ଭବାନୀପାଟଣା,୨୫।୮(ଡି.ଏନ.ଏ.):କଳାହାଣ୍ଡି ଜିଲା ଜୟପାଟଣା ବ୍ଲକ ମତୁଆଲାଗୁଡା ଗାଁର ୭ ଜଣ ଶ୍ରମିକଙ୍କୁ ସେହି ଗ୍ରାମର ଜଣେ ଦଲାଲ ମୋଟା ଅର୍ଥର ପ୍ରଲୋଭନ ଦେଖାଇ ଗୁଜୁରାଟ ନେଇଯାଇଥିଲା । ସେଠାରେ ସମ୍ପୃକ୍ତ ଠିକା ସଂସ୍ଥା ଏହି ଦାଦନ ଶ୍ରମିକମାନଙ୍କୁ ନିର୍ଯାତନା ଦେବା ସହ ବନ୍ଧକ ରଖିଥିବା ଅଭିଯୋଗ କରି ସେମାନଙ୍କ ପରିବାର ସଦସ୍ୟମାନେ ଜିଲାପାଳଙ୍କଠାରେ ଫେରାଦ ହୋଇଛନ୍ତି । ଶ୍ରମିକଙ୍କୁ ତୁରନ୍ତ ମୁକ୍ତ କରିବାକୁ ସେମାନେ ଦାବି କରିଛନ୍ତି । ଜୁନ୍ ୧୪ ତାରିଖରେ ବଲାଗାଁର ଭଜନ ଦୁର୍ଗା ମତୁଆଲଗୁଡା ଗ୍ରାମକୁ ଆସି ମାସିକ ୧୨ ହଜାର ଟଙ୍କାର ମଜୁରୀ ପ୍ରଲୋଭନ ଦେଖାଇ ରିଙ୍କୁ ଗହିର, କୁଶ ଶବର, ଜଗତରାମ ଶବର, ରୁପଧର ଗହିର, ଭାସ୍କର ଛତ୍ରିଆ, ଉମା ଛତ୍ରିଆ, ଭରତ ଛତ୍ରିଆଙ୍କୁ ଗୁଜୁରାଟର ଭାମନ ପ୍ରୋସେସିଙ୍ଗ କମ୍ପାନୀ ପ୍ରାଇଭେଟ୍ ଲିମିଟେଡକୁ ନେଇଯାଇଥିଲା। କିଛି ଦିନ କାମ କରି ଏହି ଦାଦନ ଶ୍ରମିକମାନେ ପରିବାର ଲୋକଙ୍କ ସହିତ ଫୋନ୍ ଯୋଗେ କଥାବାର୍ତ୍ତା ହେଉଥିଲେ । ତେବେ ସମ୍ପୃକ୍ତ ସଂସ୍ଥା ଅଧିକ କାମ କରାଇ ମାଡ ମାରିବା ସହିତ ଠିକ୍ରେ ଖାଇବାକୁ ଦେଉ ନ ଥିବା ଶ୍ରମିକମାନେ ପରିବାର ଲୋକଙ୍କୁ ଜଣାଇଥିଲେ। ତେବେ ପ୍ରାୟ ଏକ ମାସ ହେଲା ଏହି ଦାଦନ ଶ୍ରମିକଙ୍କ ସହ ପରିବାର ଲୋକଙ୍କୁ ଫୋନ୍ ଯୋଗେ ଯୋଗାଯୋଗ ହେଇପାରୁ ନାହିଁ । ଅଳ୍ପ ଦିନ ତଳେ ଦାଦନ ଶ୍ରମିକ ମଧ୍ୟରୁ ଜଣେ ଫୋନ୍ ଯୋଗେ ଜଣାଇଥିଲେ ଯେ, ଠିକା ସଂସ୍ଥା ସେମାନଙ୍କୁ ଶାରୀରିକ ନିର୍ଯାତନ ଦେବା ସହ ପରିବାର ଲୋକଙ୍କ ସହ ଫୋନ୍ ଯୋଗେ କଥାବର୍ତ୍ତା କରାଉ ଦେଉନାହିଁ ଏବଂ ବନ୍ଧକ ଭାବେ ରଖିଛନ୍ତି । ଏ ସମ୍ପର୍କରେ ଏହି ଦାଦନ ଶ୍ରମିକଙ୍କ ପରିବାର ଲୋକ ଜୟପାଟଣା ଥାନା ଏବଂ ଜିଲା ଶ୍ରମ ଅଧିକାରୀଙ୍କୁ ଜଣାଇଥିଲେ ହେଁ କୌଣସି ସୁଫଳ ମିଳି ନ ଥିବାରୁ ସେମାନେ ଜିଲାପାଳଙ୍କୁ ସାକ୍ଷାତ କରି ଏହି ୭ ଜଣ ଦାଦନ ଶ୍ରମିକଙ୍କୁ ଉଦ୍ଧାର କରି ଫେରାଇ ଆଣିବାକୁ ଦାବି କରିଛନ୍ତି ।
