ଆସିକା,୨୦ା୧୦(ଡି.ଏନ୍.ଏ.) -ରାଜ୍ୟର ବିଭିନ୍ନ ଜଙ୍ଗଲରେ ବସବାସ କରୁଥିବା ବନବାସୀ ପରିବାରର ସାମଗ୍ରୀକ ସୁରକ୍ଷା ନିମନ୍ତେ ସରକାରଙ୍କ ପକ୍ଷରୁ ବହୁବିଧ ପଦକ୍ଷେପ ନିଆଯାଇଛି। ବିଭିନ୍ନ ପ୍ରକଳ୍ପ ମାଧ୍ୟମରେ ଏହି ପରିବାର ମାନଙ୍କର ସାମଗ୍ରୀକ ସ୍ବାର୍ଥ ରକ୍ଷା ହାସଲ କରିବା ଦିଗରେ ଦାୟିତ୍ୱରେ ଥିବା କର୍ମଚାରୀମାନେ ଯତ୍ନବାନ ହେବା ଲାଗି ଶନିବାର ମଧ୍ୟାହ୍ନରେ ଆସିକା ବ୍ଲକ ସଭା ଗୃହରେ ଅନୁଷ୍ଠିତ ଏକ କର୍ମଶାଳାରେ ପରାମର୍ଶ ଦିଆଯାଇଛି। ଜିଲ୍ଲା ଗ୍ରାମ୍ୟ ଉନ୍ନୟନ ସଂସ୍ଥାର ଅତିରିକ୍ତ ପ୍ରକଳ୍ପ ନିର୍ଦ୍ଦେଶକ ରବିନାରାୟଣ ତ୍ରିପାଠୀଙ୍କ ଅଧ୍ୟକ୍ଷତାରେ ଅନୁଷ୍ଠିତ ଏହି କର୍ମଶାଳାରେ ଧରାକୋଟ, ସୋରଡା ଓ ଶେରଗଡ ବ୍ଲକର ବିଭାଗୀୟ କାର୍ଯ୍ୟକର୍ତ୍ତା ସାମିଲ୍ ହୋଇଥିଲେ। ଧରାକୋଟ ବ୍ଲକର ୭ ପଞ୍ଚାୟତର ୧୦୪୭ ପରିବାର, ସୋରଡା ବ୍ଲକର ୧୬ଟି ପଞ୍ଚାୟତରେ ୧୦୭୧ ପରିବାର ଓ ଶେରଗଡ ବ୍ଲକର ୪ଟି ପଞ୍ଚାୟତରେ ୮୯ ପରିବାର ରହିଥିବା ଆକଳନ କରାଯାଇଛି। ଏହି ପରିବାରର ଉପଭୋକ୍ତାମାନଙ୍କ ସାମାଜିକ ଓ ଅର୍ଥନୈତିକ ପ୍ରଗତି ନିମନ୍ତେ ଜଳ, ଜମି, ଜଙ୍ଗଲର ସଦୁପଯୋଗ ପୂର୍ବକ ଦୈନନ୍ଦିନ ଜୀବିକା ନିର୍ବାହରେ ଉନ୍ନତି ଆଣିବା ଲକ୍ଷ୍ୟରେ ଏହି କାର୍ଯ୍ୟକ୍ରମ ଅନୁଷ୍ଠିତ ହୋଇଥିଲା। ମହାତ୍ମାଗାନ୍ଧୀ ଜାତୀୟ ଜାତୀୟ ଗ୍ରାମୀଣ ନିଶ୍ଚିତ କର୍ମନିଯୁକ୍ତି ଯୋଜନା ମାଧ୍ୟମରେ ସମ୍ପୃକ୍ତ ପରିବାରର ବ୍ୟକ୍ତିଗତ ସ୍ତରରେ ଉନ୍ନତି ନିମନ୍ତେ ଏହି ଯୋଜନା ଅନ୍ତର୍ଭୁକ୍ତ ଜଙ୍ଗଲ ଜମିର ସମତୁଲ, ଗଭୀର କୂପ, ଜିଆ ଖତ, ଗାଈ ଗୁହାଳ, ଛେଳି ଗୁହାଳ, କୁକୁଡା ଘର ଆଦି ପ୍ରକଳ୍ପ କାର୍ଯ୍ୟକାରୀ କରିବା ଲାଗି ବିଭାଗୀୟ କର୍ମଚାରୀମାନଙ୍କୁ ପରାମର୍ଶ ଦିଆଯାଇଥିଲା। ଏହି କାର୍ଯ୍ୟକ୍ରମରେ ସମ୍ପୃକ୍ତ ୩ଟି ବ୍ଲକର ସହକାରୀ ପ୍ରକଳ୍ପ ଅଧିକାରୀ, ସହକାରୀ ଯନ୍ତ୍ରୀ, କନିଷ୍ଠ ଯନ୍ତ୍ରୀ, ପଞ୍ଚାୟତ ନିର୍ବାହୀ ଅଧିକାରୀ, ଜିଆର୍ଏସ୍ ଏବଂ ପଞ୍ଚାୟତର ନିର୍ବାଚିତ ପ୍ରତିନିଧି ସାମିଲ୍ ଥିଲେ।
