ଜୁନାଗଡ,୨୯।୮(ଡି.ଏନ.ଏ.) ଚଳିତବର୍ଷ ଛାତ୍ର ସଂସଦ ନିର୍ବାଚନକୁ ବାତିଲ କରାଯିବା ପ୍ରତିବାଦରେ ଅଖିଳ ଭାରତୀୟ ଛାତ୍ର ସଂସଦ (ଏଆଇଏସଏଫ୍) ପକ୍ଷରୁ ବୁଧବାର କଳାହାଣ୍ଡି ଜିଲା ଜୁନାଗଡ ସହର ପ୍ରିୟଦର୍ଶିନୀ ଇନ୍ଦିରା ମହାବିଦ୍ୟାଳୟ ସମ୍ମୁଖରେ ବିକ୍ଷୋଭ ପ୍ରଦର୍ଶନ କରାଯାଇଛି। ଏହାସହ କଲେଜ ସମ୍ମୁଖରେ ଉଚ୍ଚଶିକ୍ଷା ମନ୍ତ୍ରୀ ଅରୁଣ କୁମାର ସାହୁଙ୍କ କୁଶ ପୁତ୍ତଲିକା ଦାହ କରାଯାଇଛି। ପ୍ରକାଶ ଯେ, ଚଳିତବର୍ଷ ଛାତ୍ର ସଂସଦ ନିର୍ବାଚନକୁ ବାତିଲ କରିବା ସମ୍ପୂର୍ଣ୍ଣ ଅଗଣତାନ୍ତ୍ରିକ ଓ ଛାତ୍ର ବିରୋଧି ଅଟେ। ରାଜ୍ୟ ସରକାର ଗତ କିଛିବର୍ଷ ଧରି ହିଂସା ଓ ବୃହତ୍ତର ଆଳ ଦେଖାଇ ଛାତ୍ର ସଂସଦ ନିର୍ବାଚନକୁ ବାତିଲ କରି ଆସୁଛନ୍ତି। ଯେଉଁ ଛାତ୍ର ସଂସଦ ନିର୍ବାଚନ ବିଟ୍ରିସ ଅମଳରେ ଅନେକ ତ୍ୟାଗ, ସଂଘର୍ଷ ରକ୍ତର ଜଳାଞ୍ଜଳୀ ଓ ବଳିଦାନ ଫଳରେ ଭାରତ ବର୍ଷର ଭବିଷ୍ୟତ ପିଲାମାନଙ୍କୁ ଗଣତାନ୍ତ୍ରିକ ଧାରାରେ ପରିଚିତ କରିବା ପାଇଁ ଏଆଇ ଏସଏଫ୍ ନେତୃତ୍ୱରେ ଲଢେଇ କରି ଛାତ୍ର ସମାଜ ହାସଲ କରିଥିଲେ ତାକୁ ସରକାର ଭୁଲୁଣ୍ଠିତ କରିଛନ୍ତି। ଏପରିକି ଛାତ୍ର ରାଜନିତୀରୁ ମନ୍ତ୍ରୀ ହୋଇଥିବା ରାଜ୍ୟ ସରକାରଙ୍କ ଉଚ୍ଚ ଶିକ୍ଷାମନ୍ତ୍ରୀ ଅରୁଣ ସାହୁ ନିଜେ ନିର୍ବାଚନ ବାତିଲ ପାଇଁ ନିଷ୍ପତ୍ତି ନେବା ଦୁର୍ଭାଗ୍ୟ ଜନକ ଅଟେ। ଯେଉଁ ହିଂସାର ଆଳ ଦେଖାଇ ନିର୍ବାଚନ ବାତିଲ କରାଯାଇଛି ସେହି ହିଂସାକୁ ଦୀର୍ଘ ବର୍ଷ ଧରି ସରକାରଙ୍କ ଗୃହ ବିଭାଗ ରୋକିବାରେ ବିଫଳ ହୋଇଛି ବୋଲି ସେମାନେ ବିଷେଦଗାର କରିଥିଲେ। କେନ୍ଦ୍ର ସରକାରଙ୍କ ଭଳି ରାଜ୍ୟ ସରକାର ମଧ୍ୟ ଗଣତନ୍ତ୍ରକୁ ହତ୍ୟା କରୁଛନ୍ତି। ଏଭଳି ଛାତ୍ର ବିରୋଧି ନିଷ୍ପତ୍ତିକୁ ରାଜ୍ୟ ସରକାର ତୁରନ୍ତ ପ୍ରତ୍ୟହାର ନ କଲେ ଆଗାମୀ ଦିନରେ ସରକାର ଛାତ୍ର ଆନ୍ଦୋଳନର ସମ୍ମୁଖୀନ ହେବେ ବୋଲି ଏଆଇଏସଏଫ ପକ୍ଷରୁ ଚେତାବନୀ ଦିଆଯାଇଛି। ଏହି ବିକ୍ଷୋଭ ପ୍ରଦର୍ଶନରେ ଏଆଇଏସଏଫ୍ର ଜିଲା ସଭାପତି ଜଗଦୀଶ ଦୁର୍ଗା, ଆବାହିକା ଝିଲି ବାଗ, ଜିଲା ପରିଷଦ ସଭ୍ୟ ରାଜାରାମ ଡଙ୍ଗରୀ, ନୀଳକଣ୍ଠ ନାଏକ, ଉପେନ୍ଦ୍ର କୁମାର, ପ୍ରଦ୍ୟୁମ୍ନ ସୁନାନୀ, ଜ୍ୟୋତି ପାନ, ପ୍ରହ୍ଲାଦ ମଙ୍ଗରାଜ, ମିଲି ବାଗ, ମସ୍ତକ ସୁନାନୀ, ଯମୁନା ବାଗ, ସୀମାଞ୍ଚଳ ସୁନାନୀ, ତୁଳସା ନାଗ, କୈଳାସ ବାଗ ପ୍ରମୁଖ ସାମିଲ ହୋଇଥିଲେ।
