ମାଞ୍ଚେଷ୍ଟର, ୮।୭(ପି.ଟି.)- ଚଳିତ ବିଶ୍ୱକପ୍ରେ ଭାରତ ଓ ନ୍ୟୁଜିଲାଣ୍ଡ ପ୍ରଥମ ସେମିଫାଇନାଲରେ ମଙ୍ଗଳବାର ମାଞ୍ଚେଷ୍ଟରରେ ପରସ୍ପରକୁ ଭେଟିବା ସ୍ପଷ୍ଟ ହୋଇଛି। ପଏଣ୍ଟ ଟେବୁଲରେ ଭାରତ ଶୀର୍ଷ ସ୍ଥାନରେ ରହିଥିବା ବେଳେ ନ୍ୟୁଜିଲାଣ୍ଡ ଚତୁର୍ଥ ସ୍ଥାନରେ ରହିଛି। ସେହିପରି ଦ୍ୱିତୀୟ ଓ ତୃତୀୟ ସ୍ଥାନରେ ଥିବା ଅଷ୍ଟ୍ରେଲିଆ ଓ ଇଂଲଣ୍ଡ ଦ୍ୱିତୀୟ ସେମିଫାଇନାଲରେ ବର୍ମିଂହାମରେ ଗୁରୁବାର ମୁହଁାମୁହିଁ ହେବେ। ବିଶ୍ୱକପ୍ ଇତିହାସରେ ନ୍ୟୁଜିଲାଣ୍ଡ ଏଥିସହ ଅଷ୍ଟମଥର ପାଇଁ ସେମିଫାଇନାଲକୁ ଉଠିଛି। ସେହିପରି ଭାରତ ସପ୍ତମଥର ପାଇଁ ସେମିଫାଇନାଲ ମୁକାବିଲାରେ ଅବତୀର୍ଣ୍ଣ ହେବ।
ବିରାଟ କୋହଲିଙ୍କ ନେତୃତ୍ୱରେ ଭାରତ ଏପର୍ଯ୍ୟନ୍ତ ଜବରଦସ୍ତ ପ୍ରଦର୍ଶନ କରିଆସଛି। ସେହିପରି କେନ ଓ୍ବିଲିୟମସନଙ୍କ ଅଧିନାୟକତ୍ୱରେ ନ୍ୟୁଜିଲାଣ୍ଡ ଭଲ ଖେଳି ସେମିକୁ ଉଠିଛି। ତେବେ ଏକ ବିରଳ ସଂଯୋଗ କ୍ରମରେ ଏହି ଦୁଇ ଅଧିନାୟକ ପୁଣି ଥରେ ୧୧ ପରେ ବିଶ୍ୱକପ୍ ସେମିଫାଇନାଲରେ ମୁହଁାମୁହିଁ ହେବାକୁ ଯାଉଛନ୍ତି। ଦୁହେଁ ଯେତେବେଳେ ୧୯ ବର୍ଷରୁ କମ୍ କ୍ରିକେଟ ଖେଳୁଥିଲେ ସେତେବେଳେ ଅଧିନାୟକ ହିସାବରେ ପରସ୍ପରକୁ ଭେଟିଥିଲେ। ୨୦୦୮ରେ ଖେଳାଯାଇଥିବା ୧୯ ବର୍ଷରୁ କମ୍ ବିଶ୍ୱକପ୍ ସେମିଫାଇନାଲରେ କୋହଲି ଓ ଓ୍ବିଲିୟମସନଙ୍କ ନେତୃତ୍ୱରେ ଭାରତ ଓ ନ୍ୟୁଜିଲାଣ୍ଡ ପରସ୍ପରକୁ ଭେଟିଥିଲେ। ଏବେ ଏହି ଦୁଇ ଅଧିନାୟକ ସିନିୟର ଦଳର ନେତୃତ୍ୱ ନେଇ ପୁଣି ଥରେ ବିଶ୍ୱକପ ସେମିରେ ମୁହଁାମୁହିଁ ହେବାକୁ ଯାଉଛନ୍ତି। ଏହାକୁ ଏକ ଅପୂର୍ବ ସାମଞ୍ଜସ୍ୟ ବା ସଂଯୋଗ ବୋଲି କୁହାଯାଇପାରେ। ରବୀନ୍ଦ୍ର ଜାଡେଜା, ଟ୍ରେଣ୍ଟ ବୋଲ୍ଟ ଓ ଟିମ୍ ସୌଦି ସେତେବେଳେ ଏହି ସେମିଫାଇନାଲ ଖେଳିଥିଲେ। ସେମିରେ ଅବଶ୍ୟ ଭାରତ ସେତେବେଳେ ୩ ଉଇକେଟରେ ନ୍ୟୁଜିଲାଣ୍ଡକୁ ପରାସ୍ତ କରି ଫାଇନାଲରେ ପ୍ରବେଶ କରିଥିଲା। ଅଲରାଉଣ୍ଡ ପ୍ରଦର୍ଶନ କରି କୋହଲି ପ୍ଲେୟାର ଅଫ୍ ଦି ମ୍ୟାଚ୍ ବିବେଚିତ ହୋଇଥିଲେ। କୋହଲି ଓ୍ବିଲିୟମସନଙ୍କୁ ଆଉଟ କରିଥିଲେ। ଏଥର ମଧ୍ୟ କୋହଲିଙ୍କ ନେତୃତ୍ୱରେ ଭାରତ ନ୍ୟୁଜିଲାଣ୍ଡକୁ ହରାଇ ଫାଇନାଲକୁ ଉଠିବ ବୋଲି ଆଶା କରାଯାଉଛି।
