କିଭ,୧୩।୪: ୟୁକ୍ରେନର ଚେର୍ନୋବିଲ ଆଣବିକ କାରଖାନାର ପରିତ୍ୟକ୍ତ ଅଞ୍ଚଳରେ ଲାଗିଥିବା ନିଆଁ ଏବେ ଚିନ୍ତାର କାରଣ ପାଲଟିଛି। ଏହାକୁ ଆୟତ୍ତ କରିବାକୁ ଶହ ଶହ ଅଗ୍ନିଶମ କର୍ମଚାରୀ ସଂଘର୍ଷ ଜାରି ରଖିଛନ୍ତି। ଏହି ନିଆଁ ଉକ୍ତ ଅଞ୍ଚଳରେ ବିକିରଣ ସୃଷ୍ଟି କରୁଥିବାରୁ ଏହାକୁ ନେଇ ଅଧିକାରୀମାନେ ଭୟଭୀତ ହୋଇଯାଇଛନ୍ତି ବୋଲି କୁହାଯାଉଛି। ୧୯୮୬ରେ ହୋଇଥିବା ଦୁର୍ଘଟଣା ତୁଳନାରେ ବିକିରଣ ସ୍ତର ଯଥେଷ୍ଟ କମ୍ ଥିଲେ ମଧ୍ୟ ଏହା ବିପଦ ସୃଷ୍ଟି କରୁଥିବାରୁ ଅଧିକାରୀମାନେ ଭୟଭୀତ ହୋଇଯାଇଛନ୍ତି। ଗତ ଏକ ସପ୍ତାହ ହେବ ରୁଷ ଓ ବେଲାରୁସ ଆଡକୁ ପବନ ବହୁଥିବାରୁ ଏହା ମଧ୍ୟ ଭୟ ସୃଷ୍ଟି କରୁଛି। ଶୁକ୍ରବାର ୟୁକ୍ରେନର ରାଜଧାନି କିଭ ଆଡକୁ ପବନର ଦିଗ ପରିବର୍ତ୍ତନ କରିଥିବାରୁ ସହରରେ ବିକିରଣ ସ୍ତର ସ୍ବାଭାବିକ ରହିଛି, ଯାହାର ଜନସଂଖ୍ୟା ପ୍ରୟା ୩ ନିୟୁତ ବୋଲି କୁହାଯାଇଛି। କିନ୍ତୁ ଶନିବାର ପବନର ବେଗ ବଢିବାରୁ ଏହା ପରମାଣୁ କାରଖାନାର ଅବଶିଷ୍ଟ ଅଂଶ ଓ ଅନ୍ୟ ଉପକରଣରେ ନିଆଁ ବ୍ୟାପିପାରେ ବୋଲି ଅନୁମାନ କରାଯାଉଛି। ଟେଲିଫୋନଯୋଗେ ଦେଇଥିବା ଏକ ସାକ୍ଷାତକାରରେ ଉକ୍ତ ଅଞ୍ଚଳର ତଦାରଖ କରୁଥିବା ଏଜେନ୍ସିର କାର୍ଯ୍ୟନିର୍ବାହୀ ମୁଖ୍ୟ କ୍ୟାଟରିନା ପାଭ୍ଲୋଭା କହିଛନ୍ତି। ସୂଚନାଯୋଗ୍ୟ, ୧୯୮୬ ଚେର୍ନୋବିଲ ବିପର୍ଯ୍ୟୟ ପରେ କର୍ତ୍ତୃପକ୍ଷ ପ୍ଲାଣ୍ଟର ଚାରିପାଖରେ ଏକ କ୍ଷେତ୍ର ସୃଷ୍ଟି କରିଥିଲେ। ଯାହା ଜୋନ ଅଫ୍ ଏଲିଏନେଶନ ଭାବେ ଜଣାଶୁଣା। ପ୍ରାୟ ୩୦ କିଲୋମିଟର ବ୍ୟାସାର୍ଦ୍ଧ ବିଶିଷ୍ଟ ଏକ ବୃତ୍ତାକାର, କଣ୍ଟା ବାଡରେ ଏହାକୁ ଘେରାଯାଇଥିଲା। ଏହି ଜୋନକୁ ପ୍ରବେଶ କରିବାକୁ କମ୍ ଶ୍ରମିକଙ୍କୁ ଅନୁମତି ମିଳିଥିଲା। ସେହି ଅଞ୍ଚଳକୁ କେବଳ ସାଇଟ୍ ପରିଚାଳନା କରୁଥିବା ଶ୍ରମିକ ଓ ପର୍ଯ୍ୟଟକଙ୍କୁ ପରିଭ୍ରମଣ କରୁଥିବା ଗାଇଡଙ୍କୁ ଅନୁମତି ମିଳିଥିଲା।
