ବାରିପଦା ଅଫିସ, ୨୫ା୨- ଦୀର୍ଘ ବର୍ଷ ହେଲା ପକ୍କା ଘରଟିଏ ପାଇଁ ବିଭିନ୍ନ ଅଧିକାରୀଙ୍କୁ ଗୁହାରି କରିିଥିଲେ ମଧ୍ୟ ଘର ଖଣ୍ଡିଏ ମିଳିଲା ନାହିଁ। ଫଳରେ ଏକ ଟାଇଲି ଛପର ଘରେ ମୁଣ୍ଡ ଗୁଞ୍ଜିଛନ୍ତି ଗୋଟିଏ ପରିବାରର ୬ ପ୍ରାଣୀ କୁଟୁମ୍ବ। ତାଙ୍କ ନାମରେ ପକ୍କା ଘର ମଞ୍ଜୁର ହୋଇ ଅର୍ଥ ଉଠାଇ ନିଆଯାଇଛି। ବ୍ଲକରୁ କର୍ମଚାରୀମାନେ ଘର ଦେଖି ଫଟୋ ଉଠାଇବା ପାଇଁ ଯାଇଥିତ୍ବା ବେଳେ ଘଟଣା ପଦାକୁ ଆସିଥିଲା। ଘର ନିର୍ମାଣ ପାଇଁ ଏହି ପରିବାର କାର୍ଯ୍ୟାଦେଶ କିମ୍ବା ଅର୍ଥ ପାଇ ନ ଥିବା ବେଳେ ତାଙ୍କ ନାମରେ କେହି ଟଙ୍କା ହଡପ କରିଥିବା ଅଭିଯୋଗ ହୋଇଛି। ବ୍ଲକର କେତେକ ଅସାଧୁ କର୍ମଚାରୀ ତାଙ୍କ ଘର ଚୋରି କରି ନେଇଥିବା କ୍ଷୋଭର ସହ କହିଛନ୍ତି ମୟୂରଭଞ୍ଜ ଜିଲା ଶୁଳିଆପଦା ବ୍ଲକ ଦେଉଳି ପଞ୍ଚାୟତ ଅନ୍ତର୍ଗତ ବିଜୟ କୃଷ୍ଣଚନ୍ଦ୍ରପୁର ଗ୍ରାମର ଅଞ୍ଜନା ନାୟକ।
ଆଦିବାସୀଙ୍କ ଉନ୍ନତି ନିମନ୍ତେ ନିଯୁକ୍ତି ପାଇଥିବା ଅଧିକାରୀମାନେ ଶେଷରେ ପକ୍କା ଘର ଲାଗି ହିତାଧିକାରୀଙ୍କ ଟଙ୍କା ଚଳୁ କରିଦେବା ଘଟଣାକୁ ଅଞ୍ଚଳବାସୀ ନିନ୍ଦା କରିଛନ୍ତି। ପ୍ରାୟ ୮ ମାସ ତଳେ ବ୍ଲକରୁ ଜଣେ କର୍ମଚାରୀ ଯାଇ ଅଞ୍ଜନାଙ୍କୁ ତାଙ୍କର ପକ୍କାର ଘର ହୋଇ ଯାଇଥିବା ବେଳେ କେଉଁଠି ଘର ହୋଇଛି ଦେଖାଇବାକୁ କହିଥିଲେ। ହେଲେ ତାଙ୍କର ପକ୍କା ଘର ହୋଇ ନ ଥିବା ଅଞ୍ଜନା କହିଥିଲେ। ସେହିଭଳି ତାଙ୍କୁ ପକ୍କା ଘର ନିର୍ମାଣ ଲାଗି ସରକାରଙ୍କ ପକ୍ଷରୁ କୌଣସି ସହାୟତା ମିଳି ନ ଥିବା କହିଥିଲେ। ପରେ ଏ ନେଇ ଖୋଳତାଡ଼ କରିବାରୁ ୨୦୧୫ରେ ଅଞ୍ଜନାଙ୍କ ନାମରେ ଇନ୍ଦିରା ଆବସ ଆସିଥିବା ବେଳେ ତାଙ୍କୁ ୭୫ ହଜାର ଟଙ୍କା ଅନୁଦାନ ରାଶି ପ୍ରଦାନ କରାଯାଇଥିବା ଜାଣିବାକୁ ପାଇଥିଲେ। ଏ ନେଇ ସରକାରୀ ତଥ୍ୟ ମଧ୍ୟ ରହିଛି। ତେବେ ସେ କିଛି ସହାୟତା ରାଶି ପାଇ ନ ଥିବା ବେଳେ କିପରି ତାଙ୍କ ନାମରେ ଘର ସମୂର୍ଣ୍ଣ ହୋଇଛି ବୋଲି ଏ ନେଇ ସେ ବିଡିଓଙ୍କୁ ପଚାରିଥିଲେ ହେଲେ କୌଣସି ସନ୍ତୋଷଜନକ ଉତ୍ତର ପାଇ ନ ଥିଲେ। ପରେ ଭାଜପା ନେତା ଡା. କୃଷ୍ଣଚନ୍ଦ୍ର ମହାପାତ୍ରଙ୍କୁ ଜଣାଇବାରୁ ଗତ ଅକ୍ଟୋବର ୧୫ ତାରିଖରେ ସେମାନେ ଶୁଳିଆପଦା ବିଡିଓଙ୍କୁ ଦେଖା କରିବା ପରେ ତାଙ୍କୁ ଘର ପ୍ରଦାନ କରାଯିବ ବୋଲି ବିଡିଓ ପ୍ରତିଶ୍ରୁତି ଦେଇଥିଲେ। ପ୍ରତିଶ୍ରୁତି ମିଳିବାର ୪ ମାସ ବିତି ଯାଇଥିଲେ ମଧ୍ୟ ଅଦ୍ୟାବଧି ଅଞ୍ଜନାଙ୍କୁ କୌଣସି ସହାୟତା ମିଳି ନାହିଁ। ଏହି ଘଟଣାକୁ ଭାଜପା କର୍ମକର୍ତ୍ତାମାନେ ନିନ୍ଦା କରିବା ସହିତ ସୋମବାର ଏ ନେଇ ବିଡିଓଙ୍କୁ ଦେଖା କରିଥିଲେ। ଯେଉଁ କର୍ମଚାରୀ କିମ୍ବା ଅଧିକାରୀ ତାଙ୍କ ଘର ଟଙ୍କା ଚଳୁ କରିଛନ୍ତି ତାଙ୍କ ବିରୋଧରେ କାର୍ଯ୍ୟାନୁଷ୍ଠାନ ପାଇଁ ଭାଜପା ଦାବି କରିଥିଲା। ଏ ନେଇ ଶୁଳିଆପଦା ବିଡିଓ ପରୀକ୍ଷିତ ଜେନାଙ୍କୁ ପଚାରିବାରୁ ସେ କୁହନ୍ତି ଯେ, ଏହା ମୋ ସମୟରେ ହୋଇନାହିଁ ଏବଂ ଏ ଦିଗରେ ସେ କିଛି କହିପାରିବେ ନାହିଁ ବୋଲି ସଫେଇ ଦେଇଥିଲେ। ଅନ୍ୟପକ୍ଷେ ଚର୍ଚ୍ଚା ହେଉଛି ଯେ ସେତେବେଳେ ଦାୟିତ୍ୱରେ ଥିବା ଅଧିକାରୀ ଓ କର୍ମଚାରୀମାନେ ପକ୍କା ଘର ପାଇଁ ବିଭିନ୍ନ ହିତାଧିକାରୀଙ୍କ ନାମରେ ଆସିଥିବା ଟଙ୍କାକୁ ଚଳୁ କରି ଦେଇଛନ୍ତି। ଏପରିକି ସେହି ସମୟର ଫାଇଲ୍କୁ ମଧ୍ୟ ଗାଏବ କରି ଦେଇଛନ୍ତି। ତାଙ୍କ ନାମରେ ଆସିଥିବା ପକ୍କା ଘର ଟଙ୍କା ଚଳୁ କରିଥିବା କର୍ମଚାରୀ କିମ୍ବା ଅଧିକାରୀଙ୍କ ଉପରେ କି କାର୍ଯ୍ୟାନୁଷ୍ଠାନ ହେବ ତାକୁ ଅନାଇ ବସିଛନ୍ତିି ଅଞ୍ଜନା। ସେହିଭଳି ତାଙ୍କୁ ପକ୍କା ଘର ପ୍ରଦାନ କରାଯିବା ନିମନ୍ତେ ସେ ଦାବି ମଧ୍ୟ କରିଛନ୍ତି।
