ଯୋଡ଼ା,୧ା୫ (ଡି.ଏନ୍.ଏ.)-ଖଣିଜ ପରିବହନକୁ ସୁଚାରୁରୂପେ କରିବା ନେଇ କେନ୍ଦୁଝର ଜିଲା ଯୋଡା ପୌରପାଳିକା ସଭାଗୃହଠାରେ ଗୁରୁବାର ଏକ ଜରୁରୀ ବୈଠକ ଅନୁଷ୍ଠିତ ହୋଇଥିଲା। ଜିଲାପାଳ ଆଶିଷ ଠାକରେ, ଏସ୍ପି ମିତ୍ରଭାନୁ ମହାପାତ୍ର ଉପସ୍ଥିତ ଥିଲେ। ପ୍ରଥମ ପର୍ଯ୍ୟାୟ ବୈଠକରେ ଯୋଡା ଖଣିମଣ୍ଡଳ ଅଧୀନ ସମସ୍ତ ଖଣିର ପ୍ରତିନିଧିଙ୍କ ସହିତ ଆଲୋଚନା କରାଯାଇଥିଲା। ଲକ୍ଡାଉନ ସମୟରେ ଖଣିରେ କାର୍ଯ୍ୟ କରୁଥିବା ଶ୍ରମିକମାନଙ୍କ ସୁରକ୍ଷା ପାଇଁ ଖଣି କମ୍ପାନୀଗୁଡିକ କିପରି ବ୍ୟବସ୍ଥା କରିଛନ୍ତି ସେ ସମ୍ପର୍କରେ ଅଧିକାରୀମାନେ ପଚାରି ବୁଝିଥିଲେ। ରାଜ୍ୟ ସରକାରଙ୍କର ଆର୍ଥତ୍କ ସ୍ଥିତିକୁ ସୁଦୃଢ କରିବା ପାଇଁ ବ୍ୟାପକ ଭାବେ ଖଣିର ପରିବହନ ଓ ରପ୍ତାନୀ ଉପରେ ଆଲୋଚନା ପର୍ଯ୍ୟାଲୋଚନା କରାଯାଇଥିଲା। ତେବେ ଖଣି କମ୍ପାନୀ ପ୍ରତିନିଧିମାନେ ଲୁହାପଥର ଚାହିଦା ଆନ୍ତର୍ଜାତିକ ବଜାରରେ ହ୍ରାସ ପାଇଥିବାରୁ ପରିବହନ ହ୍ରାସ ପାଉଥିବା ସମ୍ପର୍କରେ ସୂଚନା ଦେଇଥିଲେ।
ଦ୍ୱିତୀୟ ପର୍ଯ୍ୟାୟ ବୈଠକରେ ଯୋଡା ମାଇନିଂ ଏରିଆ ଟ୍ରକ ଓନର ଆସୋସିଏଶନ(ମାଟୋଆ) ଓ ଯୋଡା ଟ୍ରକ ଓନର ଆସୋସିଏଶନ(ଜାଟୋଆ) ସହିତ ଆଲୋଚନା ହୋଇଥିଲା। ଖଣିଜ ପରିବହନରେ ଯେପରି କୌଣସି ବାଧା ନ ଉପୁଜେ ସେନେଇ ଗୁରୁ୍ତ୍ୱ ଦିଆଯାଇଥିଲା। ବୈଠକ ଶେଷରେ କରୋନା ସମ୍ପର୍କରେ ଜିଲାପାଳ ଯୋଡା କାର୍ଯ୍ୟନିର୍ବାହୀ ଅଧିକାରୀଙ୍କ ସୂର୍ଯ୍ୟମଣୀ ପାଟ୍ଟେଯାଶୀଙ୍କ ସହ ଆଲୋଚନା କରିଥିଲେ। ୯ଟି ସେଣ୍ଟରରେ ନୋଡାଲ ଅଫିସର ନିଯୁକ୍ତି କରାଯାଇଛି। ଯୋଡାରେ ଆଇସୋଲେଶନ ପାଇଁ ୧୫୨ ଶଯ୍ୟା ଓ କ୍ୱାରାଣ୍ଟାଇନ ପାଇଁ ୩୫୧ ଶଯ୍ୟା ପ୍ରସ୍ତୁତ କରାଯାଇଛି। ପ୍ରତିଦିନ ୯୧୭ ଖାଦ୍ୟ ପୁଡିଆ ୨ ଓଳି ଯୋଗାଇ ଦିଆଯାଉଛି ା ଆଗାମୀ ୩ ତାରିଖରେ ବାହାର ଅଞ୍ଚଳରୁ ଜନସାଧାରଣ ଆସିଲେ ସେମାନଙ୍କର ରହିବା ଖାଇବା ବ୍ୟବସ୍ଥା ପୌରପାଳିକା ପକ୍ଷରୁ କରାଯାଉଥିବା ପାଟ୍ଟଯୋଶୀ ସୂଚନା ଦେଇଥିଲେ। ଅନ୍ୟମାନଙ୍କ ମଧ୍ୟରେ ବଡବିଲ ତହସିଲଦାର କ୍ଷୀରୋଦ ଚନ୍ଦ୍ର ବେହେରା ଓ ଯୋଡା ଖଣି ଯୁଗ୍ମ ନିର୍ଦ୍ଦେଶକ ସଲିଲ ବେହେରା ଉପସ୍ଥିତ ଥିଲେ। ବହୁ ଖଣିର ପ୍ରତିନିଧିମାନେ ବୈଠକରେ ଯୋଗ ଦେଇଥିଲେ ା
