ଜଙ୍ଗଲରୁ ମହିଳାଙ୍କ ଝୁଲନ୍ତା ମୃତଦେହ ଉଦ୍ଧାର ଘଟଣା: ପ୍ରତାରଣା ଯୋଗୁ ଆତ୍ମହତ୍ୟା, ଜଣେ ଗିରଫ
7:54 amSeptember 6, 2019 / 21

ଜି.ଉଦୟଗିରି,୬ା୯(ଡି.ଏନ.ଏ.)- ଜି.ଉଦୟଗିରି ଥାନା ପେଟାଗୁଡ଼ା ଜଙ୍ଗଲରୁ ମଙ୍ଗଳବାର ଜଣେ ମହିଳାଙ୍କ ଝୁଲନ୍ତା ମୃତଦେହ ମିଳିଥିଲା। ବିବାହ ପ୍ରଲୋଭନ ଦେଖାଇ ୨ବର୍ଷ ଶାରିରୀକ ସମ୍ପର୍କ ରଖିବା ପରେ ବିବାହ ପାଇଁ ମନା କରିବାରୁ ମହିଳା ଜଣଙ୍କ ଆତ୍ମହତ୍ୟା କରିଥିବା ପୋଲିସ କହିଛି। ନଂ.୧୦୭/୧୯ ଦଫା ୩୭୬ (୨) (ଏନ୍‌)/୩୦୬ ଆଇପିସିରେ ମାମଲା ରୁଜୁକରି ଘଟଣାରେ ସମ୍ପୃକ୍ତ ଯୁବକଙ୍କୁ ପୋଲିସ ଗିରଫ ପରେ କୋର୍ଟ ଚାଲାଣ କରିଛି। ସେ ହେଲେ କୁମ୍ଭାରକୃପା ଗ୍ରାମର ବୁଦ୍ଧିସପ୍ତ ମହାନ୍ତି (୨୭)। ପୋଲିସ ସୂଚନା ଅନୁଯାୟୀ, ମହିଳା ଜଣଙ୍କ ୧୦ ବର୍ଷ ପୂର୍ବେ ରାଇକିଆରେ ବିବାହ କରିଥିଲେ। ସ୍ବାମୀଙ୍କ ସହ ମନୋମାଳିନ୍ୟ ଯୋଗୁ ପ୍ରାୟ ୩ବର୍ଷ ହେବ ୮ ବର୍ଷର ପୁଅ ଓ ୬ ବର୍ଷର ଝିଅଙ୍କୁ ଶାଶୁଘରେ ଛାଡି ବାପଘରେ ଆସି ରହୁଥିଲେ। ୨ବର୍ଷ ହେବ ଜି.ଉଦୟଗିରିରେ ଏକ ଗ୍ୟାରେଜରେ କାମ କରୁଥିବା ବୁଦ୍ଧିସପ୍ତଙ୍କ ସହିତ ତାଙ୍କର ପ୍ରେମ ସମ୍ପର୍କ ଗଢ଼ି ଉଠିଥିଲା। ବୁଦ୍ଧିସପ୍ତ ତାଙ୍କୁ ବିବାହ ପ୍ରତିଶ୍ରୁତି ଦେଇ ଶାରିରୀକ ସମ୍ପର୍କ ରଖି ଆସୁଥିଲେ। ଘଟଣାଦିନ ମହିଳାଙ୍କୁ ଫୋନ କରି ସେ ଡାକିଥିଲେ। ଗଣେଶ ପୂଜା ଥିବାରୁ ଉଭୟେ ବୁଲାବୁଲି କରିଥିଲେ। ଅପରାହ୍ନରେ ଖାଇବା ପ୍ୟାକେଟ ଆଣି ନାନ୍ଦା ନିକଟସ୍ଥ ପେଟାଗୁଡ଼ା ଜଙ୍ଗଲକୁ ଯାଇଥିଲେ। ସେଠାରେ ଖାଇବା ପରେ ପୁଣି ଶାରିରୀକ ସମ୍ପର୍କ ରଖିଥିଲେ। ମହିଳା ଜଣଙ୍କ ଯୁବକଙ୍କୁ ବିବାହ କରିବାକୁ କହିବାରୁ ସେ ମନା କରିଦେଇଥିଲେ। ବିବାହ ନ କଲେ ଆତ୍ମହତ୍ୟା କରିବି ବୋଲି ମହିଳା ଜଣକ ଧମକ ଦେଇଥିଲେ। କିନ୍ତୁ ବୁଦ୍ଧିସପ୍ତ ତାଙ୍କ କଥାକୁ ଗୁରୁତ୍ୱ ନଦେଇ ଜଙ୍ଗଲରେ ଶୋଇ ପଡିଥିଲେ। ପରେ ମହିଳା ଜଣକ ନିକଟରେ ଥିବା ଗଛରେ ଚୁନୀରେ ଫାଶି ଲଗାଇ ଆତ୍ମହତ୍ୟା କରିଥିଲେ। ବୁଦ୍ଧିସପ୍ତ ଶବ୍ଦ ଶୁଣି ଉଠି ପଡିଥିଲେ। ତାଙ୍କୁ ବଞ୍ଚାଇବାକୁ ଚେଷ୍ଟା କରିଥିଲେ ମଧ୍ୟ ସଫଳ ହୋଇ ନ ଥିଲେ ବୋଲି ଜେରା ବେଳେ ଅଭିଯୁକ୍ତ ସୂଚନା ଦେଇଥିବା ଜି.ଉଦୟଗିରି ଏସ୍‌ଡିପିଓ ଜୟକୃଷ୍ଣ ବେହେରା ଓ ଆଇଆଇସି ଚିତ୍ତରଞ୍ଜନ ବେହେରା କହିଛନ୍ତି। ଘଟଣା ପରେ ସେ ଫେରାର ହୋଇଯାଇଥିଲେ। ତାଙ୍କ ମୋବାଇଲ ଫୋନ ଟ୍ରାକିଂ କରି ଗିରଫ କରିଥିଲା।