ଖଇରପୁଟ/ଗୋବିନ୍ଦପାଲ୍ଲି, ୨ା୬ (ଡି.ଏନ୍.ଏ.): ଚଢେଇ ରୂପରେ ଆସିଥିଲା ମୃତ୍ୟୁଦୂତ। ସେଇ ଚଢେଇ ଧରିବା ପାଇଁ ତା ପଛରେ ଗୋଡାଇ ଥିଲେ ୭ବର୍ଷର ବଣ୍ଡା ବାଳକ। ଚଢେଇ ଯାଇ ଟ୍ରାନ୍ସଫର୍ମର ଉପରେ ବସିଥିଲା। ବାଳକ ଜଣଙ୍କ ଟ୍ରାନ୍ସଫର୍ମର ଉପରେ ଚଢ଼ିବା କ୍ଷଣି ବିଦ୍ୟୁତ୍ ଆଘାତରେ ଲିଭିଗଲା ନିରୀହ ବାଳକର ଜୀବନ ଦୀପ। କାଳର ଏଭଳି ଆକସ୍ମିକ ଖେଳ ମାଲକାନଗିରି ଜିଲା ଖଇରପୁଟରେ ଦେଖିବାକୁ ମିଳିଛି।
ସୂଚନାନୁଯାୟୀ ଖଇରପୁଟ ବ୍ଲକ କଦମଗୁଡା ପଞ୍ଚାୟତ ପାକନାଗୁଡ଼ା ଗାଁର ରାମଚନ୍ଦ୍ର ଶିଶାଙ୍କ ପୁଅ ରାଜେନ୍ଦ୍ର(୭) ସାଙ୍ଗମାନଙ୍କ ସହ ରବିବାର ସକାଳେ ଖେଳୁଥିବାବେଳେ ଏକ ଚଢେଇ ଦେଖି ତା ପଛରେ ଗୋଡାଇଥିଲେ। ଚଢେଇଟି ଉଡିଯାଇ ଗାଁରେ ଥିବା ଟ୍ରାନ୍ସଫର୍ମର ଉପରେ ବସିଯାଇଥିଲା। ଚଢେଇକୁ ଧରିବାକୁ ରାଜେନ୍ଦ୍ର ଟ୍ରାନ୍ସଫର୍ମର ଉପରେ ଚଢିବାବେଳେ ବିଦ୍ୟୁତ୍ ସଂସ୍ପର୍ଶରେ ଆସିବାରୁ ତାଙ୍କର ମୃତ୍ୟୁ ହୋଇଥିଲା। କରେଣ୍ଟ ନ ଥିବାବେଳେ ରାଜେନ୍ଦ୍ର ଟାନ୍ସଫର୍ମର ଉପରେ ଚଢିଥିଲେ। କିନ୍ତୁ ହଠାତ୍ କରେଣ୍ଟ ଆସିଯିବାରୁ ତାଙ୍କର ମୃତ୍ୟୁ ହୋଇଥିଲା। ଏହାକୁ ନେଇ ସ୍ଥାନୀୟ ଅଞ୍ଚଳରେ ଉତ୍ତେଜନା ଦେଖାଦେଇଛି। ମୁଦୁଲିପଡା ପୋଲିସ ଓ ବିଦ୍ୟୁତ୍ ବିଭାଗ କର୍ମଚାରୀ ଘଟଣାସ୍ଥଳରେ ପହଞ୍ଚତ୍ଥିଲେ। ବିଦ୍ୟୁତ ବିଭାଗ କର୍ମଚାରୀ ମୃତଦେହକୁ ଟାନ୍ସଫର୍ମର ତଳକୁ ଆଣିଥିଲେ। ଶୋକସନ୍ତପ୍ତ ପରିବାର ଓ ଗ୍ରାମବାସୀ ଘଟଣାସ୍ଥଳରେ ରୁଣ୍ଡ ହୋଇ କ୍ଷତିପୂରଣ ଦାବି କରିଥିଲେ। ପୋଲିସ ସେମାନଙ୍କୁ ବୁଝାଶୁଝା କରି ମୃତଦେହ ବ୍ୟବଚ୍ଛେଦ କରାଇବା ପରେ ପରିବାରକୁ ହସ୍ତାନ୍ତର କରିଛି। ପରେ ଏକ ଶୋକାକୁଳ ପରିବେଶରେ ରାଜେନ୍ଦ୍ରଙ୍କ ମୃତଦେହର ସତ୍କାର କରାଯାଇଥିଲା।
