କେସିଙ୍ଗା, ୧୩।୮( ତୁମେଶ୍ୱର ସାହୁ): କଳାହାଣ୍ଡି ଜିଲା କେସିଙ୍ଗା ବ୍ଲକର କେତେକ ବିଦ୍ୟାଳୟରେ ଶିକ୍ଷକ ଅଭାବ ଥିବାବେଳେ, ଅନ୍ୟ କେତେକ ସ୍କୁଲରେ ଅଧିକ ଶିକ୍ଷକ ରହିଛନ୍ତି। ଏହି ଅସମତୁଲତା ଦୂର କରିବା ପାଇଁ ଶିକ୍ଷା ବିଭାଗ ଆବଶ୍ୟକତା ଅନୁଯାୟୀ ଶିକ୍ଷକଙ୍କୁ ଡେପୁଟେସନରେ ପଠାଉଛି।
କିଛିଦିନ ତଳେ ଦେଣ୍ଡୋଗୁଡ଼ା ଉଚ୍ଚ ପ୍ରାଥମିକ ବିଦ୍ୟାଳୟରୁ ଜଣେ ଶିକ୍ଷୟିତ୍ରୀଙ୍କୁ ଜିଲାଶିକ୍ଷା ଅଧକାରୀଙ୍କ ନିର୍ଦ୍ଦେଶକ୍ରମେ କେସିଙ୍ଗା ଗୋଷ୍ଠୀ ଶିକ୍ଷା ଅଧକାରୀ କେସିଙ୍ଗା ସରକାରୀ ପ୍ରାଥମିକ ବିଦ୍ୟାଳୟକୁ ଜଣେ ଶିକ୍ଷୟିତ୍ରୀଙ୍କୁ ମେଡ଼ିକାଲ ସମସ୍ୟା ରହିଥିବାରୁ ଡେପୁଟେସନ ପଠାଯାଇଛି। କେସିଙ୍ଗା ପ୍ରାଥମିକ ବିଦ୍ୟାଳୟରେ ଦୀର୍ଘବର୍ଷ ଧରି ଖପର ଘରେ ଶିକ୍ଷାଦାନ ଚାଲୁଥିଲା। ଏନେଇ ବିଭିନ୍ନ ସମୟରେ ଖବରକାଗଜରେ ଖବର ପ୍ରକାଶ ପାଇବା ପରେ ଓଡ଼ିଶା ସରକାରଙ୍କ ସ୍ପେସିଆଳ ଫଣ୍ଡରୁ ୯୪ ଲକ୍ଷ ବ୍ୟୟ ଅଟକଳରେ ନୂତନ ବିଦ୍ୟାଳୟ ଗୃହ ନିର୍ମାଣ କରାଯାଇଛି। ବ୍ଲକ ଓ ଜିଲା ଶିକ୍ଷା ଅଧିକାରୀଙ୍କ ମିଳିତ ଉଦ୍ୟମରେ ବିଦ୍ୟାଳୟକୁ ଚୟନ କରାଯାଇ ଗୁଣାତ୍ମକ ଶିକ୍ଷା ପାଇଁ ଆବଶ୍ୟକତାନୁଯାୟୀ ଶିକ୍ଷକ-ଶିକ୍ଷୟିତ୍ରୀଙ୍କୁ ନିଯୁକ୍ତି ବ୍ୟବସ୍ଥା କରାଯାଇଛି।
କେସିଙ୍ଗା ସରକାରୀ ପ୍ରାଥମିକ ବିଦ୍ୟାଳୟରେ ନୂତନ ଗୃହ ନିର୍ମାଣ ସହ ଗୁଣାତ୍ମକ ଶିକ୍ଷା ପାଇଁ ଆବଶ୍ୟକ ଶିକ୍ଷକ ନିଯୁକ୍ତି ବ୍ୟବସ୍ଥା କରାଯାଇଛି। ତେବେ କିଛି ବ୍ୟକ୍ତି ଶିକ୍ଷା ବିଭାଗର ପଦକ୍ଷେପକୁ ବିରୋଧ କରି ଗ୍ରାମବାସୀଙ୍କୁ ପ୍ରରୋଚିତ କରୁଥିବା ଏବଂ ସ୍କୁଲରେ ତାଲା ପକାଇବାକୁ ଉଦ୍ୟମ କରୁଥିବା ଅଭିଯୋଗ ହୋଇଛି।
ଏହା ଛାତ୍ରଛାତ୍ରୀଙ୍କ ପାଠପଢ଼ାରେ ବାଧା ସୃଷ୍ଟି କରୁଥିବାରୁ ବୁଦ୍ଧିଜୀବୀ ମହଲରେ ଚିନ୍ତା ପ୍ରକାଶ ପାଇଛି। କେସିଙ୍ଗା ବିଇଓ ଆନନ୍ଦ କୁମାର ବେହେରା କହିଛନ୍ତି, ଆମ ଶିକ୍ଷା ବିଭାଗ ଉପରେ କିଛି ଅସାମାଜିକ ବ୍ୟକ୍ତି ଶିକ୍ଷାଦାନ କ୍ଷେତ୍ରରେ ବାଧା ସୃଷ୍ଟି କରୁଛନ୍ତି। ଆଗାମୀ ଦିନରେ ଯଦି ଏମିତି ବାଧା ସୃଷ୍ଟି ହୁଏ ଦୃଢ଼ କାର୍ଯ୍ୟାନୁଷ୍ଠାନ ନିଆଯିବ।
Dharitri – Odisha’s No.1 Odia Daily
