ଭୁବନେଶ୍ୱର, ୧୧ା୧(ବ୍ୟୁରୋ): କେତକୀ ଫାଉଣ୍ଡେଶନ୍ ଟ୍ରଷ୍ଟ ପକ୍ଷରୁ ଶୁକ୍ରବାର ରାଷ୍ଟ୍ରୀୟ ଲଳିତ କଳା ଏକାଡେମି ପରିସରରେ ‘ଆଇ ଆମ୍ ୱିଥ୍ ନେଚର’ ଶୀର୍ଷକ ଚିତ୍ରକଳା ପ୍ରଦର୍ଶନୀ ଉଦ୍ଘାଟିତ ହୋଇଯାଇଛି। ଏଥିରେ ଦେଶର ବିଭିନ୍ନ ସ୍ଥାନରେ ରହୁଥିବା ୧୦ ବିଶିଷ୍ଟ ଓଡ଼ିଆ ଚିତ୍ରଶିଳ୍ପୀଙ୍କ ଚିତ୍ରକଳା ପ୍ରଦର୍ଶିତ ହେଉଛି। ଏହି ଅବସରରେ ପୂର୍ବରୁ ଶିମିଳିପାଳ ଅଭୟାରଣ୍ୟର ପ୍ରାକୃତିକ ପରିବେଶରେ ଆୟୋଜିତ ୫ଦିନିଆ କର୍ମଶାଳାରେ ଶିଳ୍ପୀମାନେ ଆଙ୍କିଥିବା ୨୦ ଚିତ୍ରକଳାକୁ ନେଇ ପ୍ରସ୍ତୁତ ଏକ କ୍ୟାଟ୍ଲଗ୍ ଉନ୍ମୋଚନ କରାଯାଇଛି। ଚିତ୍ରରେ ଶିମିଳିପାଳ ଅଭୟାରଣ୍ୟର ଅପରୂପ ସୌନ୍ଦର୍ଯ୍ୟର ଶୋଭା ଦେଖିବାକୁ ମିଳିଥିଲା। ପ୍ରକୃତି ଓ ଜୀବଜନ୍ତୁଙ୍କ ନିବିଡ଼ ସମ୍ପର୍କ ଚିତ୍ରଶିଳ୍ପୀଙ୍କ ରଙ୍ଗତୁଳୀ ବୟାନ କରୁଥିଲା। ଏଥିସହ କର୍ମଶାଳା ସମୟରେ ଶିମିଳିପାଳର ସ୍ଥାନୀୟ ବିଦ୍ୟାଳୟର ଛାତ୍ରୀଛାତ୍ରଙ୍କୁ ତଥା ଲୁଲୁଙ୍ଗ ଗ୍ରାମର ମହିଳାମାନଙ୍କୁ ନେଇ ଆୟୋଜିତ ଏକ ସ୍ବତନ୍ତ୍ର କାର୍ଯ୍ୟକ୍ରମର ଚିତ୍ରକଳା ଓ ଝୋଟି ଚିତାଗୁଡ଼ିକୁ ପ୍ରଦର୍ଶନୀରେ ସ୍ଥାନିତ କରାଯାଇଛି। ପୂର୍ବତନ ଭାରତୀୟ ରାଷ୍ଟ୍ରଦୂତ ଲଳିତ ମାନସିଂହ ଓ ଡ. ଜେ.ପି. ଦାସ ଅତିଥିଭାବେ ଯୋଗଦେଇ ପ୍ରଦର୍ଶନୀକୁ ଉଦ୍ଘାଟନ କରିଥିଲେ। ବରିଷ୍ଠ ଶିଳ୍ପୀ ରାମହରି ଜେନା କାର୍ଯ୍ୟକ୍ରମ ସଂଯୋଜନା କରିଥିଲେ। ଆସନ୍ତା ୧୫ ତାରିଖ ଯାଏ ପ୍ରଦର୍ଶନୀ ଚାଲିବ।
