ଗୁଡ଼ଭେଲା, ୧୭।୨ (ଡି.ଏନ୍.ଏ.)- ବଲାଙ୍ଗୀର ଜିଲା ତୁଷୁରା ସହରର ଡାକ୍ତରଖାନା ପାସେ ଗୁଟେ ଘର ଭଡ଼ା ନେଇ ରହୁଛନ୍ ସମୀର ଖାନ୍(୪୫)। ପାଖାପାଖି ବଛ୍ରେ ହେଲା ସେ କର୍କଟ ରୋଗ୍ରେ ପୀଡ଼ିତ ଅଛନ୍। ହେଲେ ଟଁକା ପଏସା ଅଭାବୁ ଚିକିଛା କରେଇ ନାଇଁପାରବାର। ଏନ୍ତାଥି ସେ ନିଜର ଭାଏଗ୍କେ ଆଦ୍ରି ଘରେ ପଡ଼ି ରହିଛନ୍।
ସୂଚନା ଅନ୍ସାରେ ବିହାର ରାଏଜ୍ ଚିତ୍ରା ଗଁାର ମୂଲ ବାସିନ୍ଦା ହେଉଛନ୍ ସମୀର ଖାନ୍(୪୫)। ଆଏଜ୍କେ ୧୨ ବଛର ତଲେ ପେଟ୍ପାଟନାର ଲାଗି ଓଡ଼ିଶାକେ ପଲେଇ ଆସିଥିଲେ। ଅଂଚଲରେ ସେ ଝନେ ମାର୍ବଲ ମିସ୍ତ୍ରୀ ହିସାବେ କାମ୍ କରି ନିଜର ପେଟ୍ ପାଲୁଥିଲେ। ପଛେ କପସିଲା ଗଁାର ବନିତାକୁଁ ସେ ଭଲପାଇ ବିହା ହେଇ ଘର ସଁସାର କରିଥିଲେ। ଏହେଦେ ତାକର ପରିବାର କହେଲେ ମାଏକିନା ବନିତା(୩୭), ଦୁଇ ଝି’ ପୁନମ(୧୨) ଆର ଆଲିସା(୧୦)କୁଁ ନେଇ ସଁସାର। ହଁସ୍ଖୁସିରେ ସମୀରକଁର ସଁସାର ରଥ ଗଡ଼ି ଯାଉଥିଲା। ହେଲେ ଆଏଜ୍କେ ୬ ମାସ୍ ତଲେ ସମୀରକଁର ଟୁଁଡ଼େ ଗୁଟେ ଘା’ ହେଇଥିଲା। ମାଏକିନା ବନିତା ଧାରଉଧାର କରି ସମୀରକୁଁ ଚିକିଛା ଲାଗି ତୁଷୁରା, ବଲାଙ୍ଗୀର, ବୁର୍ଲା ଆର ପଛେ ୨ା୧୧ା୨୦୧୯ରେ କଟକ ବଡ଼ ଡାକ୍ତରଖାନାକେ ନେଇଥିଲେ। ସେଠାନେ ପରୀକ୍ଷାରୁ ଜନାପଡ଼ଲା ଯେ ସମୀର କର୍କଟ ରୋଗ୍ରେ ପୀଡ଼ିତ ଅଛନ୍। ହେଲେ ଟଁକା ପଏସା ଅଭାବୁ ଦୁଇ ମାଏଝି ମୁନୁଷ୍ ଘରକେ ଫିରିଆଏଲେ। ସେମାନେ ଚିକିଛା ସାହାଯ୍ ଲାଗି ଏନ୍ଏସି ଅଧ୍ୟକ୍ଷା, ବ୍ଲକ ଅଧ୍ୟକ୍ଷ, ଶିଶୁ ମହିଲା ବିକାଶ ମନ୍ତ୍ରୀକୁଁ ଭେଟି ନିଜର ଦୁଖ୍ ବଖାନିଥିଲେ। ମନ୍ତ୍ରୀକଁର ସୁପାରିଶରେ ସମୀର ଚିକିଛା ସାହାଯ୍ ହିସାବେ ୧୫ା୨ା୨୦୨୦ ଶନିବାର ଦିନ ମୁଖ୍ୟମନ୍ତ୍ରୀ ରିଲିଫ ଫଣ୍ଡରୁ ୧୫ ହଜାର ଟଁକା ପାଇଛନ୍। ହେଲେ କର୍କଟ ରୋଗ୍ ଲେଖେଁ ଗୁଟେ ଅମାନତିଆ ରୋଗ୍କେ ୧୫ ହଜାର ଟଁକା ଚିକିଛା ସାହାଯ୍ କାଣା ହେବା। ଏହେଦେ ଭଗବାନ ନ ଆମର ସାହାଭରସା ବଲି ବନିତା କହିଛନ୍। ଇଆଡ଼େ ପରିବାରଟା ନିହାତି ଗରିବ୍, ଜମିବାଡ଼ି, ସଁପତି ବଲି କିଛି ନାଇଁ। ସମୀର ଘରର ଝନେ ବଲି ରୁଜ୍ଗାରିଆ ଲୋକ୍। ତାକର କମାନିରେ ପରିବାର ଚଲବାର ସଂଗେ ଝି’ମାନକର ପାଠ୍ ପଢ଼ା ଖରଚ୍ ତୁଲଉଥିଲେ। ଏହେଦେ ସମୀରକଁର ଚିକିଛା ଲାଗି କାହାକେ କହିମି, ଆମେ ଗରିବ୍ ଲୋକ୍, କିଏ ସାହାଯ୍ କରବା। ଏନ୍ତା ସବୁ ଭାବି ବନିତା ଭାଂଗି ପଡ଼ିଛନ୍। ଇ ବାବ୍ଦେ ଗୁଡ଼ଭେଲା ଗୋଷ୍ଠୀ ସ୍ବାସ୍ଥ୍ୟକେନ୍ଦ୍ରର ଚିକିଛା ଅଧ୍କାରୀ ସୁମିତ ମେହେରକୁଁ ପଚ୍ରାଲାରୁ ମୁଇଁ ଘଟନା ବାବ୍ଦେ ନାଇଁ ଜାନି। ଘଟନାର ତଦଁତ୍ କରି ପଦକ୍ଷେପ ନେମି ବଲି ସେ କହିଥିଲେ। ଇ ଦିଗେ ଜିଲା ପରଶାସନ ଆର ସ୍ବାସ୍ଥ୍ୟ ବିଭାଗ ଦୁରୁଷ୍ଟି ଦେଇ ସମୀରକୁଁ ସରକାରୀ ଚିକିଛା ସାହାଯ୍ ଯୁଗେଇ ଦେବାକେ ଅଂଚଲର ବୁଧିଜୀବୀ ମହଲ ଦାବି କରିଛନ୍।
