କୃଷ୍ଣପ୍ରସାଦ,୧୬।୪(କୈଳାଶ ଚନ୍ଦ୍ର ପଟ୍ଟନାୟକ): ଶିକ୍ଷାର ବିକାଶ ପାଇଁ ସରକାର ତତ୍ପର ହୋଇ ଉଠିଛନ୍ତି। ଆଧୁନିକ ଶିକ୍ଷାର ଉନ୍ନତୀକରଣ ପାଇଁ ସର୍ବଭାରତୀୟସ୍ତରରେ ଆରମ୍ଭ ହୋଇଛି ଉଦ୍ୟମ। ଏଥିପାଇଁ ଚଳିତବର୍ଷ ନୂତନ ପୁସ୍ତକ ମୁଦ୍ରଣ ହୋଇ ଯୋଗାଣ ମଧ୍ୟ ଆରମ୍ଭ ହୋଇଛି। ଖାଲିଥିବା ଶିକ୍ଷକ ପଦବୀ ପୂରଣ ପାଇଁ ସରକାର ପ୍ରସ୍ତୁତ ହେଉଥିବା ଜଣାପଡ଼ିଛି। ଶିକ୍ଷାର୍ଥୀଙ୍କ ଶିକ୍ଷାଦାନ ବିକାଶ ପାଇଁ ଆରମ୍ଭ ହୋଇଛି କୋଚିଙ୍ଗ ସେଣ୍ଟର, ଯାହା ଅନ୍ୟପକ୍ଷରେ ବେକାରୀ ଦୂରୀକରଣ ମଧ୍ୟ ହୋଇପାରିବ।
କାର୍ଯ୍ୟରତ ଶିକ୍ଷକମାନେ କୋଚିଙ୍ଗ ସେଣ୍ଟରଗୁଡିକରେ ଟ୍ୟୁସନ କରିପାରିବେ ନାହିଁ ବୋଲି ସରକାରୀ ନିର୍ଦେଶ ଥିଲେ ମଧ୍ୟ ଏଠି ସରକାରୀ ଆଇନ ବାଟବଣା ହୋଇଛି। କାର୍ଯ୍ୟରତ ଶିକ୍ଷକ, ଅଧ୍ୟାପକମାନେ ନିଜେ ନିଜେ ଗାଁ ଗାଁରେ ଗୋଟିଏ ଗୋଟିଏ କୋଚିଙ୍ଗ ସେଣ୍ଟର ଖୋଲି ଶିକ୍ଷକ ଅଧ୍ୟାପକମାନଙ୍କୁ ଟ୍ୟୁସନରେ ନିୟୋଜିତ କରିଛନ୍ତି। ସେମାନେ କରିଥିବା କୋଚିଙ୍ଗ ସେଣ୍ଟରରେ ଟ୍ୟୁସନ କରିବା ପାଇଁ ବାଧ୍ୟ କରୁଥିବା ଜଣାପଡ଼ିଛି। ଧମକ ମିଳୁଛି ଆମ କୋଚିଙ୍ଗରେ ନ ପଢିଲେ ମାର୍କ କମାଇ ଦିଆଯିବ।
ତେବେ ଶିକ୍ଷିତ ବେକାରୀ କରିଥିବା କୋଚିଙ୍ଗ ସେଣ୍ଟରରେ ପଢିବା ପାଇଁ ଶିକ୍ଷାର୍ଥୀମାନେ ଭୟ କରୁଛନ୍ତି । ଶିକ୍ଷକତା କରି ଲକ୍ଷ ଲକ୍ଷ ଟଙ୍କା ଦରମା ପାଉଥିବା ଶିକ୍ଷକ, ଅଧ୍ୟାପକ ମାନେ ଟ୍ୟୁସନ କରି ନିଜର ଆର୍ଥିକ ଅବସ୍ଥା ଦ୍ୱିଗୁଣିତ କରୁଥିବାବେଳେ ଜଣେ ଶିକ୍ଷିତ ବେକାରୀ ପରିବାର ପୋଷଣ ପାଇଁ ରୋଜଗାର ନିମନ୍ତେ ଦାଦନ ଶ୍ରମିକ ଭାବେ ରାଜ୍ୟ ବାହାରକୁ ଚାଲି ଯାଉଛନ୍ତି। ବ୍ଲକ ଶିକ୍ଷାଧିକାରୀ ଏବଂ କର୍ମଚାରୀମାନେ ଜାଣିଶୁଣି କାର୍ଯ୍ୟାନୁଷ୍ଠାନ ବଦଳରେ ମୁହଁ ବୁଲାଉଛନ୍ତି। ଶିକ୍ଷକମାନେ ଟ୍ୟୁସନରେ ନିୟୋଜିତ ହୋଇଥିବାରୁ ବିଦ୍ୟାଳୟରୁ ତରବର ହୋଇ ବିଦ୍ୟାଳୟ ଛାଡି ଟ୍ୟୁସନକୁ ଧାଉଁଛନ୍ତି, ଯାହା ବିଦ୍ୟାଳୟ ପାଠପଢ଼ାରେ ବ୍ୟାଘାତ ହେଉଛି।
ଏଣେ ପ୍ରତି ଗାଁରେ ତାଲିମପ୍ରାପ୍ତ ଶିକ୍ଷକ ଚାକିରି ନ ପାଇ ବେକାର ହୋଇ ରହିଛନ୍ତି ଏବଂ ବହୁ ଅବସରପ୍ରାପ୍ତ ଶିକ୍ଷକ ଶିକ୍ଷାଦାନ ପାଇଁ ଇଛୁକ ଥିବା ବେଳେ କାର୍ଯ୍ୟରତ ଶିକ୍ଷକ ଟ୍ୟୁସନ କରୁଛନ୍ତି। ଶିକ୍ଷକମାନେ ଟ୍ୟୁସନ କଲେ ତାଙ୍କ ପ୍ରତି କଡା କାର୍ଯ୍ୟାନୁଷ୍ଠାନ ନେବା ନିର୍ଦ୍ଦେଶ ଥିବାବେଳେ ଶିକ୍ଷା ବିଭାଗ ଅଧିକାରୀମାନେ ନିୟମକୁ ଫ୍ରିଜ଼ରେ ରଖି ସଲାସୁତରାରେ ସହଯୋଗ କରୁଛନ୍ତି। ଆଇନ ଉଲଂଘନ କରୁଥିବା ଟ୍ୟୁସନ ସେଣ୍ଟର ଉପରେ ଭିଜିଲାନ୍ସ ଚଢ଼ାଉ କରି ଶିକ୍ଷକଙ୍କ ଫଟୋ ଉଠାଇ ଶିକ୍ଷକ ଏବଂ ସହଯୋଗ କରୁଥିବା ବ୍ଲକ ଶିକ୍ଷାଧିକାରୀ କାର୍ଯ୍ୟାଳୟର କର୍ମଚାରୀମାନଙ୍କ ଉପରେ ବିହିତ କାର୍ଯ୍ୟାନୁଷ୍ଠାନ ଗ୍ରହଣ କରାଗଲେ ବେକାରୀ ସମସ୍ୟା ଦୂର ହୋଇପାରିବ। ହେଲେ ବିଭାଗୀୟ ଉଚ୍ଚ କର୍ତୃପକ୍ଷ ପଦକ୍ଷେପ ନେବା ପାଇଁ ନୀରବ କାହିଁକି ବୋଲି ସାଧାରଣରେ ପ୍ରଶ୍ନ ଉଠୁଛି।
Dharitri – Odisha’s No.1 Odia Daily
