ପୁରୀ ଅଫିସ,୧୨ା୫: ମହାମାରୀ କରୋନା ରାଜ୍ୟରେ ଭୟଙ୍କର ରୂପ ଧାରଣ କଲାଣି। ଇତିମଧ୍ୟରେ ଆକ୍ରାନ୍ତଙ୍କ ସଂଖ୍ୟା ୪୦୦ ଟପିଗଲାଣି। ଦିନକୁ ଦିନ ଆକ୍ରାନ୍ତଙ୍କ ସଂଖ୍ୟା ବଢିଚାଲିଛି। ସଂକ୍ରମଣକୁ ରୋକିବା ପାଇଁ ରାଜ୍ୟ ସରକାର ବିଭିନ୍ନ ପଦକ୍ଷେପ ନେଉଛନ୍ତି। ରାଜ୍ୟକୁ ଏବେ ପ୍ରବାସୀ ଓଡ଼ିଆଙ୍କ ଆଗମନ ଜୋର୍ ଧରିଥିବାବେଳେ ସରକାର କେତେକ ଗାଇଡ଼ ଲାଇନ ପ୍ରସ୍ତୁତ କରିଛନ୍ତି। ଏହାକୁ ସମସ୍ତେ ମାନିବା ପାଇଁ ନିର୍ଦ୍ଦେଶ ରହିଛି। ହେଲେ କେତେଜଣ ପ୍ରବାସୀ ଗାଇଡ଼ଲାଇନକୁ ଆଦୌ ମାନୁନାହାନ୍ତି। ସେମାନେ କ୍ବାରାଣ୍ଟାଇନରେ ରହୁଥିଲେ ମଧ୍ୟ ଅଧିକାଂଶ ସମୟ ବାହାରେ ବୁଲୁଛନ୍ତି। ସେମାନଙ୍କ ପାଇଁ ସଂକ୍ରମଣ ବଢିପାରେ ବୋଲି ପୁରୀ ସହରବାସୀ ଆଶଙ୍କା କରି ଭୟଭୀତ ହୋଇପଡ଼ିିଛନ୍ତି। ତେଣୁ ସହର ବାହାରେ କ୍ବାରାଣ୍ଟାଇନ ସେଣ୍ଟର କରିବା ଲାଗି ଦାବି କରିଛନ୍ତି। ଅନ୍ୟପକ୍ଷେ ପ୍ରବାସୀ ବାହାରେ ବୁଲିବା ଘଟଣାକୁ ସେଣ୍ଟରର ନୋଡାଲ ଅଫିସର ଅସ୍ବୀକାର କରିଛନ୍ତି।
ଦୀର୍ଘ ୩୭ ଦିନ ପରେ ରବିବାର ପୁରୀ ସହରରେ ୨ଜଣ କରୋନା ଆକ୍ରାନ୍ତ ଚିହ୍ନଟ ହୋଇଛନ୍ତି। ଏ ନେଇ ସହରବାସୀଙ୍କ ମଧ୍ୟରେ ଏକପ୍ରକାର ଆତଙ୍କ ଖେଳିଯାଇଛି। ରାଜ୍ୟ ବାହାରୁ ଆସୁଥିବା ପ୍ରବାସୀଙ୍କ ପାଇଁ ବି ଅନେକେ ଚିନ୍ତାରେ ପଡ଼ିିଛନ୍ତି। ପ୍ରବାସୀମାନଙ୍କ ଲାଗି ପ୍ରଶାସନ ପକ୍ଷରୁ କ୍ବାରାଣ୍ଟାଇନ ସେଣ୍ଟର କରାଯାଇଛି। କିନ୍ତୁ ସେମାନଙ୍କ ମଧ୍ୟରୁ କେତେଜଣ କ୍ବାରାଣ୍ଟାଇନ ସେଣ୍ଟର ବାହାରକୁ ଆସି ଦୋକାନ ବଜାରରେ ବୁଲୁଥିବା ଶୁଣିବାକୁ ମିଳିଛି। ପ୍ରଶାସନ ପକ୍ଷରୁ ମୋଚିସାହି କଲ୍ୟାଣମଣ୍ଡପରେ କ୍ବାରାଣ୍ଟାଇନ ସେଣ୍ଟର ହୋଇଛି। ଏଠାରେ ପ୍ରାୟ ୧୦୦ ଜଣଙ୍କ ରହିବା ଲାଗି ବ୍ୟବସ୍ଥା କରାଯାଇଛି। ବର୍ତ୍ତମାନ ସୁଦ୍ଧା ଏଠାରେ ୩୬ଜଣ ସଙ୍ଗରୋଧ ଭାବେ ରହୁଛନ୍ତି। ତେବେ ଏମାନଙ୍କ ମଧ୍ୟରୁ କେତେଜଣ ମୋଚିସାହି ବଜାରରେ ବୁଲୁଥିବା ଦୋଳମଣ୍ଡପ ସାହିବାସିନ୍ଦା ଆଡଭୋକେଟ ଜ୍ୟୋତିପ୍ରକାଶ ମିଶ୍ର ଅଭିଯୋଗ କରିଛନ୍ତି। ତେଣୁ ଏ ଦିଗରେ ପ୍ରଶାସନ ଦୃଷ୍ଟି ଦେବାକୁ ସେ ମତ ରଖିଛନ୍ତି। କେବଳ ଜ୍ୟୋତି ପ୍ରକାଶ ନୁହଁନ୍ତି ପିସିସି ମୁଖପାତ୍ର ବିନାୟକ ଦାସମହାପାତ୍ର ମଧ୍ୟ ସମାନ ଅଭିଯୋଗ କରିଛନ୍ତି। ସହର ଭିତରେ କ୍ବାରାଣ୍ଟାଇନ ସେଣ୍ଟର ନ କରି ସହର ବାହାରେ ଏହା କରିବା ଉଚିତ୍ ହୋଇଥାନ୍ତା ବୋଲି ସେମାନେ କହିଛନ୍ତି। ତେବେ ଏଭଳି ଅଭିଯୋଗ ସଂକ୍ରାନ୍ତରେ ଏହି ସେଣ୍ଟରର ନୋଡାଲ ଅଫିସର ଇଞ୍ଜିନିୟର ପ୍ରମୋଦ କୁମାର ଭୋଇଙ୍କୁ ପଚାରିବାରେ ସେ ଏହାକୁ ଅସ୍ବୀକାର କରିଥିଲେ। ସେଣ୍ଟର ପଛପଟେ ଉଚ୍ଚ ପାଚେରି ଥିବାବଳେ ସମ୍ମୁଖ ଭାଗ ଗେଟ୍ରେ ତାଲା ପଡ଼ୁଛି। ଏଠାରେ ସୁରକ୍ଷା କର୍ମୀ ଜଗି ରହୁଛନ୍ତି। ତେଣୁ କେହି ବାହାରକୁ ଯିବାର ସୁଯୋଗ ନାହିଁ ବୋଲି ଭୋଇ କହିଛନ୍ତି।
