ଜଗତ୍ସିଂହପୁର ଅଫିସ,୧ା୬: ଜଗତ୍ସିଂହପୁର ଜିଲାରେ କରୋନା ସଂକ୍ରମିତଙ୍କ ପାଇଁ ସରକାରୀ ବାଦ୍ ୮ଟି ଘରୋଇ ଆମ୍ବୁଲାନ୍ସ ନିୟୋଜିତ ହୋଇଛି। ଏଥିସହ ୧୦ଟି ଘରୋଇ ବୋଲେରୋ କୋଭିଡ୍ କାମରେ ଲାଗିଛି। କିନ୍ତୁ କରୋନା ସଂକ୍ରମିତଙ୍କ ପରିବହନ ପାଇଁ ଲାଗିଥିବା ୮ ଆମ୍ବୁଲାନ୍ସ ମାଲିକଙ୍କୁ ଧାର୍ଯ୍ୟ ସର୍ତ୍ତ ମୁତାବକ ଭଡା ଓ ଚାଳକଙ୍କୁ ଖାଇବା ଆଦି ଦିଆଯାଉ ନ ଥିବା ଅଭିଯୋଗ ହୋଇଛି। ସଂକ୍ରମିତଙ୍କ ସହ ଅଧିକାଂଶ ସମୟ ଏହି ଆମ୍ବୁଲାନ୍ସ ଚାଳକ ସମୟ କଟାଉଛନ୍ତି। କିନ୍ତୁ ସେମାନଙ୍କ ବିଶେଷ ଦାୟିତ୍ୱ ନିଆଯିବା ପରିବର୍ତ୍ତେ ହତାଦର କରାଯାଉଛି। ଏ ପରିସ୍ଥିତିରେ ଆମ୍ବୁଲାନ୍ସ ଚଳାଇବା ସମ୍ଭବ ନୁହେଁ ବୋଲି ସମ୍ପୃକ୍ତ ଆମ୍ବୁଲାନ୍ସ ମାଲିକମାନେ ରବିବାର ଯୁକ୍ତି ବାଢି କୋଭିଡ୍ ମୁକାବିଲାରୁ ଓହରିଯିବାକୁ ଚେତାବନୀ ଦେଇଛନ୍ତି।
ଆମ୍ବୁଲାନ୍ସ ମାଲିକ ଅଞ୍ଜନ ପ୍ରଧାନ ଓ ଚାଳକ ପ୍ରଭାତ ପଣ୍ଡା ପ୍ରମୁଖ କହିଛନ୍ତି, ଜିଲା ପ୍ରଶାସନ ସେମାନଙ୍କ ଭାବାବେଗ ସହ ଖେଳୁଛି। ଆମ୍ବୁଲାନ୍ସ ଲାଗିବା ସମୟରେ କୁହାଯାଇଥିଲା, ୧୫ ଦିନରେ ଭଡା ବାବଦ ଅର୍ଥ ଦିଆଯିବ। ପ୍ରତ୍ୟେକ ଦିନ ଚାଳକଙ୍କ ଖାଇବା ବାବଦରେ ୧୨୦ ଟଙ୍କା ହିସାବରେ ଦିଆଯିବ। କିନ୍ତୁ ଏଥିମଧ୍ୟରେ ୨ ମାସ ଅତିକ୍ରାନ୍ତ ହୋଇ ଯାଇଥିଲେ ସୁଦ୍ଧା ଆମ୍ବୁଲାନ୍ସ ଭଡା ମିଳୁନାହିଁ, କି ଚାଳକଙ୍କୁ ଖାଇବା ବାବଦ ଅର୍ଥ ଦିଆଯାଉନାହିଁ। ପ୍ରତ୍ୟହ କରୋନା ସଂକ୍ରମିତଙ୍କ ସହ ସେମାନେ ଅତି କମ୍ରେ ୪/୫ ଘଣ୍ଟା କଟାଉଛନ୍ତି। ଲୋକେ ସଂକ୍ରମଣ ଭୟରେ ସତର୍କତା ଅବଲମ୍ବନ କରୁଥିବା ବେଳେ ସେମାନେ ଜୀବନ ପ୍ରତି ବିପଦ ଜାଣି ମଧ୍ୟ ସେବାରେ ନିୟୋଜିତ ଅଛନ୍ତି। ଏହା ମଧ୍ୟରେ ଏକାଧିକ ଚାଳକ ଅସୁସ୍ଥ ହେବାରୁ ଆମ୍ବୁଲାନ୍ସ ଛାଡି ପଳାଇଲେଣି। ଅଞ୍ଜନ ଏକଥା ମଧ୍ୟ କହିଛନ୍ତି, ଗତ ୩୦ ତାରିଖ ସକାଳୁ ସେ କୋଭିଡ୍ କାମରେ ଯାଇ ରାତିରେ ଭୋକିଲା ହୋଇ ଜିଲା ମୁଖ୍ୟ ଚିକିତ୍ସାଳୟ ଫେରିଥିଲେ। ପରେ ପାଉଁରୁଟି ଖାଇ ଏହି ପରିସରସ୍ଥ ନିର୍ଦ୍ଦିଷ୍ଟ କୋଠରିରେ ସଙ୍ଗରୋଧ ଭାବେ ରାତ୍ରି ଯାପନ କରିଥିଲେ। ଘର, ଗାଁକୁ ଯାଇ ହେଉ ନ ଥିବାବେଳେ ଆର୍ଥିକ ଅନଟନ ବୋଝ ଉପରେ ନଳିତା ବିଡା ସଦୃଶ ହୋଇଛି। ଜିଲା ପ୍ରଶାସନ ଓ ଜିଲା ସ୍ବାସ୍ଥ୍ୟ ବିଭାଗ ସେମାନଙ୍କ ପ୍ରତି ଅବହେଳା କରୁଛନ୍ତି। ଆର୍ଟିଓ, ଜିଲା ସ୍ବାସ୍ଥ୍ୟ ବିଭାଗ ଓ ଜିଲା ପ୍ରଶାସନ ପରସ୍ପର ଆଡକୁ ଅଙ୍ଗୁଳି ଦେଖାଇ ଟଙ୍କା ଦେବାରେ ବିଳମ୍ବ କରୁଛନ୍ତି। ଏଥିମଧ୍ୟରେ ୩ ଥର ସେମାନେ ବନ୍ଦ ନିଷ୍ପତ୍ତି ନେଇଥିଲେ ସୁଦ୍ଧା ଖୁବ୍ କମ୍ ଦିନରେ ଟଙ୍କା ଦିଆଯିବ ବୋଲି ପ୍ରତିଶ୍ରୁତି ଦିଆଯାଇ ପରେ ପ୍ରତାରିତ କରାଯାଇଛି। ଏ ସମ୍ପର୍କରେ ସିଡିଏମ୍ଓ ଡା. ବିଜୟା ପଣ୍ଡା କହିଛନ୍ତି, ଶୁବ୍ଶୀଘ୍ର ସେମାନଙ୍କ ପ୍ରାପ୍ୟ ପ୍ରଦାନ ପାଇଁ ଉଦ୍ୟମ ହେଉଛି। ଏଥିସହ ସେମାନଙ୍କୁ କୋଭିଡ୍ କାମରୁ ନିବୃତ୍ତ ନ ହେବା ପାଇଁ ବୁଝାଯାଉଥିବା ପ୍ରକାଶ କରିଛନ୍ତି।
