ଭୁବନେଶ୍ୱର,୨୨।୧(ସୂର୍ଯ୍ୟକାନ୍ତ ବେହେରା): ଏଜେନ୍ସିଗୁଡ଼ିକରୁ ଭଡା ସୂତ୍ରରେ ଗାଡି ଆଣୁଥିଲେ। ପରେ ସେହି ଗାଡିକୁ ନିଜର କହି ଅନ୍ୟମାନଙ୍କୁ ଭଡାରେ ଲଗାଇ ମୋଟା ଅଙ୍କର ଟଙ୍କା ଆଣୁଥିଲେ। ହେଲେ ଗାଡିର ପ୍ରକୃତ ମାଲିକାନାକୁ ଟଙ୍କା ନ ଦେଇ ଚଳୁ କରି ଦେଉଥିଲେ। ଦୀର୍ଘଦିନ ଧରି ଭୁବନେଶ୍ୱରରେ ଏମିତି ତରିକାରେ ଏଜେନ୍ସିଗୁଡିକୁ ଠକିବା ଅଭିଯୋଗରେ ନୟାପଲ୍ଲୀ ଥାନା ପୋଲିସ ୨ ଜଣଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେମାନେ ହେଲେ ଖାରବେଳନଗର ଥାନା ଅନ୍ତର୍ଗତ ୟୁନିଟ-୯ ଅଞ୍ଚଳର ଆର୍. ଟାଟା ରାଓ ଓ ଗଞ୍ଜାମର ସୁଶାନ୍ତ କୁମାର ସାହୁ। ଉଭୟଙ୍କଠାରୁ ବିଭିନ୍ନ କମ୍ପାନୀର ୯ଟି ଚାରି ଚକିଆ ଗାଡ଼ି ଜବତ ହୋଇଛି। ଜାମିନ ନାମଞ୍ଜୁର ହେବାରୁ ଉଭୟଙ୍କୁ ବିଚାର ବିଭାଗୀୟ ହାଜତକୁ ପଠାଇ ଦିଆଯାଇଛି। ଅଭିଯୁକ୍ତ ସୁଶାନ୍ତ ପୂର୍ବରୁ ଇନ୍ସ୍ୟୁରାନ୍ସ ଏଜେଣ୍ଟ ଭାବେ କାମ କରୁଥିବାବେଳେ ଟାଟା ରାଓ ଭୁବନେଶ୍ୱରରେ ଚା ଦୋକାନ କରିଥିବା ପୋଲିସ ତଦନ୍ତବେଳେ ଜାଣିବାକୁ ପାଇଛି।
ଠକେଇର ଶିକାର ହୋଇଛନ୍ତି କାର୍ ରେଣ୍ଟାଲ ସର୍ଭିସ୍ ଏଜେନ୍ସିର ମାଲିକ ରଜତ କୁମାର ସାହୁ। ଗତ ନଭେମ୍ବରରୁ ଅଭିଯୁକ୍ତମାନେ ତାଙ୍କଠାରୁ ବିଭିନ୍ନ ସମୟରେ ପାଖାପାଖି ୯ଟି ଗାଡି ଭଡା ସୂତ୍ରରୁ ନେଇଥିଲେ। ହେଲେ ଠିକ ସମୟରେ ଗାଡିଗୁଡିକୁ ଏଜେନ୍ସିକୁ ଫେରାଉ ନ ଥିଲେ କି ଭଡ଼ା ମଧ୍ୟ ଦେଉ ନ ଥିଲେ। ଏନେଇ ସେ ନୟାପଲ୍ଲୀ ଥାନାରେ ଅଭିଯୋଗ କରିବା ପରେ ପୋଲିସ ତଦନ୍ତ କରି ଅଭିଯୁକ୍ତଙ୍କ ବିରୋଧରେ କାର୍ଯ୍ୟାନୁଷ୍ଠାନ ଗ୍ରହଣ କରିବା ସହ ବିଭିନ୍ନ ସ୍ଥାନରୁ ଗାଡି ଜବତ କରିଥିଲା ।
