ଭଞ୍ଜନଗର,୨।୧(ଡି.ଏନ୍.ଏ.)- ଭଞ୍ଜନଗର ଉପଖଣ୍ଡ ହସ୍ପିଟାଲ ରାଜ୍ୟର ଏକ ଗୁରୁତ୍ୱପୂର୍ଣ୍ଣ ହସ୍ପିଟାଲ। ଉକ୍ତ ହସପିଟାଲକୁ ଜିଲା ହସପିଟାଲ ଠାରୁ ଅଧିକ ରୋଗୀ ଦୈନନ୍ଦିନ ଆସନ୍ତି। ଚାହିଦାକୁ ଦେଖି ଭିତ୍ତିଭୂମି ସୁଦୃଢ଼ କରାଯାଇଛି। କିନ୍ତୁ ଖାଲିଥିବା ଡାକ୍ତର ପଦବୀ ପୂରଣ କରାଯାଉନାହିଁ। ଯେଉଁଥିପାଇଁ ଅଧିକାଂଶ ସମୟ ରୋଗୀସେବା ବାଧାପ୍ରାପ୍ତ ହେଉଛି। ଯାହାକୁ ନେଇ ସାଧାରଣରେ ଅସନ୍ତୋଷ ପ୍ରକାଶ ପାଇଛି। ବିଭାଗୀୟ ଉଚ୍ଚ କର୍ତ୍ତୃପକ୍ଷ ଖାଲିଥିବା ଡ଼ାକ୍ତର ପଦବୀ ପୂରଣ କରିବା ପାଇଁ ଦାବି ହୋଇଛି। ଏହି ହସପିଟାଲ ଉପରେ ଭଞ୍ଜନଗର ଉପଖଣ୍ଡ, କନ୍ଧମାଳ ଓ ନୟାଗଡ଼ ଜିଲା ସୀମାବର୍ତ୍ତୀ ଅଞ୍ଚଳର ଲୋକେ ସ୍ବାସ୍ଥ୍ୟସେବା ପାଇଁ ନିର୍ଭରଶୀଳ। ଭଞ୍ଜନଗର ଉପଖଣ୍ଡ ହସ୍ପିଟାଲରେ ୨୩ ଡ଼ାକ୍ତର ପଦବୀ ଅନୁମୋଦନ ହୋଇଥିବାବେଳେ ବତ୍ତର୍ର୍ମାନ ୧୧ ଜଣ କାର୍ଯ୍ୟରତ। ବ୍ୟକ୍ତିଗତ କାରଣରୁ ମେଡ଼ିସିନି ଭଳି କିଛି ଗୁରୁତ୍ୱପୂର୍ଣ୍ଣ ବିଭାଗର ଡ଼ାକ୍ତର ସପ୍ତାହେ ହେବ ଛୁଟିରେ ଅଛନ୍ତି। ଛୁଟିରେ ଥିବା କେତେଜଣ ଡ଼ାକ୍ତର ଗୁରୁବାର କାର୍ଯ୍ୟରେ ଯୋଗ ଦେବାର ସମ୍ଭାବନା ରହିଛି। ଆଉ ୨ଜଣ ଡ଼ାକ୍ତର ଲମ୍ବା ଛୁଟିରେ ଅଛନ୍ତି। ତେଣୁ ସରକାର ଅନୁମୋଦନ ହୋଇଥିବା ଡ଼ାକ୍ତର ପଦବୀ ଗୁଡ଼ିକ ତୁରନ୍ତ ପୂରଣ ପାଇଁ ଦାବି ହୋଇଛି। ସର୍ଜରି, ଅସ୍ଥିଶଲ୍ୟ ବିଶେଷଜ୍ଞ ପଦବୀ ୨ବର୍ଷରୁ ଊର୍ଦ୍ଧ୍ୱ ହେବ ଖାଲିପଡ଼ିଛି। ଏଥିସହ ଅନ୍ୟାନ୍ୟ ବିଭାଗର ଡ଼ାକ୍ତର ପଦବୀ ଖାଲିପଡ଼ିଛି। ଲୋକେ ସାମାନ୍ୟ ଆହତ ହୋଇ ଭଞ୍ଜନଗର ମେଡ଼ିକାଲକୁ ଆସିଲେ ମଧ୍ୟ ବ୍ରହ୍ମପୁର ଅଧିକ ଚିକିତ୍ସା ପାଇଁ ଯିବାକୁ ପଡ଼ୁଛି। କିଛିଦିନତଳେ ଜିଲୁଣ୍ଡିର ଜଣେ ବ୍ୟକ୍ତି ସିକଲସେଲ୍ ରକ୍ତ ପରୀକ୍ଷା ଭଞ୍ଜନଗର ମେଡ଼ିକାଲରେ କରିଥିଲେ। ଏଠାରେ ସିକଲସେଲ ନ ଥିବା ରିପୋର୍ଟ ଆସିଥିଲା। ଏହାର ୨ଦିନ ପରେ ସେ ବ୍ରହ୍ମପୁର ବଡ଼ ମେଡ଼ିକାଲରେ ଯାଇ ରକ୍ତ ପରୀକ୍ଷା କରିବାରୁ ପଜେଟିଭ୍ ଥିବା ଜଣାପଡିଥିଲା। ବର୍ତ୍ତମାନ କେଉଁ ରିପୋର୍ଟ ଠିକ୍ ତାହାକୁ ନେଇ ରୋଗୀ ଦ୍ୱନ୍ଦ୍ୱରେ। ଦୁଇଟି ସରକାରୀ ପରୀକ୍ଷା କେନ୍ଦ୍ରରେ ଅଲଗା ଅଲଗା ରିପୋର୍ଟ କଥା ଲୋକ ଲୋଚନକୁ ଆସିବା ପରେ ରୋଗୀମାନେ ମଧ୍ୟ ମେଡ଼ିକାଲରେ ପରୀକ୍ଷା କରିବାକୁ ନେଇ ଭୟଭୀତ ହୋଇପଡ଼ିଛନ୍ତି। ଏନେଇ ବିଭାଗୀୟ ଉଚ୍ଚ କର୍ତ୍ତୃପକ୍ଷ ଦୃଷ୍ଟି ଦେଇ ଆବଶ୍ୟକ ପଦକ୍ଷେପ ନେବାକୁ ସାଧାରଣରେ ଦାବି ହୋଇଛି। ଏନେଇ ଭଞ୍ଜନଗର ମେଡ଼ିକାଲ ଅଧୀକ୍ଷକ ଡ. ପ୍ରଫୁଲ କୁମାର ଗୌଡଙ୍କ ସହ ଯୋଗାଯୋଗ କରିବାରୁ ସେ ଏଠାରେ କହିଛନ୍ତି ଯେ, ଖାଲିଥିବା ଡାକ୍ତରୀ ପଦବୀ ପୂରଣ ପାଇଁ ପଦକ୍ଷେପ ନିଆଯାଇଛି। ନୂତନ ନିଯୁକ୍ତି ସମୟରେ ଏହି ସମସ୍ୟା ପ୍ରାୟ ଦୂରହେବ।
