ଭୁବନେଶ୍ୱର,୨୦ା୧୨(ବ୍ୟୁରୋ):କେନ୍ଦ୍ର ସରକାରଙ୍କ ଉପରେ ୧୪,୨୯୨,୫୧ କୋଟି ଟଙ୍କା ସବ୍ସିଡି ବକେୟା ପଡ଼ିଛି। ଏଥିସହିତ ନଭେମ୍ବର ୩୦ ସୁଦ୍ଧା ଏହି ଟଙ୍କାର ୬,୧୮୭ କୋଟି ଟଙ୍କା ସୁଧ ବାବଦ ବକେୟା ପଡ଼ିରହିଛି। ଉକ୍ତ ବକେୟା ଅର୍ଥକୁ ତୁରନ୍ତ ଦେବା ଲାଗି ବିଜେଡି ସଂସଦୀୟ ଦଳ ସୋମବାର କେନ୍ଦ୍ର ଖାଉଟି ବ୍ୟାପାର, ଖାଦ୍ୟ ଓ ସାଧାରଣ ବଣ୍ଟନ ମନ୍ତ୍ରୀ ପୀୟୂଷ ଗୋଏଲଙ୍କୁ ଭେଟି ଦାବି ପତ୍ର ଦେଇଛି। ଦାବିପତ୍ରରେ ଉଲ୍ଲେଖ କରାଯାଇଛି, ମୁଖ୍ୟମନ୍ତ୍ରୀ ନବୀନ ପଟ୍ଟନାୟକଙ୍କ ନେତୃତ୍ୱରେ ଓଡ଼ିଶା ଖାଦ୍ୟଶସ୍ୟ ଉତ୍ପାଦନରେ ରେକର୍ଡ ସୃଷ୍ଟି କରିବା ସହ ସାଧାରଣ ବଣ୍ଟନ ବ୍ୟବସ୍ଥା(ପିଡିଏସ୍)ରେ ତୃତୀୟ ବୃହତ୍ ଯୋଗାଣକାରୀ ରାଜ୍ୟ ହୋଇପାରିଛି। ରାଜ୍ୟରୁ ଚାଉଳ ସଂଗ୍ରହ କରିବା କେନ୍ଦ୍ର ସରକାରଙ୍କ କାର୍ଯ୍ୟ। ରାଜ୍ୟର ଚାଷୀମାନେ ଯେପରି ଅସୁବିଧାରେ ନ ପଡ଼ିବେ ସେଥିପାଇଁ କେନ୍ଦ୍ର ସରକାରଙ୍କ ସହ ଓଡ଼ିଶା ସରକାର ଧାନ ସଂଗ୍ରହ ବିକେନ୍ଦ୍ରୀକରଣ ପାଇଁ ବୁଝାମଣା ପତ୍ର(ଏମ୍ଓୟୁ) ସ୍ବାକ୍ଷର କରିଛନ୍ତି। ଖାଦ୍ୟ ସୁରକ୍ଷା ବାବଦରେ ଓଡ଼ିଶା ସରକାର ପାଇବାକୁ ଥିବା ୧୪,୨୯୨.୫୧ କୋଟି ଟଙ୍କା ବକେୟା କେନ୍ଦ୍ର ସରକାରଙ୍କ ଉପରେ ରହିଛି। ସେଥିରୁ ୧୧,୬୮୯.୨୧ କୋଟି ପ୍ରୋଭିଜନାଲ ସବ୍ସିଡି ଏବଂ ୨୬୦୩.୩୦ କୋଟି ଆଡ୍ଭାନ୍ସ ସବ୍ସିଡି ବାକି ରହିଛି। ଏହାଛଡ଼ା ୨୦୨୨ ନଭେମ୍ବର ୩୦ ସୁଦ୍ଧା ଓଡ଼ିଶା ରାଜ୍ୟ ଯୋଗାଣ ନିଗମ ୬୧୮୭ କୋଟି ଅତିରିକ୍ତ ସୁଧ ବାବଦକୁ ପାଇବାକୁ ରହିଛି। ଏପର୍ଯ୍ୟନ୍ତ ଏହି ଅର୍ଥ କେନ୍ଦ୍ର ସରକାରଙ୍କ ନିକଟରେ ବକେୟା ରହିଛି। ସବ୍ସିଡି ମିଳିବାରେ ବିଳମ୍ବ ଯୋଗୁ ଯୋଗାଣ ନିଗମର ୬,୧୮୭ କୋଟି ଟଙ୍କା ବକେୟା ବାବଦରେ ପଡ଼ି ରହିଛି। ଉକ୍ତ ଅର୍ଥ ଦେବା ପାଇଁ ସଂସଦୀୟ ଦଳ ପକ୍ଷରୁ କେନ୍ଦ୍ରମନ୍ତ୍ରୀଙ୍କ ନିକଟରେ ଦାବି କରାଯାଇଛି।
