ଯୋଡ଼ା,୨୩।୭(ଡି.ଏନ.ଏ.)-ଖଣିଜ ସମ୍ପଦ ପ୍ରାଚୁର୍ଯ୍ୟରେ ଭରା ଓଡିଶା ରାଜ୍ୟ ଜାତୀୟ ସମ୍ପଦର ମାଲିକାନା ଅନୁଯାୟୀ ଫାଇଦା ମିଳି ନ ଥିବା ବେଳେ ରାଜ୍ୟର ସର୍ବବୃହତ ଟାଟାସ୍ପଞ୍ଜ ଆଇରନ୍ ଲିମିଟେଡ କମ୍ପାନୀ ନିଜର ନାମ ପରିବର୍ତ୍ତନ କରି ଟାଟାଷ୍ଟିଲ ଲଙ୍ଗ ପ୍ରଡକ୍ଟ ଲିଃ ରଖିଛି। ଏହି କମ୍ପାନୀ ନିଜର ମୂଳ କାର୍ଯ୍ୟାଳୟକୁ ଓଡିଶାରୁ ପଶ୍ଚିମବଙ୍ଗକୁ ସ୍ଥାନାନ୍ତର କରୁଥିବା ଜଣାପଡିଛି। ଏହି କମ୍ପାନୀ ଓଡିଶାରୁ ଖଣିଜ ସମ୍ପଦ ନେଇ ନିଜ ଶିଳ୍ପରେ ବ୍ୟବହାର କରିବ କିନ୍ତୁ ଓଡିଶା ସରକାରଙ୍କ ନିୟମ ଓ କଟକ ହାଇକୋର୍ଟଙ୍କ କ୍ଷେତ୍ରାଧିକାର ମଧ୍ୟରେ ନଆସି ପଶ୍ଚିମବଙ୍ଗ ସରକାର ଓ ପଶ୍ଚିମବଙ୍ଗର କୋଲକାତା ହାଇକୋର୍ଟଙ୍କ କ୍ଷେତ୍ରାଧିକାର ମଧ୍ୟରେ ରହିବ। ଟାଟା ସ୍ପଞ୍ଜର ଏପରି ଓଡିଶା ବିରୋଧୀ ଅର୍ଥନୈତିକ ନୀତିକୁ ବିଭିନ୍ନ ମହଲରେ ଲୋକମାନେ ନିନ୍ଦା ଓ ବିରୋଧ କରିଛନ୍ତି। ଏ ସମ୍ପର୍କରେ କେନ୍ଦୁଝରର ଆଇନଜୀବୀ ସତ୍ୟଜିତ ନନ୍ଦ ତାଙ୍କ ପ୍ରତିକ୍ରିୟାରେ କହିଛନ୍ତି ଯେ, ଏଥିଯୋଗୁ ଓଡିଶାର ରାଜସ୍ବ କ୍ଷତି ନିଶ୍ଚିତ ଭାବେ ହେବ। ପ୍ରଥମତଃ ଯଦି କମ୍ପାନୀ ଟ୍ୟାନ ନମ୍ବର ନୂଆକରି କରିଥିବ ତାହାଲେ ଆମ ରାଜ୍ୟର ଇନକମ୍ ଟ୍ୟାକ୍ସ ଟିଡିଏସ କ୍ଷତି ହେବ ା ସେହିପରି କମ୍ପାନୀ ଆକ୍ଟରେ ଅନେକ ଜିନିଷର ପରିବର୍ତ୍ତନ ହେବାରୁ ରାଜ୍ୟର ରାଜସ୍ବ କ୍ଷତି ହେବା ସ୍ବାଭାବିକ ବୋଲି କହିଛନ୍ତି। ଏ ସମ୍ପର୍କରେ ଟାଟା ସ୍ପଞ୍ଜ କର୍ପୋରେଟ ଅଧିକାରୀ ଶୀତଳ ସ୍ବାଇଁଙ୍କୁ ପଚାରିବାରୁ କମ୍ପାନୀ ସେକ୍ରେଟାରୀଙ୍କ ସହିତ ଏବାବଦରେ ବିଚାର ବିମର୍ଶ କରିବା ପରେ ତଥ୍ୟ ଦେବେ ବୋଲି କହିଛନ୍ତି। ପ୍ରକାଶ ଯେ, ଯୋଡା ବ୍ଲକ ବିଲେଇପଦାଠାରେ ଟାଟାସ୍ପଞ୍ଜର ଏହି କାରଖାନାଟି ୧୯୮୨ ମସିହାରେ ପଞ୍ଜୀକୃତ ହୋଇଥିଲା। ଏହି କାରଖାନାରେ ପ୍ରାୟ ୪ଶହରୁ ଊର୍ଦ୍ଧ୍ୱ କର୍ମଚାରୀ କାର୍ଯ୍ୟ କରନ୍ତି। ଏହି କାରଖାନାକୁ ସ୍ପଞ୍ଜ ଆଇରନ ତିଆରି କରିବା ପାଇଁ ଯୋଡା ଖଣି ମଣ୍ଡଳରେ ଥିବା ଟାଟା କମ୍ପାନୀର ଖଣ୍ଡବନ୍ଧ ଖଣିକୁ କଞ୍ଚା ମାଲ ଆସେ। ଏହି କମ୍ପାନୀ ଝାଡଖଣ୍ଡର ଉଷା ମାର୍ଟିନ୍ ନାମକ କମ୍ପାନୀକୁ ମଧ୍ୟ ଆପଣାଇଥିବା ବିଶେଷ ସୂତ୍ରରୁ ଜଣାପଡିଛି।
