ବାରିପଦା ଅଫିସ,୬ା୧୨- ମୟୂରଭଞ୍ଜ ଜିଲା ବାରିପଦାରେ କୃଷକମାନଙ୍କୁ ପୁରୁଣା ଯନ୍ତ୍ରପାତିକୁ ରଙ୍ଗ ଦେଇ ନୂଆ କରି ବିକ୍ରୟ କରାଯାଉଛି। ଏହାକୁ କୃଷକ ମହଲରେ ବିରୋଧ କରାଯାଇଛି। ସୂଚନା ଅନୁଯାୟୀ ବାରିପଦା ଆଶୀର୍ବାଦ ଛକଠାରେ କୃଷି ବିଭାଗର ନିର୍ବାହୀ ଯନ୍ତ୍ରୀଙ୍କ କାର୍ଯ୍ୟାଳୟ ରହିଛି। ଏହି କାର୍ଯ୍ୟାଳୟ ଜରିଆରେ କୃଷକମାନଙ୍କୁ ବିଭିନ୍ନ ପ୍ରକାର ଆଧୁନିକ ଯନ୍ତ୍ରପାତି ରିହାତିରେ ପ୍ରଦାନ କରାଯାଏ। ଗତ ବର୍ଷ ଚାଷୀମାନଙ୍କୁ ରିହାତି ମୂଲ୍ୟରେ ପ୍ରଦାନ କରିବା ପାଇଁ ପେଡାଲ ପେଡି ଥ୍ରେସର ମେଶିନ କୃଷି ବିଭାଗ ପକ୍ଷରୁ ଅଣାଯାଇଥିଲା। ଏହାକୁ ସେତେବେଳେ ବହୁ ସଂଖ୍ୟାରେ କୃଷକମାନେ ନେଇଥିଲେ। ଏହାବାଦ ବହୁ ମେଶିନ ବଳକା ରହି ଯାଇଥିଲା। ଏହି ପୁରୁଣା ମେଶିନଗୁଡିକରେ କଳଙ୍କି ଲାଗି ଯାଇଛି। ଯାହା ବ୍ୟବହାର ଉପଯୋଗୀ ନୁହେଁ। ତେବେ ଏହି ମେଶିନ ଗୁଡିକୁ ଯୋଗାଣକାରୀ ସଂସ୍ଥାକୁ ଫେରାଇ ଚଳିତ ବର୍ଷ ନୂତନ ମେଶିନ ଅଣାଯିବା କଥା। ହେଲେ କର୍ତ୍ତୃପକ୍ଷ ଏଭଳି କରିନାହାନ୍ତି। ପୁରୁଣା ମେଶିନକୁ ନୂଆ କରିବା ପାଇଁ ସେଗୁଡିକୁ ରଙ୍ଗ କରାଯାଉଛି। ଏହା ପୁଣି କୃଷି ବିଭାଗ ନିର୍ବାହୀ ଅଧିକାରୀଙ୍କ କାର୍ଯ୍ୟାଳୟ ପରିସରରେ କରାଯାଉଛି। ଏହି ମେଶିନକୁ ଚାଷୀ ନେଇ ବ୍ୟବହାର କରିଲେ ଅଳ୍ପ ଦିନରେ ନଷ୍ଟ ହେବାର ସମ୍ଭାବନା ରହିଛି।
ଏ ନେଇ କୃଷି ବିଭାଗ ନିର୍ବାହୀ ଯନ୍ତ୍ରୀ ପିକେ ବେହେରାଙ୍କୁ ପଚାରିବାରୁ ଗତ ବର୍ଷ ଆସିଥିବା କେତେକ ପୁରୁଣା ମେଶିନ ରହି ଯାଇଛି। ଏହି ମେଶିନଗୁଡିକୁ ଯୋଗାଣକାରୀ ସଂସ୍ଥା ରଙ୍ଗ କରୁଛି। ପୁରୁଣା ଦେଖା ଯାଉଥିବାରୁ ଏହାକୁ କୃଷକମାନେ ନେଉ ନାହାନ୍ତି। ରଙ୍ଗ କରିବା ପରେ କୃଷକମାନଙ୍କୁ ପ୍ରଦାନ କରାଯିବ ବୋଲି ଅତି ହାଲୁକା ଭାବେ କହିଛନ୍ତି। ଏଦିଗରେ ବିଭାଗୀୟ ଉଚ୍ଚ ଅଧିକାରୀ ଓ ଜିଲାପାଳ ଦୃଷ୍ଟି ଦେଲେ ଜିଲାର ଚାଷୀକୁଳ ଠକେଇର ଶିକାର ହେବାରୁ ବଞ୍ଚିତ ହେବେ।
