ଭୁବନେଶ୍ୱର,୯ା୧(ବ୍ୟୁରୋ): ନିଲାମ ନେଉଥିବା ଲିଜଧାରୀମାନେ ଖଣିଜ ସମ୍ପଦ ନେବା ପରେ ଖଣିକୁ ଖୋଲା ଛାଡି ଚାଲି ଯାଉଛନ୍ତି। ଖଣି ପାଇଁ ନଷ୍ଟ ହେଉଥିବା ପରିବେଶର କ୍ଷତି ଭରଣା କରୁନାହାନ୍ତି। ଏହାକୁ ନେଇ ସର୍ବୋଚ୍ଚ ନ୍ୟାୟାଳୟ ଉଦ୍ବେଗ ପ୍ରକାଶ କରିଛନ୍ତି। ଏଣିକି ଲିଜଧାରୀ ଖଣି ଅଞ୍ଚଳରେ ଫୁଲ, ଫଳ, ପନିପରିବା ଚାଷ ପାଇଁ ସମସ୍ତ ପ୍ରକାର ବନ୍ଦୋବସ୍ତ କରିବେ। ଖଣିଜ ପଦାର୍ଥ ଉତ୍ତୋଳନ ପରେ ସେହି ଅଞ୍ଚଳ ଯେପରି ସବୁଜିମାରେ ଭରିଯିବ ସେ ନେଇ ସମସ୍ତ ବ୍ୟବସ୍ଥା କରିବାକୁ ସୁପ୍ରିମକୋର୍ଟ ନିର୍ଦ୍ଦେଶ ଦେଇଛନ୍ତି। ପ୍ରଧାନ ବିଚାରପତି ଜଷ୍ଟିସ ଶରଦ ଏ. ବୋବଡେ, ଜଷ୍ଟିସ ବି.ଆର. ଗାଭାଇ ଏବଂ ଜଷ୍ଟିସ ସୂର୍ଯ୍ୟକାନ୍ତଙ୍କୁ ନେଇ ଗଠିତ ଖଣ୍ଡପୀଠ ଖଣି ଖନନ ପରେ ସେହି ଅଞ୍ଚଳ ପାଇଁ ଲିଜଧାରୀ କି ପଦକ୍ଷେପ ନେଉଛନ୍ତି ସେ ନେଇ ଆସନ୍ତା ୩ ସପ୍ତାହ ମଧ୍ୟରେ ଏକ ଆକ୍ସନ ଟେକେନ ରିପୋର୍ଟ ଦାଖଲ କରିବାକୁ ନିର୍ଦ୍ଦେଶ ଦେଇଛନ୍ତି। ପରିବେଶ ମଞ୍ଜୁରୀ ଓ ଖଣି ଲିଜ ପାଇଁ କେନ୍ଦ୍ର ସରକାର ଯେଉଁ ସର୍ତ୍ତ ରଖିଥାଆନ୍ତି ଖଣି ଖନନ ପରେ ଉକ୍ତ ଅଞ୍ଚଳର ଖାଦ୍ୟଶସ୍ୟ ଉତ୍ପାଦନ ପାଇଁ ପରିବେଶ ସୃଷ୍ଟି କରିବା ଦିଗରେ ମଧ୍ୟ ଅନୁରୂପ ବ୍ୟବସ୍ଥା କରିବା ଲାଗି ନିଶ୍ଚିତ କରିବାକୁ କୋର୍ଟ କେନ୍ଦ୍ର ସରକାରଙ୍କୁ ନିର୍ଦ୍ଦେଶ ଦେଇଛନ୍ତି। ଖଣି ଖନନ ପରେ ଉକ୍ତ ଅଞ୍ଚଳ ସବୁଜିମା ଶୂନ୍ୟ ହୋଇଯାଉଛି। ସେଠାରେ କୁଶ ମଧ୍ୟ କଅଁଳୁ ନ ଥିବା କୋର୍ଟ ନିରୀକ୍ଷଣ କରିଛନ୍ତି। ଏହାକୁ ଦୃଷ୍ଟିରେ ରଖି କୋର୍ଟଙ୍କ ପକ୍ଷରୁ ଏହି ନିର୍ଦ୍ଦେଶ ଦିଆଯାଇଛି।
