ହାତୀଓଟ,୨୦ା୬-ଗଞ୍ଜାମ ଜିଲା ପୋଲସରା ଥାନା ପାଣ୍ଡିରିପଡ଼ା ପଞ୍ଚାୟତ ଇଚ୍ଛାପୁର ଗ୍ରାମରେ ମଙ୍ଗଳବାର ରାତିରେ ଗୋଷ୍ଠୀ ସଂଘର୍ଷ ଘଟିଛି। ଏଥିରେ ଜଣଙ୍କର ମୃତ୍ୟୁ ହୋଇଥିବାବେଳେ ତିନି ଜଣ ଆହତ ହୋଇଛନ୍ତି। ମୃତକ ହେଲେ ପାଣ୍ଡିରିପଡ଼ାର ପୂର୍ବତନ ସରପଞ୍ଚ ଦଣ୍ଡପାଣି ନାୟକଙ୍କ ପୁଅ ସୁଶାନ୍ତ। ଆହତମାନେ ହେଲେ ପ୍ରମୋଦ ନାୟକ, ଉପେନ୍ଦ୍ର ବେହେରା ଓ ପୂର୍ଣ୍ଣ ନାୟକ। ଗୁରୁତର ଅବସ୍ଥାରେ ସୁଶାନ୍ତ ଓ ୩ ଆହତଙ୍କୁ ପ୍ରଥମେ ପୋଲସରା ଡାକ୍ତରଖାନା ଓ ପରେ ବ୍ରହ୍ମପୁର ବଡ ମେଡିକାଲକୁ ନିଆଯାଇଥିଲା। ସେଠାରେ ସୁଶାନ୍ତଙ୍କୁ ଡାକ୍ତର ମୃତ ଘୋଷଣା କରିଥିଲେ। ପୂର୍ବ ଶତ୍ରୁତାରୁ ଏହି ଗୋଷ୍ଠୀ ସଂଘର୍ଷ ଘଟିଥିବା ଆଡିଶନାଲ୍ ଏସ୍ପି ସୀତାରାମ ଶତପଥୀ ସୂଚନା ଦେଇଛନ୍ତି।
ପୋଲସରା ଥାନାଧିକାରୀ ଜିତେନ୍ଦ୍ର କୁମାର ମଲିକଙ୍କ ସୂଚନା ପ୍ରକାରେ, ସାହି ମଝିରେ ଉପେନ୍ଦ୍ର ଦ୍ରୁତ ଗତିରେ ବାଇକ ଚଳାଇ ଆସୁଥିଲେ। ପୂର୍ଣ୍ଣଙ୍କ ପୁଅ ରଙ୍କନିଧି ଏହାକୁ ବିରୋଧ କରିବାରୁ ଉଭୟଙ୍କ ମଧ୍ୟରେ ପାଟିତୁଣ୍ଡ ହୋଇଥିଲା। ଉପେନ୍ଦ୍ର ଯାଇ ସୁଶାନ୍ତଙ୍କୁ ଏକ ସମ୍ପର୍କରେ କହିଥିଲେ। ପରେ ସୁଶାନ୍ତ ୪ଟି ବାଇକରେ ତାଙ୍କ ସହଯୋଗୀଙ୍କ ସହ ଆସି ପୂର୍ଣ୍ଣଙ୍କ ଘରେ ପଶି ପାଟିତୁଣ୍ଡ କରିଥିଲେ। ପରେ ଉଭୟ ଗୋଷ୍ଠୀ ମୁହଁାମୁହିଁ ହୋଇଥିଲେ। ଆକ୍ରମଣ ଓ ପ୍ରତିଆକ୍ରମଣରେ ସୁଶାନ୍ତ, ଉପେନ୍ଦ୍ର, ପ୍ରମୋଦ, ପୂର୍ଣ୍ଣ ପ୍ରମୁଖ ଆହତ ହୋଇଥିଲେ।
ପୂର୍ବ ଶତ୍ରୁତାରୁ ଏହି ହତ୍ୟାକାଣ୍ଡ ଘଟିଥିବା ପୋଲିସ କହୁଥିବାବେଳେ ମୃତ ସୁଶାନ୍ତଙ୍କ ବାପା ତଥା ପୂର୍ବତନ ସରପଞ୍ଚ ଦଣ୍ଡପାଣି ଏହାକୁ ରାଜନୈତିକ ହତ୍ୟାକାଣ୍ଡ ବୋଲି କହିଛନ୍ତି। ଷଡ଼ଯନ୍ତ୍ର କରି ମୋ ପୁଅକୁ ନିଦ୍ଦର୍ର୍ିଷ୍ଟ ଏକ ରାଜନୈତିକ ଦଳର ଗୁଣ୍ଡାମାନେ ହତ୍ୟା କରିଛନ୍ତି ବୋଲି ସେ ପ୍ରତିକ୍ରିୟାରେ ପ୍ରକାଶ କରିଛନ୍ତି। ଘଟଣା ପରେ ଆଡିଶନାଲ ଏସ୍ପି ସୀତାରାମ ଶତପଥୀ, ଏସଡିପିଓ ନିମାଇଁ ଚରଣ ସେଠୀ, ବୁଗୁଡ଼ା ଥାନାଧିକାରୀ ସିତାଂଶୁ ମାନ୍ଧାତା, କବିସୂର୍ଯ୍ୟନଗର ଥାନାଧିକାରୀ ତପନ କୁମାର ପତି, ଛତ୍ରପୁର ଥାନାଧିକାରୀ ପ୍ରିୟସ ରଞ୍ଜନ ଛୋଟରାୟ ପ୍ରମୁଖଙ୍କ ସମେତ ୪ ପ୍ଲାଟୁନ ଫୋର୍ସ ମୁତୟନ ରହିଛନ୍ତି। ପୋଲିସ ଘଟଣାସ୍ଥଳରୁ ୪ ବାଇକ, ୨ ଖଣ୍ଡା, କାତି ଜବତ କରିଛି। କେତେଜଣ ବ୍ୟକ୍ତିଙ୍କୁ ଥାନାକୁ ଆଣି ପଚରାଉଚରା ମଧ୍ୟ ଚଳାଇଛି। ଖବର ଲେଖାହେବା ସୁଦ୍ଧା ଥାନାରେ କୌଣସି ଅଭିଯୋଗ ହୋଇନଥିବା ଥାନାଧିକାରୀ ମଲ୍ଲିକ ସୂଚନା ଦେଇଛନ୍ତି। ଘଟଣାସ୍ଥଳରେ ଚାପା ଉତ୍ତେଜନା ଲାଗି ରହିଥିବାବେଳେ ପୋଲିସ ତୀକ୍ଷ୍ଣ ଦୃଷ୍ଟି ରଖିଥିବା ଥାନା ଅଧିକାରୀ ସୂଚନା ଦେଇଛନ୍ତି।