ବ୍ରହ୍ମପୁର ଅଫିସ୍,୧୪ା୮-ଉତ୍ତର-ପଶ୍ଚିିମ ବଙ୍ଗୋପସାଗରରେ ଦେଖା ଦେଇଥିବା ଘୂର୍ଣ୍ଣିବଳୟ ପ୍ରଭାବରେ ସାରା ରାଜ୍ୟରେ ବର୍ଷା ହୋଇଛି। କିନ୍ତୁ ରାଜ୍ୟର ଅନ୍ୟ ଜିଲାଗୁଡ଼ିକ ତୁଳନାରେ ଦକ୍ଷିଣ ଓଡ଼ିଶାର ଦୁଇଟି ପ୍ରମୁଖ ଜିଲା ଗଜପତି ଏବଂ ଗଞ୍ଜାମରେ ସବୁଠୁ କମ୍ ପରିମାଣର ବର୍ଷା ରେକର୍ଡ଼ କରାଯାଇଛି। ସ୍ବତନ୍ତ୍ର ରିଲିଫ୍ କମିଶନରଙ୍କ କାର୍ଯ୍ୟାଳୟରୁ ମିଳିଥିବା ସୂଚନା ଅନୁଯାୟୀ, ସୋମବାର ସକାଳ ୮ଟାରୁ ମଙ୍ଗଳବାର ସକାଳ ୮ଟା, ଏହି ୨୪ଘଣ୍ଟା ମଧ୍ୟରେ ଗଜପତିରେ ମାତ୍ର ୭.୨ମିମି ବର୍ଷା ରେକର୍ଡ଼ କରାଯାଇଥିବା ବେଳେ ଗଞ୍ଜାମରେ ମାତ୍ର ୧୫.୯ ମିମି ବର୍ଷା ରେକର୍ଡ଼ ହୋଇଛି। କମିଶନରଙ୍କ ତରଫରୁ ପ୍ରକାଶ ପାଇଥିବା ତାଲିକାରେ ବର୍ଷା ପରିମାଣ ଅନୁଯାୟୀ ଗଞ୍ଜାମ ୨୯ ଏବଂ ଗଜପତି ୩୦ତମ ସ୍ଥାନରେ ରହିଛି। ବଲାଙ୍ଗୀର ଜିଲାରେ ସର୍ବାଧିକ ୨୨୬.୩ ମିମି ବର୍ଷା ରେକର୍ଡ଼ ହୋଇଛି। କମ୍ ବର୍ଷାକୁ ନେଇ ଗଞ୍ଜାମ ଏବଂ ଗଜପତି ଜିଲାରେ ଚାଷୀଙ୍କ ଚିନ୍ତା ବଢ଼ିଯାଇଛି। ଉଭୟ ଜିଲାରେ ବର୍ଷା ପରିମାଣ କମ୍ ରହିଥିଲେ ମଧ୍ୟ ନଦୀଗୁଡ଼ିକର ଜଳସ୍ତର କିନ୍ତୁ କମୁନି। ଉପର ମୁଣ୍ଡରେ ବର୍ଷା ଯୋଗୁ ଜଳସ୍ତର ସ୍ଥିର ରହିଛି। ମଙ୍ଗଳବାର ଅପରାହ୍ନ ୩ଟା ସୁଦ୍ଧା ରୁଷିକୁଲ୍ୟା ନଦୀର ପୁରୁଷୋତ୍ତମପୁରଠାରେ ଜଳସ୍ତର ୧୨.୫୧ମିଟର ରେକର୍ଡ଼ କରାଯାଇଛି। ଆଗାମୀ ସମୟରେ ଏହି ଜଳସ୍ତର ବଢ଼ିବ ବୋଲି ସ୍ବତନ୍ତ୍ର ରିଲିଫ୍ କମିଶନରଙ୍କ କାର୍ଯ୍ୟାଳୟ ପକ୍ଷରୁ ସତର୍କତା ଜାରି କରାଯାଇଛି। କାରଣ ନଦୀର ଜଳସ୍ତର କ୍ରମାଗତ ଭାବେ ବଢ଼ିବାରେ ଲାଗିଛି। କିନ୍ତୁ ବିପଦ ସଂକେତଠାରୁ ଢ଼େର୍ କମ୍ ରହିଛି। ପୁରୁଷୋତ୍ତମପୁରଠାରେ ବିପଦ ସଂକେତ ୧୬.୮୩ମିଟର। ସକାଳ ୬ଟା ବେଳକୁ ଜଳସ୍ତର ୧୨.୪୧ମିଟର ରହିଥିବା ବେଳେ ସକାଳ ୯ଟା ବେଳେ ମଧ୍ୟ ସ୍ଥିତି ସମାନ ଥିଲା। କିନ୍ତୁ ମଧ୍ୟାହ୍ନ ୧୨ଟା ବେଳକୁ ଜଳସ୍ତର ସାମାନ୍ୟ ବଢ଼ି ୧୨.୪୫ମିଟରରେ ପହଞ୍ଚିଥିଲା। ସେହିଭଳି ଗଜପତି ଜିଲା ଦେଇ ଯାଇଥିବା ବଂଶଧାରା ନଦୀର ଜଳସ୍ତର ମଧ୍ୟ ବଢ଼ୁଛି। ବିପଦ ସଂକେତ ପାଖାପାଖି ଜଳସ୍ତର ରହିଛି। କାଶୀନଗରଠାରେ ବିପଦ ସଂକେତ ହେଉଛି ୫୪.୬୦ମିଟର। ମଙ୍ଗଳବାର ସକାଳ ୬ଟାରେ ଜଳସ୍ତର ରହିଥିଲା ୫୪.୧୭ ମିଟର। ସକାଳ ୯ଟା ବେଳକୁ ଜଳସ୍ତର ୫୪.୧୧ମିଟରରେ ପହଞ୍ଚିଥିଲା। ମଧ୍ୟାହ୍ନ ୧୨ଟା ବେଳକୁ ଆହୁରି କମି ୫୪.୬ମିଟର ହୋଇଯାଇଥିଲା। ଯାହା ଅପରାହ୍ନ ୩ଟାରେ ପୁଣି ବଢ଼ି ୫୪.୩୦ମିଟର ହୋଇଥିଲା। କେବଳ କାଶୀନଗର ନୁହଁ, ଗୁଣୁପୁରଠାରେ ମଧ୍ୟ ଜଳସ୍ତର ବଢ଼ିଛି। ଏଠାରେ ବିପଦ ସଂକେତ ୮୪ମିଟର ଥିବା ବେଳେ ମଙ୍ଗଳବାର ସକାଳ ୬ଟା ବେଳେ ଜଳସ୍ତର ଥିଲା ୮୧.୯୫ମିଟର। ସକାଳ ୯ଟାରେ ଏହା ବଢ଼ି ୮୨ମିଟରରେ ପହଞ୍ଚିଥିଲା। ମଧ୍ୟାହ୍ନ ୧୨ଟାରେ ୮୨.୯୧ମିଟର ଥିବା ବେଳେ ଅପରାହ୍ନ ୩ଟାରେ ଜଳସ୍ତର ୮୨.୯୫ମିଟର ରହିଛି।
ସୂଚନାଯୋଗ୍ୟ, ସୋମବାର ଅପରାହ୍ନ ୩ଟା ବେଳକୁ ପୁରୁଷୋତ୍ତମପୁରରେ ଜଳସ୍ତର ୧୨.୪୯ ମିଟର ରହିଥିବା ବେଳେ କାଶୀନଗରରେ ୫୩.୩୬ମିଟର ଏବଂ ଗୁଣୁପୁରରେ ୮୧.୦୧ମିଟର ରହିଥିଲା। ଏଣୁ ୨୪ଘଣ୍ଟା ମଧ୍ୟରେ ଜଳସ୍ତର ଅଧିକ ଥିଲେ ମଧ୍ୟ ଏହା ସ୍ଥିର ରହିଛି।
ଅନ୍ୟପଟେ ଗଞ୍ଜାମ ଜିଲାରେ ବର୍ଷା ପରିମାଣକୁ ଦେଖିଲେ, ଭଞ୍ଜନଗର ଏବଂ ବେଲଗୁଣ୍ଠା ବ୍ଲକରେ ଭଲ ବର୍ଷା ହୋଇଥିବା ବେଳେ ଚିକିଟି, ସାନଖେମୁଣ୍ଡି ଆଦି ବ୍ଲକରେ କମ୍ ବର୍ଷା ହୋଇଛି। ତଥ୍ୟ ଅନୁଯାୟୀ, ଛତ୍ରପୁର ବ୍ଲକରେ ୧୨.୪ଏମ୍ଏମ୍ ବର୍ଷା ରେକର୍ଡ଼ କରାଯାଇଥିବା ବେଳେ ଗଞ୍ଜାମ ବ୍ଲକରେ ୮.୨, ପୁରୁଷୋତ୍ତମପୁରରେ ୮, କବିସୂର୍ଯ୍ୟନଗରରେ ୭, ପୋଲସରାରେ ୧୩.୬, କୋଦଳାରେ ୧୨.୬, ଖଲ୍ଲିକୋଟରେ ୧୦.୫, ହଞ୍ଜିଳିରେ ୪, ରଙ୍ଗେଇଲୁଣ୍ଡାରେ ୨.୨, କୁକୁଡ଼ାଖଣ୍ଡିରେ ୪, ଚିକିଟିରେ ୧, ପାତ୍ରପୁରରେ ୬.୬, ସାନଖେମୁଣ୍ଡିରେ ୨, ଦିଗପହଣ୍ଡିରେ ୪, ଭଞ୍ଜନଗରରେ ୬୨.୧୦, ବେଲଗୁଣ୍ଠାରେ ୫୦.୨, ଜଗନ୍ନାଥପ୍ରସାଦରେ ୬୩, ବୁଗୁଡ଼ାରେ ୩୨, ଆସିକାରେ ୯.୪, ଧରାକୋଟରେ ୧୨, ଶେରଗଡ଼ରେ ୪.୨ ଏବଂ ସୋରଡ଼ା ବ୍ଲକରେ ୨୦.୪ମିମି ବର୍ଷା ରେକର୍ଡ଼ କରାଯାଇଛି।
