ଲାଠୋର, ୧୮ା୩ (ଡି.ଏନ୍.ଏ.)- ବଲାଙ୍ଗୀର ଜିଲା ଖପ୍ରାଖୋଲ ବ୍ଲକ ଲାଠୋର କଲୋନୀପଡ଼ାର କୌଶଲ୍ୟା ନାଏକ(୫୬)। ସେ ଗଳଗଣ୍ଡ ରୋଗ୍ରେ ପୀଡ଼ିତ ଅଛନ୍। ପରିବାରଟା ନିହାତି ଗରିବ୍। ଅଭାବ ଅନାଟନ ଲାଗି ତାକର ଉଚ ଚିକିଛା ହେଇ ନାଇଁପାରବାର। ଏନ୍ତାଥି ପରିବାର ଲୋକ୍ ପରଶାସନକେ ଯେତେ ଜଲଦି ହେବା ସାହାଯ୍ ଯୁଗେଇ ଦେବାକେ ଗୁହାରି କରିଛନ୍।
ସୂଚନା ଅନ୍ସାରେ କଲୋନୀପଡ଼ାର ନରେନ୍ଦ୍ର ନାଏକ। ପରିବାର କହେଲେ ମାଏକିନା କୌଶଲ୍ୟା ଆର ଦୁଇ ପୁଓକେ ନେଇ ହଁସଖୁସିରେ ରହୁଥିଲେ। ୨ ଏକର ଆଟ୍ ଜମି ଚାଷ୍ବାସ କରି ଜୀବନ୍ ଜିବ୍କା ଚଲଉଥିଲେ। ଦୁଇପୁଓକୁ ବିହାଚୁରା ବି କରିଛନ୍। ବିହାଚୁରା ଉତାରୁ ଦୁଇପୁଓ ଭିନେ ହେଇ ରହୁଥିଲାବେଲେ ବୁରୁଧ୍ ଦମ୍ପତି ନିଜର ଝାଟିମାଟି କୁରିଆରେ ମୁଡ଼ ଗୁଁଜିଛନ୍। ଏହେଦେ ଜୀବନ୍ ଜିବ୍କା ଲାଗି ସେମାନକୁ କୁଲିମଜୁରି କରବାକେ ପଡ଼ୁଛେ। ହେଲେ ବଏସ୍ ଅଧ୍କା ହେବାର ଲାଗି ନରେନ୍ଦ୍ର ଆଘର ଲେଖେଁ କାମ୍କବାର କରି ନାଇଁପାରବାର। ଏନ୍ତାଥି ନରେନ୍ଦ୍ର ସରକାରୀ ଯୋଜନାରେ ମାସିକ ପାଉଥିବାର ୫ଶହ ଟଁକା ଭତା ଆର ୧୦ କେ.ଜି. ଚାଉଲ ଦମ୍ପତିକୁଁ ନିଅଁଟ ହେଉଛେ। ଦମ୍ପତି ଏନ୍ତା ଅଭାବ ଅନାଟନରେ ଚଲୁଥିଲାବେଲେ ଆଏଜ୍କେ ୫ ବଛର ତଲେ କୌଶଲ୍ୟାକଁର ବେଁକେ ଗୁଟେ ଛୋଟ ବଥ ହେଇଥିଲା। ସେଟା ଦିନୁଦିନ୍କେ ବଢ୍ତେଲ ଗଲା। ନରେନ୍ଦ୍ର ଧାରଉଧାର କରି କୌଶଲ୍ୟାକୁଁ ଆସରପାସର ଡାକ୍ତରଖାନାରେ ଚିକିଛା କରାଲେ। ହେଲେ କିଛି ଲାଭ ନାଇଁହେଲା। ଶେଷେ ଭୁବନେଶ୍ୱରରେ ଥିବାର ଆଖିଳ ଭାରତୀୟ ଆୟୁର୍ବିଜ୍ଞାନ ସଂସ୍ଥା(ଏମ୍ସ)କେ ନେଇ ଚିକିଛା କଲେ। ପରୀକ୍ଷା ନିରୀକ୍ଷାରୁ କୌଶଲ୍ୟା ଗଳଗଣ୍ଡ ରୋଗ୍ରେ ପୀଡ଼ିତ ଥିବାର ଜନାପଡ଼ିଥିଲା। ଡାକ୍ତର ଉଷୋକଷା ଲେଖିଦେଇ ଦିନାକେତେ ଖାଏଲା ଉତାରୁ ଅପରେଶନ କରାହେବା ବଲି କହିଥିଲେ। ନରେନ୍ଦ୍ର ମାଏକିନାକେ ଧରି ଘରକେ ଫିରିଆଏଲେ। ସେଦିନ୍ଠାନୁ ନରେନ୍ଦ୍ର କୌଶଲ୍ୟାକୁଁ ଉଷୋ ଘିନି କରି ଖାଏବାକେ ଦେଇ ନାଇଁପାରବାର କି ଅପରେଶନ ଲାଗି ଟଁକା ଯୁଗାଡ଼ କରି ନାଇଁପାରବାର। ଇଆଡ଼େ ଯେ କୌଶଲ୍ୟା ଦରଦ୍ ଲାଗି ଛଟ୍କି ଛାଡ଼ୁଛନ୍। ଖାସ୍ଲା, ଛିଁକ୍ଲା ସମିଆରେ ସେ ବହୁତ୍ ଦରଦ୍ ଅନୁଭବ କରୁଥିବାର କହିଛନ୍। ସରକାର ସ୍ବାସ୍ଥ୍ୟବୀମା କାର୍ଡ ଜରିଆରେ ଗରିବ୍ ଦୁଖିକୁ ଚିକିଛା ସାହାଯ୍ ଯୁଗେଇ ଦେଉଥିଲାବେଲେ ଇ ପରିବାର କାର୍ଡ ପାଏବାରୁ ବଁଚିତ୍ ହେଇ ରହିଛନ୍। ଇ ଦିଗେ ଜିଲା ଆର ଥାନୀଅ ପରଶାସନ ଦୁରୁଷ୍ଟି ଦେଇ କୌଶଲ୍ୟାକୁଁ ଉଚ ଚିକିଛା ସାହାଯ୍ ଯୁଗେଇ ଦେବାକେ ଦାବି ହେଉଛେ।
