ଢେଙ୍କାନାଳ ଅଫିସ, ୨୩।୧୦- ଲକ୍ଷ୍ମୀପୂଜା ଢେଙ୍କାନାଳର ପରିଚୟ। ପୂଜା ପ୍ରତିଷ୍ଠାନଗୁଡ଼ିକର ନିଷ୍ଠାପର ଉଦ୍ୟମ ଲାଗି ଏହାର ଉତ୍କର୍ଷ ବଢ଼ିବାରେ ଲାଗିଛି। ଏହି ମାଟିରୁ ସୃଷ୍ଟି ହୋଇଥିଲା ଗଡ଼ଯାତ ଆନ୍ଦୋଳନ। ବିଶ୍ୱ ପ୍ରସିଦ୍ଧ ମହିମା ଧର୍ମ ଏହାର ଆଉ ଏକ ଅବଦାନ। ଜିଲାର ବିକାଶ ଲାଗି ରାଜ୍ୟ ସରକାର ବଦ୍ଧପରିକର। ଖୁବ୍ଶୀଘ୍ର ହିନ୍ଦୋଳ, ଓଡ଼ାପଡ଼ା, ଗଁଦିଆ, ଭୁବନ, ସଦର ଏବଂ କାମାକ୍ଷନଗର ବ୍ଲକରେ ମେଗା ପାନୀୟ ଜଳ ପ୍ରକଳ୍ପ କାର୍ଯ୍ୟକାରୀ ହେବ। ଜମିକୁ ପର୍ଯ୍ୟାପ୍ତ ଜଳସେଚନ ସୁବିଧା କରାଯିବ। ଜିଲାରେ ୪୦୦ କିମି ପୂର୍ତ୍ତ ବିଭାଗ ରାସ୍ତା ଥିଲା। ଏହା ଏବେ ୯୦୦ କିମିକୁ ଛୁଇଁଲାଣି। ସେହିପରି ଯୋରନ୍ଦା ନିକଟରେ ୨୫୩ କୋଟି ଏବଂ ମେରାମଣ୍ଡଳୀ ନିକଟରେ ୧୬୦ କୋଟି ଟଙ୍କା ବ୍ୟୟରେ ବ୍ରାହ୍ମଣୀ ନଦୀ ଉପରେ ୨ଟି ବ୍ରିଜ୍ ନିର୍ମାଣ ହେବ। ଶୃଙ୍ଖଳା ବଜାୟ ରଖିବା ଦିଗରେ ସମସ୍ତେ ଯତ୍ନବାନ ହେଲେ ପୂଜା ଉତ୍ସବ ଆହୁରି ଆକର୍ଷଣୀୟ ହେବ ବୋଲି କହିଛନ୍ତି ଖଣିମନ୍ତ୍ରୀ ପ୍ରଫୁଲ୍ଲ କୁମାର ମଲ୍ଲିକ। ଜବାହରଚୌକ ପୂଜା ପ୍ରତିଷ୍ଠାନର ପ୍ଲାଟିନମ୍ ଜୁବିଲିର ଉଦ୍ଯାପନୀ ସମାରୋହରେ ମୁଖ୍ୟଅତିଥି ଭାବେ ଯୋଗଦେଇ ସେ ଏହା କହିଛନ୍ତି। ଅନ୍ୟତମ ଅତିଥି ଭାବେ ଏମ୍ପି ମହେଶ ସାହୁ, ବିଧାୟକ ସୁଧୀର କୁମାର ସାମଲ, ରାଜ୍ୟ ଯୁବ କଲ୍ୟାଣ ପରିଷଦ ଅଧ୍ୟକ୍ଷ ବିଜୟ କୁମାର ନାୟକ ଉପସ୍ଥିତ ଥିଲେ। ଲକ୍ଷ୍ମୀପୂଜା ଗଣ ଅନ୍ଦୋଳନରେ ପରିଣତ ହୋଇଛି। ବିନା ପୋଲିସ ସହାୟତାରେ ଏହାକୁ ଆୟୋଜନ କରାଯାଇପାରିଲେ ଏହାର ମହତ୍ତ୍ୱ ଆହୁରି ବଢ଼ିବ। ପରିଣତ ବୟସରେ ଜନ୍ମକଲା ମା’ଙ୍କୁ ସୁଖଶାନ୍ତିରେ ରଖିପାରିଲେ ଲକ୍ଷ୍ମୀପୂଜା ସଫଳ ହୋଇପାରିଛି ବୋଲି କୁହାଯିବ ବୋଲି ଅତିଥିମାନେ ମତବ୍ୟକ୍ତ କରିଥିଲେ।
ଏହି ଅବସରରେ ବ୍ରଜକିଶୋର ପଟ୍ଟନାୟକଙ୍କୁ ମରଣୋତ୍ତର ସମ୍ମାନରେ ସମ୍ମାନିତ କରାଯାଇଥିଲା। ସେହିପରି କଳିଙ୍ଗନଗରର ଅତିରିକ୍ତ ଏସ୍ପି ରାଜକିଶୋର ଦୋରା, ଶିଳ୍ପପତି ମନୋରଞ୍ଜନ ମହାନ୍ତି, ଚିତ୍ତରଞ୍ଜନ ମହାନ୍ତି, ଶିକ୍ଷୟିତ୍ରୀ ପ୍ରତିମା ଦେବୀ, କ୍ରୀଡ଼ାବିତ୍ ଶ୍ରେୟାସ ଶକ୍ତିସ୍ମିଥ, ସରପଞ୍ଚ ଶୁଭଦର୍ଶିନୀ ପରିଡ଼ା ମଧ୍ୟ ସମ୍ବର୍ଦ୍ଧିତ ହୋଇଥିଲେ। ଅନୁଷ୍ଠାନ ପକ୍ଷରୁ ସ୍ମରଣିକା ଉନ୍ମୋଚିତ ହୋଇଥିଲା।
