ବ୍ରହ୍ମପୁର ଅଫିସ,୨୯ା୯-ବ୍ରହ୍ମପୁର ଗୋଷାଣୀନୂଆଗଁ।ର ପ୍ରସିଦ୍ଧ କାଳୁଆ ଯାତ୍ରା ଶନିବାର ତଥା ପବିତ୍ର ମହାଳୟା ଅମବାସ୍ୟା ରାତିରୁ ଆରମ୍ଭ ହୋଇଛି । ଏହା କୁମାର ପୂର୍ଣ୍ଣିମା ରାତିରେ ଉଦ୍ଯାପିତ ହେବାର ପରମ୍ପରା ରହିଛି । ଯାତ୍ରା ପାଇଁ ଗୋଷାଣୀନୂଆଗଁ। ଉତ୍ସବମୁଖର ହୋଇଛି । ସବୁ ସାହିରେ ରଂଗୀନ ଆଲୋକ ଝଲସୁଛି। ପରିଚାଳନା କମିଟି ପକ୍ଷରୁ ବିଭିନ୍ନ କାର୍ଯ୍ୟକ୍ରମ ଚୂଡ଼ାନ୍ତ ହୋଇଛି । ନିୟମିତ ସଫେଇ ଏବଂ ପରିମଳ ସୁରକ୍ଷା ନିମନ୍ତେ ବିଏମସି, ଜଳ ଯୋଗାଣ ପାଇଁ ଜନସ୍ବାସ୍ଥ୍ୟ ବିଭାଗ, ଶାନ୍ତି ଶୃଙ୍ଖଳା ଲାଗି ପୋଲିସ ଓ ପ୍ରଶାସନ ସମେତ ଦମକଳ ବିଭାଗ ପକ୍ଷରୁ ସ୍ବତନ୍ତ୍ର ବ୍ୟବସ୍ଥା କରାଯାଇଛି। ଅସ୍ଥାୟୀ ପୀଠ ବା ମଣ୍ଡପ ପାଖରେ ମହିଳା ଓ ପୁରୁଷଙ୍କ ଶୃଙ୍ଖଳିତ ଦର୍ଶନ ଲାଗି ଯାତ୍ରା କମିଟି ପକ୍ଷରୁ ବ୍ୟାପକ ବ୍ୟବସ୍ଥା କରାଯାଇଛି ।
ଶନିବାର ସନ୍ଧ୍ୟାରେ କାଳୁଆ ମଣ୍ଡପରେ ମା’ଙ୍କୁ ନିମନ୍ତ୍ରଣ କରିବା ପାଇଁ ଫୁଲ ଚାଙ୍ଗୁଡ଼ିକୁ ପୂଜାର୍ଚ୍ଚନା କରାଯାଇଥିଲା। ରାତିରେ ସେଠାରୁ ଶହ ଶହ ମହିଳା ଓ ପୁରୁଷ ବିଶାଳ ପଟୁଆରରେ କାଳୁଆଙ୍କ ନିଜସ୍ବ ମନ୍ଦିର ଅଭିମୁଖେ ବାହାରିଥିଲେ। ବାଦ୍ୟ ବାଜଣା, ଶଙ୍ଖ ମହୁରୀ ନାଦ, ଘଣ୍ଟତାଳ, କୀର୍ତ୍ତନରେ ସମଗ୍ର ଅଞ୍ଚଳ କମ୍ପିଥିଲା । ପଟୁଆର ମନ୍ଦିରରେ ପହଞ୍ଚତ୍ବା ପରେ ମା’ ବଡ଼ ସାହି ମଣ୍ଡପକୁ ବିଜେ କରିବା ପାଇଁ ପୂଜାର୍ଚ୍ଚନା, ତନ୍ତ୍ରମନ୍ତ୍ର, ଚଣ୍ଡୀପାଠ ଓ ହୋମ ଆଦି କରାଯାଇଥିଲା। ଚାଙ୍ଗୁଡ଼ିରେ ନିଆଯାଇ ଥିବା ଫୁଲମାଳ ମା’ଙ୍କ ମସ୍ତକରେ ସ୍ଥାପନ କରାଯାଇଥିଲା । ବିଧି ପ୍ରକାରେ ସମସ୍ତ କାର୍ଯ୍ୟ ସମ୍ପାଦନା ଶେଷରେ ସ୍ଥାପନ ହୋଇଥିବା ଫୁଲମାଳ ଆପେ ଖସିବାରୁ କାଳୁଆ ଠାକୁରାଣୀ ଗଁା ଦାଣ୍ଡକୁ ବିଜେ କରିବାର ସଂକେତ ମିଳିଥିଲା ।
ଏହି ପର୍ବ ସରିବା ପରେ ପୁଣି ମନ୍ଦିର ପାଖରୁ ପଟୁଆର ବାହାରିଥିଲା। ମହିଳାଙ୍କ ହୁଳହୁଳି ଓ ବାଦ୍ୟ ବାଜଣା ସହ ପଟୁଆର ପରିକ୍ରମା କରିଥିଲା ଗୋସାଣି ନୂଆଗାଁର ସମସ୍ତ ସାହି। ଫଳରେ ଏକ ଆଧ୍ୟାତ୍ମିକ ପରିବେଶ ସୃଷ୍ଟି ହୋଇଥିଲା। ସବୁ ଘରର ଦାଣ୍ଡ ଦୁଆରେ ପୂର୍ଣ୍ଣକୁମ୍ଭ ରଖାଯାଇଥିଲା। କାଳୁଆଙ୍କ ପ୍ରିୟ ଗଇଁଠା (ଖିରି) ସମସ୍ତେ ଭୋଗ ଲଗାଇଥିଲେ। ସବୁ ସାହି ପରିକ୍ରମା ଶେଷରେ କାଳୁଆ ମଣ୍ଡପରେ ମା’ଙ୍କୁ ବିଜେ କରାଯାଇଥିଲା । କୁମାର ପୂର୍ଣ୍ଣିମା ପର୍ଯ୍ୟନ୍ତ କେବଳ ମଣ୍ଡପରେ ଦର୍ଶନର ବ୍ୟବସ୍ଥା ହୋଇଛି । ପ୍ରତ୍ୟହ ରାତିରେ ବିଭିନ୍ନ ସାହିରେ ଚିତ୍ତାକର୍ଷକ ଆଧୁନିକ ଓ ପୌରାଣିକ ସାଂସ୍କୃତିକ କାର୍ଯ୍ୟକ୍ରମ ପରିବେଷଣ କରାଯିବ ।