ବରଗଡ଼ ଅଫିସ୍,୧୦।୫: କରୋନା (କୋଭିଡ୍-୧୯) ଭୂତାଣୁ ସଂକ୍ରମଣକୁ ନେଇ ଦେଶବ୍ୟାପୀ ଲକ୍ ଡାଉନ୍ କଟକଣା ଲାଗୁ ହୋଇଛି । ଏହି କଟକଣାକୁ ଦେଢ଼ମାସ ବିତି ଯାଇଛି । ତେବେ ଏଥିପାଇଁ ପ୍ରବାସୀ ଶ୍ରମିକଙ୍କୁ ଖୁବ୍ ହଟହଟା ହେବାକୁ ପଡ଼ୁଛି । ରୋଜଗାର ବନ୍ଦ ହେବା ସହିତ ସେମାନଙ୍କୁ ଖାଇବା, ପିଇବା ତ ଦୂରର କଥା, ରହିବା ପାଇଁ ଆଶ୍ରୟ ଟିକିଏ ମଧ୍ୟ ମିଳୁ ନାହିଁ । ଫଳରେ ଏଭଳି ପ୍ରବାସୀ ଶ୍ରମିକ ଗାଁ ମୁହାଁ ହୋଇଛନ୍ତି । ତେବେ ଗାଡ଼ିମୋଟର ଏବଂ ରେଳ ଚଳାଚଳ ବନ୍ଦ ଥିବା ଯୋଗୁ ସେମାନଙ୍କ ମଧ୍ୟରୁ କେହି ଚାଲି ଚାଲି ତ ଆଉ କିଏ ସାଇକେଲରେ ଘରକୁ ଫେରୁଥିବା ଦେଖିବାକୁ ମିଳିଛି। ଏଭଳି ଭାବେ ନବରଙ୍ଗପୁରରୁ ୯ଜଣ ଶ୍ରମିକ ଝାଡ଼ଖଣ୍ଡ ଅଭିମୁଖେ ଚାଲି ଚାଲି ଯାଉଥିବା ରବିବାର ବରଗଡ଼ ଜିଲା ଭଟଲି ବ୍ଲକ ଅନ୍ତର୍ଗତ ସୁକୁଡ଼ା ଅଞ୍ଚଳରେ ଦେଖିବାକୁ ମିଳିଥିଲା।
ବରଗଡ଼ ବ୍ଲକ ବରଡ଼ୋଲର ସାମାଜିକ ଅନୁଷ୍ଠାନ ସମ୍ପର୍କ ପରିବାରର ସଂଯୋଜକ ବିକାଶ ଅଗ୍ରୱାଲ ସେମାନଙ୍କୁ ଦେଖି ସ୍ଥାନୀୟ ବିଡ଼ିଓ ଏବଂ ତହସିଲଦାରଙ୍କୁ ଯୋଗାଯୋଗ କରିଥିଲେ । ପରେ ସ୍ଥାନୀୟ ସରପଞ୍ଚ ସହଦେବ ବନଛୋର ସେମାନଙ୍କୁ ଚୂଡ଼ା, ଚିନି ଖାଇବାକୁ ଦେଇଥିଲେ। ଏ ନେଇ ଗ୍ରାମ୍ୟ ଉନ୍ନୟନ ତଥା ଶ୍ରମମନ୍ତ୍ରୀ ସୁଶାନ୍ତ ସିଂଙ୍କ ଦୃଷ୍ଟି ଆକର୍ଷଣ କରାଯିବା ପରେ ଶ୍ରମିକମାନଙ୍କୁ ଗାଡ଼ିରେ ପଠାଯିବ ବ୍ୟବସ୍ଥା କରାଯିବ ବୋଲି ସେ କହିଥିଲେ । ଏହାପରେ ଶ୍ରମିକମାନେ ସୁକୁଡ଼ାରେ ଆଶ୍ରୟ ନେଇଛନ୍ତି । ସେମାନଙ୍କ ପାଇଁ ଖାଇବା ବ୍ୟବସ୍ଥା କରାଯାଇଛି ଏବଂ ସୋମବାର ସକାଳେ ଶ୍ରମିକଙ୍କୁ ଗାଡ଼ି ଯୋଗେ ସେମାନଙ୍କ ଗନ୍ତବ୍ୟ ପଥକୁ ପଠାଯିବ ବୋଲି ସରପଞ୍ଚ ବନଛୋର କହିଛନ୍ତି ।
ଏହି ଶ୍ରମିକମାନେ ନବରଙ୍ଗପୁର ନିକଟ ରେଳପଥର ଏକ ବ୍ରିଜ କାମରେ ନିୟୋଜିତ ଥିଲେ । ତେବେ ଲକ୍ ଡାଉନ୍ ପରେ କାମ ବନ୍ଦ ହୋଇଯାଇଥିଲା । ଏହାପରେ ସମ୍ପୃକ୍ତ ଠିକାଦାର ଘରକୁ ଫେରିଯିବାକୁ କହିବାରୁ ସେମାନେ ଗାଁ ଅଭିମୁଖେ ବାହାରିଥିବା କହିଛନ୍ତି । ଆସିବା ବାଟରେ ବୋରିଗୁମ୍ମାରେ ସେମାନଙ୍କୁ ୧୨ଦିନ କ୍ବାରାଣ୍ଟାଇନରେ ରଖାଯାଇଥିଲା ଏବଂ ସେଠାରୁ ଯିବାକୁ କହିବାରୁ ସେମାନେ ଚାଲି ଚାଲି ନିଜ ଘର ଅଭିମୁଖେ ବାହାରିଥିଲେ। ତେବେ ଆସିବା ବାଟରେ ଏକ ବସ୍ ଯୋଗେ ମଧ୍ୟ ସେମାନେ ଆସିଥିଲେ । ମାତ୍ର ଅଧବାଟରେ ବସ୍ଟି ଛାଡ଼ି ଦେବାରୁ ସେମାନେ ଚାଲି ଚାଲି ଯାଉଥିବା ଶ୍ରମିକମାନେ କହିଛନ୍ତି । ଦୋକାନ, ବଜାର ବନ୍ଦ ଥିବାରୁ ଖାଇବା ପାଇଁ କିଛି ସାମଗ୍ରୀ ମିଳୁ ନ ଥିବା ଯୋଗୁ ଅର୍ଦ୍ଧାହାରରେ ମଧ୍ୟ ରହିବାକୁ ପଡ଼ୁଥିବା ସେମାନେ କହିଛନ୍ତି । ଏହା ସହିତ ବାଟରେ ନଳକୂପ, କୂଅକୁ ପାଣି ଆଣିବାକୁ ଗଲେ ମଧ୍ୟ ଲୋକଙ୍କଠାରୁ ଟାହିଟାପରା ଶୁଣିବାକୁ ମିଳିଥିବା ଏହି ଶ୍ରମିକମାନେ କହିଛନ୍ତି ।
