ବାଲିଆପାଳ,୮।୭(ସ୍ବ.ପ୍ର)- ବାଲେଶ୍ୱର ଜିଲାପାଳଙ୍କ ନିର୍ଦ୍ଦେଶରେ ମଙ୍ଗଳବାର ବାଲିଆପଳ-ବସ୍ତା ମୁଖ୍ୟ ପୂର୍ତ୍ତରାସ୍ତା ପାର୍ଶ୍ୱ ନୟନଯୋଡ଼ିରୁ ଜବରଦଖଲ ଉଚ୍ଛେଦ ପ୍ରକ୍ରିୟା ଆରମ୍ଭ ହୋଇଛି। ଏହି ରାସ୍ତାର ଉଭୟ ପାର୍ଶ୍ୱ ନୟନଯୋଡ଼ି ବିଭିନ୍ନ ଲୋକଙ୍କ ଦ୍ୱାରା ଜବରଦଖଲ କରାଯାଇଛି ା ନୟନଯୋଡ଼ିରେ ମାଟି ପକାଇ ବନ୍ଦ କରାଯିବା ସହିତ ବିଭିନ୍ନ ପ୍ରକାର ଦୋକାନ ଗୃହ, ଗୁମୁଟି ଏବଂ ଘର ଆଦି କରାଯାଇ ଅବରୋଧ କରାଯାଇଛି। ଫଳରେ ବର୍ଷାଦିନେ ପାଣି ନିସ୍କାସନ ହୋଇ ନ ପାରି ଶହଶହ ଏକର ଚାଷଜମି କ୍ଷତିଗ୍ରସ୍ତ ହେଉଛି। ବିଶେଷକରି ଏହି ରାସ୍ତାର ନାବରା, ସିଂଲା, ପୁଟରା ଏବଂ ରଘୁନାଥପୁର ପଞ୍ଚାୟତର ୩ଶହରୁ ଊର୍ଦ୍ଧ୍ୱ ଏକର ଜମିରୁ ପାଣି ନିଷ୍କାସନ ହୋଇ ନ ପାରି ଜଳମଗ୍ନ ହୋଇ ରହୁଛି। ଏଥି ପାଇଁ ଚାଷୀଙ୍କୁ ବହୁ କ୍ଷତି ସହିବାକୁ ପଡୁଛି। ଏନେଇ ଚାଷୀମାନେ ବସ୍ତା, ବାଲିଆପାଳ ତହସିଲଦାର, ଜିଲାପାଳ, ପୂର୍ତ୍ତବିଭାଗ ଅଧିକାରୀ, ବିଧାୟକ, ଏମ୍ପି ତଥା କେନ୍ଦ୍ରମନ୍ତ୍ରୀଙ୍କ ଦୃଷ୍ଟି ଆକର୍ଷଣ କରିଥିଲେ। ଜିଲାପାଳଙ୍କ ନିର୍ଦ୍ଦେଶରେ ନାବରାଠାରୁ ପୁଟୁରା ପର୍ଯ୍ୟନ୍ତ ପ୍ରଶାସନ ପକ୍ଷରୁ ଜେସିବି ଲଗାଇ ଜବରଦଖଲ ଉଚ୍ଛେଦ ଆରମ୍ଭ କରାଯାଇଛି। ପର୍ଯ୍ୟାୟକ୍ରମେ ନୟନଯୋଡ଼ିକୁ ଅବରୋଧ କରି ହୋଇଥିବା ଦେକାନ ଗୃହ, ଘର ଏବଂ ଗୁମୁଟି ମଧ୍ୟ ଉଚ୍ଛେଦ କରାଯିବ ବୋଲି ବିଭାଗୀୟ ସହକାରୀ ଯନ୍ତ୍ରୀ ମନୋରଞ୍ଜନ ବେହେରା ପ୍ରକାଶ କରିଛନ୍ତି। ଏହି ଉଚ୍ଛେଦ କାର୍ଯ୍ୟରେ ମାଜିଷ୍ଟ୍ରେଟ ଭାବେ ବସ୍ତା ତହସିଲଦାର କାର୍ତ୍ତିକ ଚନ୍ଦ୍ର ଦାସ, ବାଲିଆପାଳ ଅତିରିକ୍ତ ତହସିଲଦାର ହିମାଂଶୁ ଶେଖର ବେହେରା, ସିଂଲା ଥାନା ଅଧିକାରୀ ପ୍ରଶାନ୍ତ କୁମାର ଜେନା ପ୍ରମୁଖ ଉପସ୍ଥିତ ଥିଲେ। ବିଳମ୍ବରେ ହେଲେ ମଧ୍ୟ ପ୍ରଶାସନର ଏହି ପଦକ୍ଷେପକୁ ଅଞ୍ଚଳବାସୀ ସ୍ବାଗତ କରିଛନ୍ତି।
