ପ ନିର୍ମାଣକାର୍ଯ୍ୟ ଆଗେଇ ପାରିବ ନାହିଁ ବୋଲି ଆଇସିଏଆରର ଜଣେ ଅଧିକାରୀ କହିଛନ୍ତି।
