ଖୋର୍ଦ୍ଧା ଅଫିସ୍/ଭୁବନେଶ୍ୱର,୨୨।୫(ବ୍ୟୁରୋ): ମାଧ୍ୟମିକ ଶିକ୍ଷା ପରିଷଦ(ବୋର୍ଡ) ଦ୍ୱାରା ପରିଚାଳିତ ୨୦୧୯ ମାଟ୍ରିକ୍ ପରୀକ୍ଷା ଫଳ ମଙ୍ଗଳବାର ପ୍ରକାଶ ପାଇଛି। ଖୋର୍ଦ୍ଧା ଜିଲାରେ ୭୮.୬୭ପ୍ରତିଶତ ପାସ୍ହାର ରହିଛି। ଜିଲାର ୩୩୮ ସ୍କୁଲର ୨୮,୨୫୯ ଛାତ୍ରୀଛାତ୍ର ଦଶମ ଶ୍ରେଣୀ ପରୀକ୍ଷା ଦେବା ପାଇଁ ଫର୍ମ ଫିଲପ୍ କରିଥିଲେ। ସେଥିରୁ ୩୪୧ଜଣ ପରୀକ୍ଷାରେ ଅନୁପସ୍ଥିତ ଥିଲେ। ୧୨୫ କେନ୍ଦ୍ରରେ ୨୭ହଜାର ୯୧୮ଜଣ ଛାତ୍ରୀଛାତ୍ର ପରୀକ୍ଷା ଦେଇଥିଲେ। ସେଥିରୁ ଜଣେ ମାଲ ପ୍ରାକ୍ଟିସ ହୋଇଥିବା ବେଳେ ୨୭ହଜାର ୯୧୭ଜଣଙ୍କର ପରୀକ୍ଷା ଫଳ ପ୍ରକାଶ ପାଇଛି। ମୋଟ ୨୧ହଜାର ୯୬୩ଜଣ ପରୀକ୍ଷାର୍ଥୀ ପାସ୍ କରିଥିବା ବେଳେ ସେମାନଙ୍କ ମଧ୍ୟରେ ୧୦ହଜାର ୯୭୮ଜଣ ଛାତ୍ରୀ ଓ ୧୦ହଜାର ୯୮୫ଜଣ ଛାତ୍ର ଅଛନ୍ତି। ୫୯୫୪ ପରୀକ୍ଷାର୍ଥୀ ଏଫ୍ ଗ୍ରେଡ୍ ପାଇଛନ୍ତି। ଉତ୍ତୀର୍ଣ୍ଣ ଛାତ୍ରୀଛାତ୍ରଙ୍କ ମଧ୍ୟରେ ୧୪୪ଜଣ ଏ-୧ ଗ୍ରେଡ୍ ପାଇଥିବା ବେଳେ ୯୮୧ଜଣ ଏ-୨, ୨୦୫୫ଜଣ ବି-୧, ୩୩୧୧ଜଣ ବି-୨, ୪୭୨୧ଜଣ ସି, ୫୯୭୭ଜଣ ଡି ଏବଂ ୪୭୪୪ଜଣ ଇ ଗ୍ରେଡ୍ ରଖିଛନ୍ତି। ତେବେ ଭୁବନେଶ୍ୱର ବ୍ଲକରେ ଗତବର୍ଷ ତୁଳନାରେ ଚଳିତବର୍ଷ ପାସ୍ହାର କମିଛି। ବ୍ଲକରେ ଗତବର୍ଷ ପାସ୍ହାର ୭୮% ଥିବାବେଳେ ଏ ବର୍ଷ ୭୫% ରହିଛି। ସେହିପରି ଭୁବନେଶ୍ୱର ମହାନଗର ନିଗମର ପାସ୍ହାର ୮୨% ରହିଛି।
