ଝୁମ୍ପୁରା, ୩୦।୬(ଡି.ଏନ.ଏ.)-ଝୁମ୍ପୁରା ବ୍ଲକ ଅନ୍ତର୍ଗତ ନହବେଡା ପଞ୍ଚାୟତର ଜଙ୍ଗଲାଞ୍ଚଳରେ ଅବସ୍ଥିତ ଘୁଣ୍ଟିପଶି ଗ୍ରାମ। ନହବେଡା ଗ୍ରାମ ପଞ୍ଚାୟତର ୱାର୍ଡ ନଂ ୧୨ରେ ଏହି ଗ୍ରାମଟି ରହିଥିବା ବେଳେ ପ୍ରାୟ ୪୦୦ରୁ ଊର୍ଦ୍ଧ୍ୱ ଲୋକ ବାସ କରନ୍ତି। ଚିର ଅବହେଳିତ ଏହି ଗ୍ରାମରେ ନାନବିଧ ସମସ୍ୟା ରହିଛି। ରାସ୍ତା, ପାନୀୟଜଳ, ବିଦ୍ୟୁତ, ସ୍ବାସ୍ଥ୍ୟସେବା ପାଇଁ ସବୁ ସମୟରେ ଏଠାକାର ବାସିନ୍ଦା ସବୁବେଳେ ହଇରାଣ ହେଉଛନ୍ତି। ଏନେଇ ମଧ୍ୟ ପ୍ରଶାସନ ନିକଟରେ ବାରମ୍ବାର ଅଭିଯୋଗ କରି ଚାଲିଛନ୍ତି। ବାରମ୍ବାର ଅଭିଯୋଗ ପରେ ପାନୀୟ ଜଳର ଗୁଜୁରାଣ ମେଣ୍ଟାଇବା ପାଇଁ ୨ଟି ନଳକୂପ ଖୋଳାଯିବାର ରହିଥିବା ନହବେଡା ପଞ୍ଚୟତ କାର୍ଯ୍ୟାଳୟ ସୂତ୍ରରୁ ଜଣାପଡିଛି।
ଅନ୍ୟ ପକ୍ଷରେ ଟେଣ୍ଡର କରାଯାଇ ଗ୍ରାମ୍ୟ ଉନ୍ନୟନ ବିଭାଗ ଦ୍ୱାରା ପ୍ରଧାନମନ୍ତ୍ରୀ ସଡକ ଯୋଜନାରେ ଗ୍ରାମ୍ୟ ରାସ୍ତା ନିର୍ମାଣାଧୀନ ରହିଛି। ପୂର୍ତ୍ତ ବିଭାଗର ରାସ୍ତା ଠାରୁ ଘୁଣ୍ଟିପଶି ଗ୍ରାମକୁ ୨କି.ମି. ୪୦ମିଟର ସଂଯୋଗ ରାସ୍ତା ପାଇଁ ବ୍ୟୟ ବରାଦ ୭୫ଲକ୍ଷରୁ ଊର୍ଦ୍ଧ୍ୱ ଟଙ୍କା ରହିଥିବା ବେଳେ, ମରାମତି ପାଇଁ ରହିଛି ୫ଲକ୍ଷରୁ ଊର୍ଦ୍ଧ୍ୱ। ଯାହାକି ଅସମ୍ପୂର୍ଣ୍ଣ ଲେଖାଥିବା ସୂଚନା ଫଳକରୁ ଜଣାପଡିଛି। ତେବେ ପ୍ରଧାନ ମନ୍ତ୍ରୀ ସଡକ ଯୋଜନାରେ ରାସ୍ତା କାମ ନିର୍ମାଣାଧୀନ ରହିଥିବା ବେଳେ ନିମ୍ନମାନର ରାସ୍ତାକାମ, ପିଚୁର ପରିମାଣ କମ ଓ ଉଠିଯାଉଥିବା, ଏଷ୍ଟିମେଟ ଅନୁସାରେ କାମ ନ ହେବା ଆଦିକୁ ନେଇ ଗାଁ ଲୋକ ତାତି ଉଠିଛନ୍ତି। ଏ ନେଇ ଗ୍ରାମବାସୀଙ୍କ ପକ୍ଷରୁ ଗ୍ରାମ୍ୟ ଉନ୍ନୟନ ବିଭାଗରେ ଅଭିଯୋଗ ହୋଇଛି। ରାସ୍ତା ଅବରୋଧ ପର୍ଯ୍ୟନ୍ତ କଥାଯାଇଛି। ଏହା ମଧ୍ୟରେ ଏକ ସପ୍ତାହରୁ ବେଶି ସମୟ ଚାଲିଗଲାଣି। ଗାଁ ଲୋକଙ୍କର ଅସନ୍ତୋଷ ଦେଖି ଟେଣ୍ଡର ନେଇଥିବା ଠିକାଦାର କାମ ବନ୍ଦ କରି ଦେଇଛି। ଏତେ ସବୁ ପରେ ମଧ୍ୟ ସମାଧାନ ହୋଇ ପାରୁନାହିଁ।
ଏ ସମ୍ପର୍କରେ ଝୁମ୍ପୁରାସ୍ଥିତ ଗ୍ରାମ୍ୟ ଉନ୍ନୟନ ବିଭାଗର ସହକାରୀ ନିର୍ବାହୀ ଯନ୍ତ୍ରୀ ବଳଭଦ୍ର ମାରାଣ୍ଡିଙ୍କୁ ପଚାରିବାରୁ ଲୋକଙ୍କର ଅଭିଯୋଗ ମିଳିବା ପରେ ମୁଁ ରାସ୍ତା ନିର୍ମାଣ ତଦାରଖ କରିଛି। ଏଷ୍ଟିମେଟ ଅନୁସାରେ କାମ ଚାଲିଛି। ରାସ୍ତା ଉପରେ ପିଚୁ କାମ ଯେପରି କରାଯିବା କଥା ସେହିପରି ହେଉଛି ବୋଲି ସେ କହିଛନ୍ତି।
